Mayanzame 11 - New Testament in Mitsogo

Pierre amanigôa asi mbumu éaNzambé gô Jérusalem

¹ Ane amatômukuni na asi mbumu éaNzambé amadigaa gô Judée ahmookô mbe: Ane asaba gô éongo éAjuif, eekédu dôta Ogi aNzambé.

² Vamanika Pierre na gô Jérusalem, asi mbumu éaNzambé gô éongo éAjuif amamôtsundéda.

³ Ahngô mbe: Tambô éwe Pierre, gômabaka éwe ômeengéa na gôndé ane asaba Ajuif na ane asigeetuni. Omaa môyakô vavô n’ahngô.

⁴ Vane Pierre amanigôa mabégô metso, na mane mavôni na mane magemage mamabuéani. Angô mbe:

⁵ Nyovo vamabaka me gô môsenge aJoppé namabaka gôévovo na Nzambé. Nameena ébégôe te nandé nani gébé gô vio. Nameena sôma gémasuma g’ôba na vandé me. Sômage géne gémaba ga môkanda ôpikô tabudé. Môkandee ône ômasumbédu gô mapandaka manayi. Omasuma g’ôba na vandé me.

⁶ Namasingégéda mane mava gatse amôkandee. Nameena nyama dindé na éeyo énayi, na nyama yagô pindi na dine dikea migoge, na nyoeye.

⁷ Vane namookô ôgie ômatôma me mbe: Pierre. Timôga. Yôhaka nyama yedi. Aaka.

⁸ Ivô me namakina mbe, Aé, kaka nane Kumu ami. Me madeo tsiaa nyama éasagô na gisigôgééni.

⁹ Ogie ômoomba éviga g’ôba ômasemba me mbe: Okô Nzambé ameenda mbe sôma gegé géndé gémagôgéani, ômbieenda mbe: Me tsaa, gésigôgéé.

¹⁰ Sômage gémasuma na vandé me kuka ditatô na vane gémanika na g’ôba.

¹¹ Tsina na tsina amôgôô atatô amatsiga gô eba ômadigaa me. Amatimôga gô Césarée, amatômu na gôndé me.

¹² Gédidi SaNzambé gématôma me mbe: Timôga. Kiaka n’atsatsee n’adua na gô Césarée. Pierre amatubéda mbe: Nôeni, ana atétee n’ami, mbangiye môtôba édi. Amakea n’ami na gô Césarée. Tômeengéa muetso na gô eba aCorneille.

¹³ Angô amanigôa we éne émeenangô gô ebedi. Nyovo ameena môsi g’ôba amavigédu na Nzambé amatema va mbene edi. Môsi g’ôba amavovo n’edi mbe: Kudéga oma na gô Joppé gôéwanyéda mômôgôône eendô mbe Simon Pierre.

¹⁴ Angagônigoa mabégô mavôni. Mangô mangooboo éwe gô ébévee éoo, anye na mbumune yoo nyetso.

¹⁵ Namabandôa évovo n’ahngô Gédidi SaNzambé gémasuma gôéengéa gô mitéma miaô mônongovo gameengéa sangô na gôndé wa n’anyô v’ebandô.

¹⁶ Vane te vamabangôa me éne émavovo Kumu Jésus mbe: Jean amanôbatésa na meba. Géé me, nanganôbatésa na Gédidi SaNzambé.

¹⁷ Vane wa n’anyô tôena mbe Nzambé ameetsa géômbé saCorneille Gédidige ôbiia, mônongovo gameetsô wa n’anyô sangô ôbiia vameetsa wa n’anyo Kumu Jésus-Christ mitémamie gémôtsumé paga. Gôndé me, tsiôngôé ékékôa éne émanyôngéô Nzambé éénda.

¹⁸ Asi mbumu éaNzambé gô Jérusalem amasuméda mitémamie vamookô ahngô tsangô nene. Amakuméda Nzambé mbe: Tambô na gô pie, Nzambé asabômu ane asibôtu gô éongo éAjuif. Eetsa ahngô ndéô gôékoa mitéma miaô na gôédiia monyo apie.

Asi mbumu éaNzambé gô Antioche

¹⁹ Gô ndéône émayôhu Etienne, gékuanô gévôni gémabuéa gôndé ane ameetsa Jésus mitémamie. Asiôngôé édigaa gô mbôka yaô. Amapanzangana na gô tsenge diyekani. Avo amakea na gô Phénicie. Avo na gô Chypre. Avo dôta na gô Antioche. N’ahngô ameekéda Mane Mamavovo Nzambé te gôndé Ajuife n’aô atévo.

²⁰ Buéyé nane, avo ane ameetsa Jésus mitémamie amatimôga gô Chypre na gô Cyréne gôékea na gô Antioche. Gône ameekéda buéyé n’ane ahsaba gô éongo éAjuif. Amanigôa ahngô Tsangô Eamôsoba éaKumu Jésus.

²¹ Ngudi yaKumu dimeenanô gôndé eekédie ane. Oma ayekani amagéngôga na gôndé Kumu na ameetsa Jésus mitéma miaô.

²² Asi mbumu éaNzambé gô Jérusalem amookô tsangône éne émabuéa gô Antioche. Vane amatôma Barnabas mbe: Kiaka. Okebuéa gô Antioche.

²³ Vamatsiga Barnabas gô Antioche, ameena éne émayanza Nzambé gôéétsa asi mbumu éedi mate. Amatsôkéa. Amoongo ahngô ndongi mbe: Nômbiaagana n’evambee éndé anye na Kumu. Bakani na môvinéné mbe mitéma mianyô misipa.

²⁴ Barnabas te môma amôsôba. Môtémedi ômayôa na Gédidi SaNzambé. Gômavambangô na Nzambé asitsumé ngudi yedi paga. Amaweseda oma ayekani gôésinga Kumu.

²⁵ Va mbenene vane, Barnabas amakea na gô Tarse gôéwanyéda Saul.

²⁶ Vamamôdengangô, ahmanika muetso abaé na gô Antioche. Amanana wangô môpuma amôbongo va gatse ambumu éaNzambé. Ameekéda oma ayekani. Aneengie amatetu mbe oma aChrist. Inee éne émabandôa te gô Antioche.

²⁷ Gô ndéône nene, avo apandôédi amatasa maNzambé amatimôga gô Jérusalem gôébuéa gô Antioche.

²⁸ Môpandôédi môvo, inedi Agabus, amatômu na Gédidi SaNzambé gôétema na gôéevéda oma ébégôe éngabuéani. Angô mbe: Gôngabôka nzaa épôni gô tsinane nyetso. (Na gô pie, nzaa nene émabôka te gô ndéône ématôma Claude tsengene.)

²⁹ Aneengie amavangana anguene gôéwedéa akaô. Angô mbe: We muetso, môma na môma tôngeetsa éne éndéké n’asô gôékudégéa ana aTéta asi mbumu éaNzambé adigaa gô Judée.

³⁰ Ameetsa te nane. Amakudéga éne émeetsangô ôbiia na gôndé peeye yambumu éaNzambé gô Judée. Te Barnabas na Saul amatsua dibiiaye dine.