Jean 5 - New Testament in Mitsogo

Jésus amadôngéda môma amagégésanéa éeyo

¹ Jésus amakea na gô Jérusalem. Gô ndéô nene Ajuif amabaka na suetine éagésôga saô.

² Gô môsengee ône va kôbangô ombaa ôéndô mbe Mandombo, gôndéké gévondo gévôni gémeeba oma. Vamabaka n’eba akomu ditayi. Gévondoge géne gématetu g’ôgi aHebreu mbe Bethzatha.

³ Gô komuye dine gômayama abeeyi ayekani, asi pogu na ane avékumani, n’ane amagégésanéani. [Muetso ameenéaka mebame mapupédu.

⁴ Emabaka te nane. Môsi g’ôba amavigédu na Nzambé amasuma gô ndéô na ndéô gôépupéda mebame magévondoge. Vamapupa mebame, môbeene apanga ékuyaméa gô mangô te ône angadôngani pati yebeea.]

⁵ Wangô gômabaka mômôgôô môvo amabeea nzima ditatô na mipuma génana.

⁶ Jésus ameena mômôgôô nône andé yama. Asibômu mbe ôdôô adingi na beeagane. Amamôévôa mbe: ?Ewe, ônyôngéô édônga-a?

⁷ Môbeene amamônigôa mbe: Môékédi, me tsaba na môma gôétsua me mbe nakuyaméa gô gévondoge. Vapupa mebame, buéyé mbe nakanégéké ékea, muene apanga ékuyaméa, te me madeo tsibuéa.

⁸ Jésus amamôénda mbe: Timôga. Bongo gétavage soo. Kiaka.

⁹ Ogi yadingani, mômôgôô nône amadônga. Amavutéga gétavage na amakea. Ivô nyoone ômabaka nyee edunda.

¹⁰ Peeye yAjuif amavovo na mômôgôô nône mbe: Deo noo te nyee edunda. Osabômu mbe te môge gôndé éwe gôétsua gétava.

¹¹ Amanigôa ahngô mbe: Te ône adôngédi me, eendi mbe: Bongo gétavage soo, kiaka.

¹² Ahmamôévôa mbe: ?One agôéndi mbe: Bongo gétavage kiaka, indaa?

¹³ Ivô mômôgôône amadôngéduni asimenye ône amamôdôngédani, gôébégô Jésus amoota gô géômbége gémadenganô vangô.

¹⁴ Va mbenene vane, Jésus amadengana n’edi gô eba aNzambé. Amavovo n’edi mbe: Owema, éwe ôdôngédiô. Ombieendadô ébégô ébévani kabaga ôena éene ébégô éôtéa édagani.

¹⁵ Vane mômôgôô nône amakea gôénigôa peeye yAjuif mbe: One adôngédi me, te Jésus.

¹⁶ T’ebandô peeye yAjuif amakuanaka Jésus gômadôngédangô mômôgôô nône nyee edunda.

¹⁷ Ivô Jésus amanikéda ahngô mbe: Téta, ône andé g’ôba ayanza kuka yetso. Na me te mônongovo. Nayanza te kuka yetso.

¹⁸ Gô mavoviame mane, Ajuif amabuta gô minongo mietso gôéyôha Jésus. Ameena gôndé angô mabégô matatô. Amookuua môge anyee edunga. Na amamema mbe: Nzambé te téta. Na amabatéda amuene mbe: Wa na Nzambé tôndé ti môvo.

Enyangee éaJésus Muana ANzambé

¹⁹ Jésus amanigôa Ajuif mbe: Me nanôbeenda na gô pie mbe Muana ANzambé asoongôa éyanza gô ngudi yamuene. Ayanza te éne éenangô Tétedi éénda. Metso meenda Tétee, te mane mangeenda dôta Muanee.

²⁰ Menyani mbe Tétee anyôngéô Muanedi. Na amôtubéda metso meendangô. Angamôtubéda dôta na mavo mayanza mootéa na mane mamapanga éenanôni. Na anye nôngatsapéô ti tsapéô.

²¹ Mônongovo gakundua Tétee ane amawani, na Muanee te mônongovo. Angô eetsa monyo gôndé ane anyôngéô angô éétsa.

²² Amuene Téta aseeséda môma. Ivô ameetsa Muanedi ényangee éetso gôéeséda oma.

²³ Endé te mbe oma muetso angagobeda Muanee mônongovo gagobeda oma Tétee. One asagobeda Muanee, asagobeda na Tétene, angô môtômine aMuanee.

²⁴ Jésus amavovo mbe: One ookô mane mavovo me na eetsa môtémedi wetso na gôndé Nzambé, ône amatôma me, andé na monyo amôbô na môbô. Namani émôyuua gô môtsundu. Anôtôgi g’ôwa, aka na monyo.

²⁵ Me nanôbeenda na gô pie mbe: Gô ndéô évigani, na émani ébuéa, ane amawani angookô ôgie aMuana ANzambé. Ane angookôni, angaba na monyo.

²⁶ Menyani mbe amuene Téta te Kumu amonyo. Andé na ngudi yeetsa môma monyo, te mônongovo dôta ameetsa Muanedi ényanga eba Kumu amonyo gôéétsa môma monyo.

²⁷ Téta ameetsa Muanee ényanga gôétsundéda oma gôébégô angô te Muana Amôma.

²⁸ Nômbiatsapéô ndéône étôweseani. Te ndéône éngookô muetso ane amawani andé gô ngii, ookô ôgie aMuana ANzambé.

²⁹ Na angatimôga gôékusa gô ngii. Ane amayanza gô monyoe waô mane manyôngéô Nzambé angakunduga gôédiia wene monyo. Ane amayanza gô monyoe waô mane masanyôngéô Nzambé angakunduga gôésisédu.

Embégéa éenyanga éaJésus

³⁰ Jésus amanigôa mbe: Tsoongôa éyanza gô ngudi yamemuene. Natsundéda oma te gatévu me na Nzambé. Vane géesédéô sami géeséda me oma gésapengana gôébégô tseenda éne ényôngéô memuene. Me neenda te éne ényôngéô ône amatôma me.

³¹ Okô mbe nanigôi mane mamemuene, oma mbe angatsuma me paga.

³² One anigôa mane mami te muene na me tsabômu mbe angô asapata.

³³ Anye nômakudéga oma na gôndé Jean. ?Nôsiôkô gamavovo angô-a? Asipaté. Amanigôa te mane mapie.

³⁴ Me tsabuta môma gôénônigôa mane mamemuene. Ivô nanôpandôéda gakegea ébégôe gômbe nôngoobou.

³⁵ Jean amagono na dambi ématumbuni na étanani. Anye nômasinga étsôkéa gévedege sedi gô pesu andéô.

³⁶ Kaka Jean anganônigôa mane mandé n’ami. Jean te mbangi ivô mane mandé n’ami masakôdéa na mane medi matévo. Mayanzame meenda me te mbangi énigôa anye mônongoe wami na gamatômu me na Téta.

³⁷ Na amuene Téta ône amatôma me, te mbangi ami. Anye madeo nôsiôkô ôgie wedi na madeo nôsiena gédimôge sedi.

³⁸ N’anye nôsasinga mabégô medi meengéa gô mitéma mianyô, te gôgétsumakanye ône amatômangô paga.

³⁹ Anye nôvasa Matendeo MaNzambé, nôbuta édiia monyoe amôbô na môbô ôtasanye mbe ôndé gô mangô. Tambô mangô te mbangi énigôa gôndé me.

⁴⁰ Buéyé vane nôsanyôngéô éviga na gôndé me gôédiia monyoe apie.

⁴¹ Me tsabuta kumane ékuméda oma.

⁴² Me tsabômu mitéma mianyô. Me tsabômu mbe anye nôsanyôngéô évamba na Nzambé.

⁴³ Me namaviga gô ina a Téta, n’anye nôsanyôngéô ésinga me. Géé gôndé muene aviga gô inedi amuene, anye nômôsinga.

⁴⁴ Nônyôngéô éakuméda anyene n’anyene. Anye nôsanyôngéô ékumédu n’amuene Nzambé. ?Nôngamôétsa mitéma mianyô nayee?

⁴⁵ Kaka me nanganôsunda va mbene aTéta. One anganôsundani te Moïse, ône atanganédanye mbe tsoongone éasô te angô.

⁴⁶ Okô mbe anye nômeetsa mitémamie na gô pie na gôndé Moïse, mbe nômamiétsa dôta na gôndé me, gôébégô Moïse te épo mbangi émanigôa mane mami.

⁴⁷ Ivô anye nôtsuma matendeo maMoïse paga. ?Tambô nôngookô mavovia mami nayee?