Romains 11 - New Testament in Mitsogo

Nzambé asikiné éongo éaIsraél

¹ Me Paul natsapéô mbe ?tambô Nzambé amakina omedi ana aIsraël-a? Aé, asiakiné. Memuene Paul nandé môsi éongo éaIsraël. Tétene éami te Abraham. Ebôtee éami te Benjamin.

² Nzambé asikiné omedi, ane amasevoa angô va mbeego mbe: adua te omami. Nôsabômu éne émasemba Elie Nzambé gôndé ana aIsraël ématendu gô Matendeo maNzambé.

³ Elie angô mbe: Kumu, adua amani éyôha apandôédi amatasa moo. Adua amani épanza évumbéô éogondoku émaneegedu inee éoo. Me Elie, nasanéyi te memuene na koo. N’ahngô abuta éyôha me.

⁴ ?Nzambé amamôaabéa mbe ndé? Nzambé angô mbe: Me namakenea gô inami mitônisa tsambué mioma. Ahsisibé mabongo maô gôéneegeda mbumbane ééndô mbe Baal.

⁵ Menyani mbe na gô ndéô nedué éndé te nane. Nzambé andéké n’okabôe wedi, buéyé mbe ôgeôge, ômasevoa angô gô ngeba yedi.

⁶ Amasevoa omedi gô ngeba yedi, kaka gô ényepa éaô gômbe ngeba yaNzambé dienanô mbe te ti ndi ngeba. Mbe amasevoaka omedi gô mayanza maô mamisôba, ngeba yaNzambé mbe disamenyanganô.

⁷ ?Tôngeenda nayee? Ana aIsraël asidiia éne émabuta ahngô. Ane amadiiani te ane amasevou na amuene Nzambé. N’ane amasanéani atsapéô ti tsapéô asoongôa éditéga.

⁸ Matendeo MaNzambé matônigôa mbe: Nzambé amakoa édidie éaô ga éndé gô vio. Amakoa ahngô mbe ngu na deo, miso mayeeni mamakoga maka mapogu. Na matô mayookia mamakoga maka mandiba.

⁹ Tétee éasô David amavovo mbe: Enbaga mbe môyakôe waô ôngakoga ôka pagô na étambô gômbe angakuba na angeetsô tsôgôô.

¹⁰ Engaba mbe miso maô mangeeméga na asangadôena. Engaba mbe akotomo gédundé te gô magumba maô.

¹¹ Me Paul natsapéô. ?Vamapônga Ajuif amakuéa te môbô, gétimôgé-a? Aé. Angatimôga. Ivô gô gékôbage saô avo oma ameetsô géobogeo, te mbe Ajuif angeenda tsingayi gôénikéa édiia sangô.

¹² Gékôbage sAjuif gémakoga géka ébégô éamôsôba gôényepeda édidie éoma muetso. Gômasugédu Ajuif te avo oma amadugu ôkitie gô édidie éaô. Okô mbe gô gékôba sAjuif avo amanyepedu, tambô na gô géobogeo sAjuif éngootéa ényepa.

Géobegeo sane asaba Ajuif

¹³ Me Paul navovo éva n’anye nôsaba Ajuif. Jésus-Christ amakudéga me gôétsua tsangône éedi na gôndé ane asaba gô éongo éAjuif. Na memuene natsôkéa gôékuméda éyanzee éne émeetsô me.

¹⁴ Me nanyôngéô ényiméda asi éongoe yami gômbe angabuta éba mônongovo gandé ane asaba Ajuif.

¹⁵ Ekegea te nane. Gô ndéône émakôngéga Nzambé Ajuif na va kôbangô, oma muetso amanikéa évambédu n’amuene. Tambô gô ndéône éngawasedu Ajuif na gôndé Nzambé ?ésangootéa ényepa gôndé oma muetso-a? Engootéa ényepa. Ane ambaka g’ôwa angaba na monyo.

¹⁶ Okô gébéndéké samôpemba gépanga ékitsôni gédeekedu na gôndé Nzambé, tambô na môpembee wetso ôkitsiôni ta aNzambé. Okô mitambamie miegéétété mideekedu na gondé Nzambé, tambô na mitabémie mietso te miaNzambé.

¹⁷ Ana aIsraël agono na géétété gééndô mbe olivier. Tôkanéga na ôsagu. Osagu ôkeneo na kumu angô. Mivô mitabé amikeeda. Anye nôsibôtu gô éongo éAjuif nôgono na mitabé miovendo miviaganédu gô môkuba osagu na mibongou na mitamba miosagu.

¹⁸ Tambô ômbieeséda mitabé mimakeeduni. ?Ongatsôkima nayee? Kaka éwe ôdôngéda mitamba, ivô te mitamba midôngéda éwe.

¹⁹ Mavooe ôngatsapéô mbe: ?Tambô mitabémie mine misikitsô gôndé me mbe naviagana na miangô va makitséôme maô-a?

²⁰ Ii, éndé te nane. Miangô mimakitsôkô te gô paga yaô. N’anye nômaviagana na miangô gôsitsumé anye Nzambé paga. Ivô nôwema kabaga nôba na nyemo. Digaani na gomo n’egobeda.

²¹ Okô Nzambé asidagéô gôékeeda mitabémie mimabôtu na géétété, te Ajuif, asangadagéô gôékeeda na mine mimananéguni, te anye nôsibôtu gô éongo éAjuif.

²² Tasani gatubéda Nzambé wa n’anyô ngeba yedi na ôpisedi. Andé n’opisa gôndé ane amakubani. Andé na ngeba gondé anye nômôgobeda n’etondo. Digaani gô ngeba yedi kabaga anye nôkeedu gakeedu mitabémie.

²³ Okô Ajuif atsiki paga yaô anganikéa énanégu gô môkuba ômabakangô. Gôébégô Nzambé andé na ngudi gôénikéda ahngô na gô étengue éaô.

²⁴ Anye nôsibôtu gô éongo éAjuif, nôndé môtabé ovendo. Na ômakeedu g’ôveendo gôénanégu gô môkuba osagu. Nôsibôtu g’ôsagu. Géé Ajuif te ane amabôtu g’ôsagu. Vamakeedu ahngô gakeedu môtabé, ésangadaga gôénikéa énanéga ahngô gô étungue éaô.

V’ekôdéô ana aIsraël angoobou

²⁵ Anee aTeétee n’ami ôôkôni ébégô édué éapie ésinigôganéô na muetso. Kabaga nôba n’etasa mbe we tômani étsiga v’ekôdéô éodo, nanôomba énigôa ébégô édué. Okabô ôvo éongo eaIsraël asangoongôa éôkô. Vangadugu ôkabôe ane asibôtu gô Ajuif amaviga na gôndé Nzambé gô géobogeo, na vane Ajuif angookô.

²⁶ Eenakani gangoobou ana aIsraël muetso gatônigôu na Matendeo maNzambé mbe: Mooboyi angaviga go Sion Anganôtôa ébévee éana aJazob

²⁷ Oôkoni éngavamba me n’angô Vanôtôa me ébévee éaô.

²⁸ Gôénôyuua g’ôpisa aNzambé gô ndéô nedué, Ajuif aka adudeo aNzambé gôébégô amakina Tsangô éedi Eamôsôba. Ivô gô ngudi yatétee yaô, Nzambé anyôngéô Ajuif na amasevoa ahngô.

²⁹ Nzambé asamenya éwata éne émeetsa angô oma na asakoa matasa medi gôndé ane amabambéa angô.

³⁰ Va mbeego anye nômakina ôgi aNzambé ivô ndéô nedué nôndé nôenanô na Nzambé ngeba gôébégô Ajuif amamôkékôéa.

³¹ Buéyé na ndéône asamôgobeda gômbe anye nôngeenanô na Nzambé ngeba. Na mbe n’ahngô muetso angeenanô ngebaye yedi.

³² Nzambé amasinga mbe oma atsôpu muetso te mônongovo gô tsôgôô éagékékôéôge saô gékékôa ahngô ôgie wedi, gômbe ngeba yedi dingeenanô dôta gôndé muetso te mônongovo.

Kumu angudi yetso andé n’ondômba ôvôni

³³ Me Paul nasôbasôbana gôébégô ôkitie ôndé na Nzambé ôndé ti ôvôni. Eodo éedi éôtéa émenya mabégô metso. ?One anganigôa matasa medi, indaa? ?One angamenya mane mavangangô indaa?

³⁴ Te gatônigôu na Matendeo MaNzambé mbe: ?Matasa maKumu mamenyanganô na ndaa? ?Angô oongu ndongi nandaa?

³⁵ ?One angapanga émôétsa sôma, aténdédaka mbe me nanganikéa éétsô, indaa? Nzambé te môpangine éétsa.

³⁶ Gôébégô éetso éviga te gôndé angô. Na éetso édônga te gô ngudi yedi na gô géneega samuene. Ondômbee wetso ôbaké gôndé Nzambé môbô na môbô. Amen.