LUC TSANGO EAMOSOBA EMATENDA 15 - New Testament in Mitsogo

Tsava éendombo émadimbanani na ématsutsuuni (Bono na Matt. 18:12–14 )

¹ Abongi adepu n’avo oma abévani amaviga na gôndé Jésus gôéôkô gamavovo angô.

² Apharisien, n’anigôi amige miaNzambé ahmagiangana mbe: Mômôgôô nône asinga oma abévani ahviga na gôndé angô. Aa môyakô vavo n’ane abévani.

³ Na Jésus amagunyéa ahngô tsava.

⁴ Angô mbe: Gandé anye amôgôô. Môvo andé na mandombo medi, môkama. Endombo évo édimbana. ?Mavo nzima ditenadinayi na mandombo matenamanayi asangatsika mangô gô tungu éaa mangô, akebuta éne émadimbanani-a? Abuta, abuta, ngu na vangeedengangô.

⁵ ?Veetsutsuangô angeenda nayee? Eetsua gétsôtsô na gényônga.

⁶ Vanikangô na gô mbôka, mômôgôô nône abambéa wee yedi n’akedi muetso na gô eba. Angô mbe: Aneya, tôtsôkékéni. Ene édimbanikini neetsutsui.

⁷ Jésus amatimbôanéda mbe: Te mônongovo gandé g’ôba gôndé Nzambé. ?Na môma môvo akoa môtémedi, na nzima ditenadinayi n’oma atenanayi asikoe mitéma miaô, ône amatsôkéôni indaa?

Tsava éadode dimagunyégani na dimatsutsuuni

⁸ Na Jésus amoomba mbe: Gandé anye ageto. Môvo andéké n’okitie wedi osunu ôvôvôni. ?Okô dodepo égunyégi, môgetone angeenda nayee? angatumba dambi. Angagoomboo ebee. Agoomboo, agoomboo ngu na vangatsutsuango yangô.

⁹ Vangadengangô dodene, angabambéa wee yedi n’akedi muetso mbe: Aneya, tôtsôkékéni muetso. Natsutsui ôkitie ôgunyégikini.

¹⁰ Jésus amatimbôanéda mbe: Nanôbeenda mbe asi g’ôba ayanzie aNzambé atsôkéa ti tsôkéa gôndé môma môbévani, buéyé mbe môvo akoa môtémedi gôéba wene mônongo.

Tsava éamuana amadimbanéa tétedi

¹¹ Jésus amavovo mbe: Mômôgôô amabaka n’anedi abaé amôgôô.

¹² Môdimine ameenda tétedi mbe: Téta, tubéda me mikuanyamie miami. Tétene amaakabéa mikuanyamie.

¹³ Pitsi dibaé ditatô dimoota, môdimine amasuméa te bongogo mine miedi mietso na amakea na gô tsenge étongoni. Ameenda ônyama na amabunza mikuanyamie miedi mietso.

¹⁴ Vamagôga dodeye yedi, nzaa épôni émabôka gô tsengene yangô. Amakoga môsuga na amookô nzaa.

¹⁵ Na amayanzéa môsi tsenge nene. Môsi tsenge nene amamôtômaka gôékenea ngudu yedi.

¹⁶ Gô nzaa épôni émookô angô amanyôngéô éaadô buéyé étutu émaaka nguduye. Ivô asisingéôkô gôéaa éangô.

¹⁷ Na amatanganéda amuene mbe: Gô eba atéta, buéyé ayanzie wedi angutédu na môyakô ôyekani géé me égô nawaka na nzaane.

¹⁸ Me nanganôtôga égô. Nanganika na gôndé téta. Nangamôénda mbe: Téta, me neendi mabégô mabévani va miso maNzambé na va miso moo.

¹⁹ Me tsabadô kuanakue gôétetu mbe muanoo. Singa me naba môyanzi oo.

²⁰ Na amanôtôga. Amakea na gôndé tétedi. Agéviaka gôdagôda, tétedi amamôena. Ameena angô ngeba épôni. Tétene amakumbuga na gôndé angô na amasambanéa n’edi ti na gényônga.

²¹ Muanee ône amavovo mbe: Téta, me neendi mabégô mabévani va miso maNzambé na va miso moo. Me tsabadô kuanakue gôétetu mbe muanoo.

²² Ivô tétedi amatôma ayanzie mbe: Bakani nyavô ngoyi éokumaka. Aatédani angô yangô. Aatédani angô gô môsavi modo, gô makôdô pondu.

²³ Tsôpani tabane éamôvangô na yôhani yangô. Tôaakéni na tôtsôkékéni.

²⁴ ?Nôsamenya mbe muanami ôdôô abaki mônongovo ga môma amawani na aniki gôéba na monyo-a? Amadimbanaka na atsutsugi. Na amaba na môambô ôvôni agényônga.

²⁵ Môdimine amatsiga na gô eba atétedi, te mônône andé gô madeke. Vamatsiga mônô edi gô mbôka, aka mbe amabuéa na gô eba, amookô oma atsôkéa na mimbô na miginô.

²⁶ Amabambéa môyanzine môvo gôémôévôa mbe: ?Ene éôkô me éne, vita ékegea nayee?

²⁷ Môyanzine amamônigôa mbe: Môdimine woo avigi. Gôétsôkéa gévigéôge sedi na gadôngangô, tétoo ayôhédi tabane éamôvangô.

²⁸ Vane mônône amakambôga na amakina éengéa na gô eba. Tétene amakusa gôéwanyéda angô.

²⁹ Ivô mônône amavovo na tétedi mbe: Aanakayee. Me namagôyanzéa ti mipuma miyekani. Mitômamie mioo mietso me namigobeda. N’ewe madeo ôsiitsa me ta na muana ataba mbe neenda môambô na wee yami.

³⁰ Géé gôndé muanee woo avigini ône, angô amani égunyégéda ôkitie woo wetso gôndé ageto agétôa. N’ewe, môvangôe ômatôbôngôani, éwe ômôyôhéa angô.

³¹ Tétene amamôvooto mbe: Muanami, bandôa v’ebandô ngu na deo noo ôsinôtôga n’ami. Eami éetso te éoo.

³² Ivô deo noo tôtsôkékéni na tôaakéni môambôe gôvigi môdimine woo ône. Môdimine woo ône abaki mônongovo ga môma amawani na aniki gôéba na monyo. Amadimbanaka na atsutsugi.