Philippiens 2 - New Testament in Mitsogo

Christ amasugéda amuene na amasangégu

¹ Nandé na nyivôye gôndé anye. Gôétsi anye Jésus‐Christ mitéma mianyô gémôtsumé paga ?nôôtéa na ngudi‐a¿ Etondoe éedi énôkasôgéda‐a? ?Nôndé na évamba na Gédidi SaNzambé‐a? ?Nôndé na vitoo na ngeba anyene n’anyene‐a?

² Tambô nanôtôma mbe: Bakani évambevo na vitoo épo na môtémovo na ngudi dipo. Vane nôdugéda ékasôga éami.

³ Gô metso mayanzanye, nômbiasinga gédidi satsaé gédigaa gôndé anye. Nômbieenda mabégôme gô nyemo gôébuta éôkanô. Ivô sugédani anyene. Buedi mbe môma na môma abé n’etasa mbe akasô ootéa avôni n’ami.

⁴ Môma asabuta édugéda éne édagéô amuene étévô, ivô atasé gô éne édagéô môkedi.

⁵ Anye bakani na ôtasédie ôndé na amuene Jésus‐Christ.

⁶ Bandôa v’ebandô, andéké ényangevo na Nzambé. Ivô asigényôga gôémenyanganô mbe Angô te môvo na Nzambé.

⁷ Tambô amatsika amuene ényangee émabaka n’edi Na amaasugéda amuene gôéba môvéga. Amabongo gégoni samôma gôédigaa gadigaa môma.

⁸ Amamana pitsi yedi te andé amaasugédani. Amagobeda Téta ngu na ôwa. Amawa ôwa ôdagani ava gésumu.

⁹ T’ebandô Nzambé amamôsangéga gôéba gô ngongo amuetso. Na amamôétsa ina éôtéa na miname metso mookanôni.

¹⁰ Gômbe gô ina éne éaJésus, asi g’ôba muetso, n’asi tsinane, N’ane andé gô tsenge éane amawani, muetso angasiba mabongome mao.

¹¹ Na yôgi yamongome metso mangakuméda Nzambé nyaa ônganigôa yangô mbe: Jésus te Kumu apie.

Bakani ga dambi gôétanéda évitsi éatsengene

¹² Navovo n’anye nôndé na vitoo n’ami. Kuka yetso vamadenganô me vavo n’anye nômagobeda me. Tambô ôôtéani égobeda me na gomo buéyé mbe me tsaba n’anye. Yanzani na tatéani na gomo gôétubéda gamoobou anye.

¹³ Menyani mbe Nzambé asatsika éyanza gô mitéma mianyô. Ayanza mbe nôôkô tsôvé gôémôgobeda. Na ayanza mbe nôndéké na ngudi gôékea gô nzéane émakônzangô gôndé anye.

¹⁴ Indakani metso mane gébé na mikebanganô na gétsumané paga.

¹⁵ Vane nôngaba n’etsimama na nômagôgéani. Nôngamenyanganô mbe ana aNzambé agébé n’oési, nôdigaa va gatse oma abévani adiboe andé gô tsengene. Tanani ga minanga gô tsina evitsi.

¹⁶ Nôtana te vatsuéanye asi tsengene Tsangô éamonyo apie. Okô nôéndi nane, nanganyemôga na gényônga gôndé anye gô nyaa ôngaviga Jésus‐Christ. Na vane nangamenya mbe gô tsaéne ékea me pita pitsi yedi tsikea bobo. Eyanzee éami éndé na tsoongo.

¹⁷ Veetsanye Nzambé mitéma mianyô gémôtsumé paga, te gandé ôgondoku ômôdeekeda me. Mavooe me nangakôndéga monyoe wami na nzinaye yami mbe éngeetama va ngongo ogondokue ône va mbene aNzambé. Okô mbe ébé nane, anye gésanganani gôétsôkéa gényônga gévo n’ami.

¹⁸ Na vatsôkéanye, me dôta nangagésangana gôétsôkéa gényônga gévo n’anye.

Timothée na Epaphrodite

¹⁹ Okô Kumu Jésus asingi ganyôngéô me, nanganôkudégéa Timothée. Na vanganika angô n’eva, anganigôa me tsangône yanyô gôékasôgéda me.

²⁰ Te Timothée amuene andé môtémovo n’ami gôékebangana gôndé anye na môdigéôe wanyô.

²¹ Akasô muetso akebangana te mane manguene matévo, kaka mane maJésus‐Christ.

²² Anyene nôsabômu gamatubéda Timothée wa n’anyô mônongoe ôndé n’edi amôvinéné. Nôsabômu dôta gamayanzangô n’ami. Amayanza n’ami gô Tsangô Eamôsôba gayanza muana môtémovo na tétedi.

²³ Nanyôngéô énôkudégéa Timothée vangookô me éne éngeendô me éva.

²⁴ Naténdéda gô ina aKumu Jésus mbe gô pesu andéô nangaviga memuene na gôndé anye.

²⁵ Namani évangana na Epaphrodite mbe anika te na gôndé anye. Amabaka n’ami gô ébadi émagenyuni. Amayanza n’ami mônongovo gamanyôngéô anye nômamôtômakani gô ndéône émadagéô me.

²⁶ Angô ookô anye tsôvé. Amakebangana gôndé anye gôébegô éatsangô éebeea éedi émookô anye.

²⁷ Na gô pie amabaka na beeaga éowa na monyo. Ivô Nzambé amamôena ngeba. Ivô kaka Epaphrodite amuene, ameena te na me ngeba mbe kabaga panda yami diomba ékôndama gôéwéô n’one abaki n’ami.

²⁸ T’ebandô tsadinga énôkudégéa angô. Memuene nangeena buedi vangatsôkéanye na gényônga vangoombanye émôena.

²⁹ Tambô keneani angô n’ekasôga, gakeneo ana aTéta agô mbumu éaKumu Nzambé. Buedi mbe nômôtubéda egôba, angô n’akedi andé g’angô.

³⁰ Gôébégô amavétsô n’owa gôétsuéa me éne émabuta me, ésiôngôé anye étsua. Amabaka mbe awa gô gésoo saJésus‐Christ.