LUC TSANGO EAMOSOBA EMATENDA 20 - New Testament in Mitsogo

?Enyangee éaJésus éviga gôni? (Bono na Matt. 21:23–27 )

¹ Nyovo Jésus ameekéda oma gô eba aNzambé Tsangô Eamôsôba. Tsesu yadeekedi adigondoku, n’anigôi amige miaNzambé, na peeye yAjuif amaviga na gôndé angô.

² Ameevôa Jésus mbe: ?Enyangee éyanzewe mabégô mema, éviga gôni? ?One ameetsa éwe ôtômu gôénda nane indaa?

³ Jésus amaabéa ahngô mbe: Me dôta nanôévôa yami nyivô. Beendani me

⁴ ?One amatôma Jean gôébatésa oma indaa? ?Te Nzambé-a? ?Vo te oma?

⁵ Ahmatsunda anguene n’anguene mbe: Okô tôvovo mbe te Nzambé amatôma Jean, angô angatôévôa mbe ?tambô ébégô ndé anye nôsisingé mabégô medi?

⁶ Okô tôvovo mbe te oma amatôma Jean ?ébégôe éngaba nayee? Oma muetso angatôtuma na mataé gôétôyôa, gôébégô muetso asabômu mbe Jean te pidi môpandôédi amatasa maNzambé.

⁷ Vane ahngô ahmaabéa Jésus mbe: We tôsamenya ône amatôma Jean gôébatésa oma.

⁸ Na Jésus amanikéda ahngô mbe: Na me muetso tsoongôa énôbeenda gésa géviga ényangee yami éyanza me.

Tsava éayanzi atsaga (Bono na Matt. 21:33–46 )

⁹ Vane Jésus amagunya oma tsava mbe: Môma amagaaba tsaga edi éetété éamiônda étetu mbe ôvigne. Amavangana n’ayanzie. Amanôtôga gô tsengedi. Amakea môtôô ôtongoni.

¹⁰ Gô ndéône émoombo miôndamie, kumu éatsaga amatôma môyanzi edi na gôndé akeneyie atsagane gôéétsô ôkabô edi amiônda. Akeneyie amatsôpa ône amatômukuni. Ahmamôbômôa. Ahmamônikéda mogo matévo.

¹¹ Kumu éatsaga amoomba étôma muene. Akeneyie amamôbômôa na amamônikéda mogo matévo.

¹² Kumu atsaga amoomba étôma ône amôtatô. Akeneyie amamôbeta na amamôpatsa.

¹³ Kumu éatsaga amatasa mbe: ?Me nangeenda nayee? Nakudégé muanee ami amôtéma. Mavooe angamekeda angô.

¹⁴ Ivô vameena akeneyie muanee aviga, ahmovovo anguene n’anguene mbe: Nôeni ône angaviagana n’enyangee éatsagane vangawa kooko asô. Tôbémôyôha. Buta mbe tsagane éba éasô n’anyô.

¹⁵ Ahmamôkuséda gô tsaga. Na ahmamôyôha. Jésus angô mbe: Kumu éatsagane ?angeenda nayee n’akeneyie?

¹⁶ Na amanigôa mbe: Vangaviga kumu éatsaga angayôha akeneyie abévani. Angeetsa tsagane muene môma. Ane amookôni ahmakina mbe: Aé ésangaba nane.

¹⁷ Ivô Jésus amabono ahngô na amavovo mbe: ?Nôkini ébégôe éne gôndé? Matendeo MaNzambé matônigôa te nane. Matônigôa mbe: Etaé émakôngégu n’asaayi eba Te éangô évumbu v’epandaka gôésipa ebee wetso.

¹⁸ Menyani mbe ône angatenôga gô étaé éne, angakuéa na angookô pievia. Na ôkô étaé éne éaaga gôndé môma, anganigôô na angakoga tsese.

Depu émavanéda môtômi atsenge (Bono na Matt. 22:15–22

¹⁹ Anigôi amige miaNzambé na tsesu yadeekedi adigondoku amabuta mônongo gôétsôpa Jésus te gô ndéô nene. Anguene gébômu mbe tsavane égunyi Jésus te gôndé anguene. Ivô asiôngôé émôtsôpa amookô géômbége gomo.

²⁰ Ahmaanda Jésus gô bôvingô gôéôkô gavovo angô. Ahmatôma n’avo oma amaakuméda anguene mbe ahmisôba, gôékea diébô gôétambéa Jésus pagô na nyivô gôémôkubéda. Te gô mônongo ône amabuta étsua Jésus na gôndé asi ényanga, atômie atsenge.

²¹ Ane amatômuni ameevôa Jésus mbe: Môékédi, tôsabômu mbe mane mavovo éwe te mapie matévo. Oékéda môdigédi apie ônyôngéô Nzambé. Osabono môma, buéyé môma abobo, buéyé môma môvôni, ôsamenya mane.

²² Beenda we gookô éwe gô mitôma mimatsikéô we. ?Tôvanéa môtômi atsenge César, depune vo tôsavana-a?

²³ Ivô Jésus asibômu ébandôe éebégôe émavigahngô na buembee nane gôémôkanéga. Amaabéa ahngô mbe:

²⁴ Tubédani me dode. ?Gégonige soso géndé gô dodene egé sandaa? Ahmamôaabéa mbe: Te saCésar, môtômi atsenge.

²⁵ Vane Jésus amavovo n’ahngô mbe: Ene éndé éaCésar môtômi atsenge, nikédani na gôndé angô. Ene éndé éaNzambé, nikédani na gôndé Nzambé.

²⁶ Ane amanyôngéô émôkubéda gô nyivô va miso moma asimôdiié. Amasôbasôbana éodoe éedi na ahsiôngôé ébubua.

Nyivô éagékundungéô (Bono na Matt. 22:23–33

²⁷ Avo Asadducéen ahmaviga na gôndé Jésus. (Asadducéen te asi gésôga géékéda mbe ane amawani asangakunduga.) Ahmeevôa Jésus mbe:

²⁸ Môékédi, ndongi dimatendéô we na Moïse ditôbeenda mbe: Okô muanayoo amômôgôô awéyi atsika môgayedi gékômba, ôviagana môkuée. Obôta n’edi ana gô ina amuanayoo amawani.

²⁹ Oôkô ébégô édué. Gômabaka aneyee tsambué amôgôô. Pene amabaa môgeto. Na amawa amatsika môgayedi gébé na muana.

³⁰ Môdimine amaviagana môkuée.

³¹ Na ône amôtatô te nane. Gôndé ahngô muetso tsambué te mônongovo. Ahmabongo môgetone na amawa ahngô muetso gébôté muana.

³² Gô ngima amôgôôe muetso, na môgetone amawa.

³³ ?Gô nyee ôngakunduga ane amawani, môgeto nône angaba waanda? Bonoko, muetso tsambué ahmamana émôbaa.

³⁴ Jésus amaabéa ahngô mbe: Amôgôôe n’agetoe atsengene abaana.

³⁵ Ivô amôgôôe n’agetoe, ane andé kuanakue gôékunduga g’ôwa na gôédigaa gô tsenge évigani asangabaana.

³⁶ Asangadôôwa. Angaba gandé asi g’ôba. Angaba ana aNzambé gômakunduga ahngô g’ôwa.

³⁷ Moïse amanigôa na vede mbe ane amawani angakunduga. Gô ndéône émavovo Nzambé n’edi, ôgi aNzambé ômakusa gô géétété gémayôani, Moïse amabeendu mbe: Kumu Nzambé te Nzambé éneegeda Abraham na Isaac, na Jacob.

³⁸ Nzambé te Nzambé ane adôngani kaka Nzambé ane amawani. Gôébégô gôndé Nzambé, ahngô muetso andé na monyo.

³⁹ Avo anigôi amige amamôsénga mbe: Ti éwe môékédi, ômenyi évovo.

⁴⁰ Vane asiyeegedô émôévôa nyene nyivô.

Ebégô éaChrist na David (Bono na Matt. 22:41–46

⁴¹ Jésus ameevôa ane amadenganôni mbe: ?Nayee oma avovo mbe Christ, ône amatômu na Nzambé te muana aDavid?

⁴² Amuene David amatenda gô miganda miedi miamimbô mbe: Kumu Nzambé amavovo na Kumu ami mbe: Ewe digaa gô géeyo sami gémôgôô.

⁴³ Na me nangagudaméda adudeoe woo Aka gétukéô samakôdôme moo.

⁴⁴ Jésus angô mbe: Amuene David amateta môma nône mbe Kumu ami. ?Mbe muanedi nayee angamôénda mbe: Kumu ami?

Jésus amakeneda oma gôndé anigôi amige miaNzambé (Bono na Matt. 23:1–36 )

⁴⁵ Géômbége setso gémookô gamavovo Jésus n’aneengi edi mbe:

⁴⁶ Nôwema anigôi amige miaNzambé. Ahnyôngéô ékénga gô édénga éaô étongoni. Ahnyôngéô ékômbôu na géneega gô étungue éyeka oma. Ahsevôa édigaa éokumaka gô eba agéwanyéô sAjuif. Gô môambô te mônogovo. Ahnyôngéô édigaa va kôbangô akumu éasueti.

⁴⁷ Ahnyôngéô émana éetso éndé gô yeba yamikué. Ahvovo disambô ditongoni te gô ényepa éamiônya. Gésisédéô saô géngootéa gévôni.