Matthieu 3 - New Testament in Mitsogo

Mane nameekéda Jean‐Baptiste (Bono na )

¹ Gô ndéô nene Jean‐Baptiste amaviga eekéda gô tsenge émagasani éndé gô Judée.

² Ameekéda mbe: Koani mitéma mianyô mbe nôngaba wene mônongo oma gôébégô ôkumu aNzambé ôweseyi na gôndé wa n’anyô.

³ Esaïe môpandôédi ambeego amatasa maNzambé amavovo mbe: Ogi amôma ôamugana gô tsenge émagasani mbe: Baani nzéa éaKumu Tsimamédani buedi nzéa yedi. Mômane amaamuganani te amuene Jean.

⁴ Jean amaata madego mamagomu na miyo mianyama étetu mbe chameau. Amaataka v’oninge édata éagégôbôkô. Amaaka te tônda na ômbo.

⁵ Asi Jérusalem, na dôta asi tsengene nyetso aJudée na ane amadigaa gô kôbangô ambéyi étetu mbe Jourdain, amakea na gôndé Jean.

⁶ Gô mabégô maô mabévani môma na môma ameeséda amuene va pingô yoma na amadiia bateme gô mbéne étetu mbe Jourdain.

⁷ Vameena Jean pingô yApharisien na yAsadducéen ahviga gôébatésu, amavovo n’ahngô mbe: Anye nôgono na mbigé. ?Nômenya mbe nôngabusuga ôpisa aNzambé ôvigani‐a? ?Nôékédu nane na ndaa?

⁸ Gabôta géétété samôsôba miônda miedi miamisôba, anye kusédani ésima éamisôba étubéda mbe nômakoa mitéma gôéba wene mônongo oma.

⁹ Anye nôanyepeda anyene mbe: we te ana aAbraham. Nônatasa gô éne. Okô Nzambé anyôngéyiô ana aAbraham, andé na ngudi yekoa mataé mema maka ana aAbraham.

¹⁰ N’atsatsee géwangéô géka va mitamba mieetété. Eététée éetso ésabôta miônda miamisôba éngawangô na éngagunyu gô soto.

¹¹ Me nanôbatésa na meba gôétubéda mbe anye nôkoi mitéma mianyô. Ivô gô ngimami gôviga muene anganôbatésa na Gédidi SaNzambé na soto. Ngudi yedi diôtéa dine yami. Gétôkôtôkô ôgoeyee, géôté môtsé. Me te gétôkôtôkô. Angô te môtsé. Ivô tsaba pengo gétôkôtôkô. Nandé ti gô tsina asangô.

¹² Angô te mônongovo ga môma ookôa pôtô anganôtôa étutu na angakétéga pôtôye gô magobo. Ivô angatumba étutue gô soto géseemakani.

Jean‐Baptiste amabatésa Jésus (Bono na )

¹³ Jésus amanôtôga gô Galilée gôékea na gô mbéyi étetu mbe Jourdain. Amakea na gôndé Jean gôébatésu n’edi.

¹⁴ Ivô Jean amakanéga émôkina mbe: Me nandé na ngudi yeviga gôébatésu n’ewe. ?Ivô éwe yôviga gôébatésu n’ami‐a?

¹⁵ Jésus amaabéa angô mbe: Ebaké vita nane. Tôéndé te éne étôtômu na Nzambé. Na Jean asiombé ékina.

¹⁶ Vamabatésu Jésus, amakusa gô mbéyi. Na vane, ôbee ômatatôga na Jean ameena Gédidi SaNzambé gésuma ga ménga na vandé Jésus.

¹⁷ Ogi ômookanô ôvovo g’ôba mbe: Odôô te muanami amôtôma amiso. Me namônyôngéô na nzoo na gô môtéma.