Чыгыш 40 - Изге Язма

Мусаның Изге чатырны коруы

¹ Шуннан соң Раббы Мусага әйтте:

² – Беренче айның беренче көнендә Очрашу чатырын кор.

³ Чатырның эченә Боерыклар сандыгын куй һәм аны пәрдә белән аерып ал.

⁴ Аннары өстәлне алып кил дә аның өстенә барлык кирәкле әйберләрне куй. Аннары чатырга шәмдәлне урнаштыр һәм аңа яктырткычларны куеп чык.

⁵ Хуш исле сумала-майлар көйрәтү өчен, алтыннан ясалган мәзбәхне Боерыклар сандыгы каршысына куй, ә чатырга керә торган урында пәрдә эл.

⁶ Корбан яндыру мәзбәхен Очрашу чатыры алдында урнаштыр,

⁷ ә чатыр белән мәзбәх арасына юынгыч куеп, су сал.

⁸ Чатыр тирәли ишегалды ясап, ишегалды капкасына пәрдә эл.

⁹ Изгеләндерү мае ал да чатыр һәм андагы барлык әйберләрне май сөртеп изгеләндер; шул рәвешле, чатыр изге булыр.

¹⁰ Аннары корбан яндыру мәзбәхен һәм аның барлык әсбапларын май сөртеп изгеләндер; шул рәвешле, мәзбәх тулысынча изге булыр.

¹¹ Шулай ук юынгычны һәм аның аскуймасын май сөртеп изгеләндер.

¹² Һарунны һәм аның угылларын Очрашу чатыры алдына алып килеп коендыр.

¹³ Шуннан соң, изге киемнәр кидереп, Һарунны май сөртеп изгеләндер – рухани итеп, Миңа хезмәткә багышла.

¹⁴ Шулай ук аның угылларын да китер, аларга да күлмәкләр кидер

¹⁵ һәм, Миңа хезмәт итә алсыннар өчен, аталарына май сөрткән кебек, май сөрт. Шуннан соң алар да Миңа рухани булып хезмәт итә алырлар. Шулай итеп, алар буыннан-буынга күчеп баручы руханилыкка багышланган булырлар.

¹⁶ Муса Раббы кушканнарның барысын да башкарды.

¹⁷ Чатыр икенче елның беренче аенда, айның беренче көнендә корылды.

¹⁸ Чатырны корганда, Муса башта нигезләрен салды, рамнарын урнаштырды, борысларын тарттырды һәм баганаларын утыртты.

¹⁹ Аннары ул, Раббы кушуы буенча, корылма өстенә ике кат каплавыч япты.

²⁰ Боерыклар язылган таш такталарны сандык эченә салды да, аның колгаларын урнаштырып, капкачын япты.

²¹ Сандыкны чатыр эченә кертте һәм, Раббы кушканча, Боерыклар сандыгын аерып кую өчен, пәрдә элде.

²² Очрашу чатырының төньяк өлешендә, чатыр эчендәге пәрдә каршысында, Муса өстәл урнаштырды

²³ һәм, Раббы кушуы буенча, Раббы алдындагы шушы өстәлгә икмәк куйды;

²⁴ Очрашу чатырының көньяк өлешендә, өстәл каршысында, шәмдәл урнаштырды,

²⁵ һәм, Раббы кушуы буенча, Раббы алдындагы шушы шәмдәлгә яктырткычларны тезеп чыкты.

²⁶ Очрашу чатыры эчендәге пәрдә каршысында Муса алтын мәзбәх урнаштырды

²⁷ һәм анда, Раббы кушуы буенча, хуш исле сумала-майлар көйрәтте.

²⁸ Аннан соң Муса чатырга керә торган урында пәрдә элде;

²⁹ Очрашу чатыры алдында корбан яндыру мәзбәхен урнаштырды һәм, Раббы кушуы буенча, шунда тулаем яндыру корбаны китерде һәм икмәк бүләге тәкъдим итте.

³⁰ Аннары Очрашу чатыры белән мәзбәх арасына юынгыч куеп, су салды.

³¹ Муса, Һарун һәм аның угыллары анда аяк-кулларын юа торган булдылар.

³² Алар, Раббы Мусага кушканча, кул-аякларын Очрашу чатырына кергән саен һәм мәзбәхкә якынайган саен юдылар.

³³ Муса, чатыр һәм мәзбәх тирәли ишегалды ясап, капкасына пәрдә элде. Мусаның эше шуның белән тәмәмланды.

Болытның Очрашу чатырын каплавы

³⁴ Шулвакыт Очрашу чатырын болыт каплап алды да чатыр эчен Раббы шөһрәтенең балкышы тутырды.

³⁵ Муса Очрашу чатырына керә алмады, чөнки аны болыт каплап алган һәм чатырның эчен Раббы шөһрәтенең балкышы тутырган иде.

³⁶ Чатыр өстеннән болыт күтәрелгәндә, исраилиләр, һәрбер туктаган урыннарыннан юлга кузгалып, сәяхәтләрен дәвам иттерделәр,

³⁷ ә инде болыт күтәрелмәсә, аның кузгалганын көтеп туктап тордылар.

³⁸ Көндезләрен Раббы болытының чатыр өстендә торуын, ә төннәрен болыт эчендә ут януын исраилиләр бөтен сәяхәтләре дәвамында үз күзләре белән күрделәр.