Jean 4 - New Testament in Mitsogo

Jésus na môgetone agô Samarie

¹ Apharisien amookô tsangô mbe: Aneengie ameetsô na Jésus bateme ôtangôe waô ôôtéa ône ômabatésu na Jean.

² (Ivô ésibaké mbe Jésus amuene ameetsa oma bateme, te aneengie wedi amabatésa oma.)

³ Vamookô Jésus oma avovo nane, amanôtôga gô tsenge éaJudée gôénika na gô tsenge éaGalilée.

⁴ Vamakeangô amakitsangana tsengene éaSamarie.

⁵ Amabuéa v’etumba éambôka éagô Samarie ééndô mbe Sychar. Mbôka nene émabambana na tsaga émeetsô Joseph na tétedi Jacob.

⁶ Gô étumba éambôka te gétôka gémasiga Jacob. Vamagogo Jésus na môtôôe amadigaa va kôbangô agétôkage. Kômbéne émabaka te ématsakama.

⁷ Môgeto môvo môsi Samarie amaviga na gô gétôka gôébuéta meba. Jésus amavovo n’edi mbe: Itsa me meba, nanyua.

⁸ (Aneengie aJésus te amakea na gô mbôka gôésômba môyakô.)

⁹ Môgetone agô Samarie amatsapéô na ameevôa Jésus mbe: ?Ewe, kaka Môjuif-a? ?Oduka me meba nayee me Môsamaritain? (Emabaka te nane. Ajuif asibé n’evamba n’Asamaritain.)

¹⁰ Jésus amamônigôa mbe: Mbe ômenyiki éne éndé na Nzambé gôégôétsa, na mbe ômenyiki ône agôduki meba manyuakaga, éwe mbe te ômôdukini. Angô mbe te agôétsi meba meetsa monyo.

¹¹ Môgetone amatsapéô mbe: Ah Môékédi, éwe gébé na môdômbô ?ôseena gatiba édukue ébuétu meba? ?Ongabuéta mebame meetsa monyo nayee?

¹² Tétasô Jacob amatsikéa we gétôka gegé. Amuene amanyua gô sangô. Anedi na ébodue yedi amabuétéôkô mebame te gô sangô. ?Omenya mbe éwe te ôôtéa pene éasô Jacob-ma?

¹³ Jésus amasupua angô mbe: Oeni, muetso ane anyua meba magétôka gegé, angoomba éôkô sôé.

¹⁴ One anganyua meba mangamôétsa me, asangoombadô éôkô sôé. Na mebame mangamôétsa me mangakoga gôndé angô gétôka gébunduga wene monyo, ône amôbô na môbô.

¹⁵ Vane môgetone amamôduka mbe: Môékédi, itsa me mebame mane, kabaga nookôdô sôé na kabaga navigadô gôébuéta meba éva.

¹⁶ Jésus amatôma môgetone mbe: Kiaka, ôkebambéa mômioo, nôviga muetso abaé.

¹⁷ Môgetone amamôaabéa mbe: Me tsaba na mômôgôô. Jésus angô mbe: Ondé na mitayi gôévovo mbe: Me tsaba na mômôgôô.

¹⁸ Omamana ébaaô n’amôgôô atayi. Na ône andéké n’ewe deo noo kaka mômioo. Osipata.

¹⁹ Môgetone amavovo na Jésus mbe: Môékédi, vavovo éwe vane, me tsabômu mbe éwe te môpandôédi amatasa maNzambé.

²⁰ We Asamaritain, peeye yasô amaneegedaka Nzambé gô ngongo amôkôdie ôdôô. Géé anye Ajuif nôénda mbe Nzambé aneegedu te gô môsenge aJérusalem.

²¹ Jésus angô mbe: Môgeto noo, ôôkô éne évovo me. Gô ndéô évigani éne énganeegadanye Téta, kaka gô môkôdie ôdôô. Kaka dôta gô Jérusalem.

²² Anye Asamaritain, nôsamenya ône aneegedanye. We Ajuif tôsabômu ône aneegeda we gôébégô géobogeoge soma muetso géviga te gôndé Ajuif.

²³ Gô ndéône évigani, na yangô émani éviga, Gédidi SaNzambé géétsa oma ngudi yeneegeda Nzambé, ône aseenanôni, angô kumune amabégô mapie. Nzambé anyôngéô aneegedie apie amôneegeda nane, pati tungu.

²⁴ Nzambé te Gédidi. Te ôtômu mbe môma awedéô na Gédidige géne gôéneegeda Nzambé gô mabégô medi mapie.

²⁵ Môgetone amavovo na Jésus mbe: Me tsabômu mbe Messie angaviga. (Evéndégéô mbe Christ, ône amasevou na Nzambé.) Vangavigangô angatôpandôéda metso.

²⁶ Jésus amamema mbe: Te me navovoni ôdôô.

²⁷ Tsina na tsina aneengi aJésus amaviga gô mbôka na amadenga Jésus andé gôévovo na môgeto nône. Ahmatsapéô gamamôdengahngô nane. Ivô ahsiyeege émôévôa mbe: ?Ene évovo éwe n’edi, yéndé? ?Vo ôvovo n’edi nayee?

²⁸ Môgeto nône amatsika kiekiene yedi émabuétakangô mebame na amanika na gô mbôka. Amanigôa asi gô mbôka mbe:

²⁹ Vigani, nôviena mômane adengi me. Amapandôéda me metso meenda me. Mavooe te ône avéngéôni, ône eendô mbe Christ.

³⁰ Oma ayekani amatimôga gô mbôka gôékea na gôndé Jésus.

³¹ Vamakea môgeto nône, aneengie amavooto Jésus mbe: Môékédi, ôeni môyakôe, aaka.

³² Jésus amavovo n’ahngô mbe: Me nandé na môyakô ôsamenyanye.

³³ Aneengie ameevôana anguene mbe: ?Gô ngimasô gôvigiki môma gôémôétsa môyakô-a?

³⁴ Jésus amanigôa ahngô mbe: Môyakôe wami te gôégobeda ône amatôma me. Môyakôé wami dôta te gôémana éyanza ématômu me n’edi.

³⁵ Me tsabômu gavovo anye mbe: Gôgébaka ngonde dinayi, vane tôngakôkéga éne émagaabôkôni. Tambô, anye nôsamenya. Oôkôni gavovo me mbe setani éne émagaabôni. Mbôtône émani éoodo. Ndéône éekôkéga yangô ébuéyi.

³⁶ One ayanza gôékôkéga na gôéengéda éne émagaabôkôni adiia môvanô. Agono na ône andé gôéweseda oma na gô monyo amôbô na môbô. Vane môgabine, na môkôkégine angatsôkéa muetso abaé gényônga gévo.

³⁷ Peeye yasô asibômu gamavovo ahngô mbe: Môgabine agaaba na môvo akôkéga.

³⁸ Namatôma anye gôékôkéga gô tsaga ésitsogé anye n’egaaba. Akanyô amamigaaba, n’anye nôdiia gô éyanzee yaô.

³⁹ Asamaritain ayekani, asi mbôkepo na môgeto nône, ameetsa Jésus mitéma miaô. Asitsumé Jésus paga gôébégô môgetone ameenda mbe: Môma nône apandôédi metso meenda me.

⁴⁰ Anguene Asamaritain amasikéga Jésus mbe: Ombiakea. Tôdigaa te éva. Na Jésus amadigaa n’angô pitsi dibaé.

⁴¹ Gô mane mameekéda Jésus, ayekani amamôétsa mitéma miaô.

⁴² Ahmavovo na môgeto nône mbe: Oeni we égô, tôétsi mitémamie, kaka gô mane mavovi éwe matévo, ivô te gô mane mookiô wéene. Tônigôéyiô na gô pie mbe angô te Mooboyi oma muetso.

Jésus amadôngéda muana amôma môvôni okumaka

⁴³ Vameeboga Jésus pitsi dibaé gô Samarie amoota na gô Galilée.

⁴⁴ Endé te gamanigôa Jésus amuene mbe: Môpandôédi amatasa maNzambé asagobedu gô tsenge edi, buétsé te gô yaanga tsenge.

⁴⁵ Vamatsigangô gô Galilée, asi tsengene amamôtsôkéa. Anguene amadenganô gô Jérusalem gô ndéône éasueti éaPâque, na ahmeena mane mameenda Jésus gô pitsiye yasueti.

⁴⁶ Jésus amatsiga gô Cana. Te mbôkane émakoangô mebame maka maduku gô ndéône éasueti éayômba. Wangô gômabaka môma môvôni okumaka, môtômi atsenge. Muanedi amômôgôô amabaka na beeaga gô mbôka ééndô mbe Capernaüm.

⁴⁷ Mômôgôô nône amookô mbe Jésus anôtôgi gô tsenge éaJudée aka gô Galilée. Amakea gôémôgondo mbe: Kokoo yewe, ôka na gô Capernaüm, ôkedôngéda muanee wami. Atsikanéda ti tsikanéda gôéwa.

⁴⁸ Jésus amavovo n’edi mbe: Anye nômakaaô na paga géôngôé éétsa me mitémamie mianyô buétsé te nôpanga éena émbégéa étsapanéôni na mane mamisôba mayanza me gôétubéda ngudi yami.

⁴⁹ Môtômine amabambéa Jésus mbe: Môékédi, ôka na me na gô ebami, muanee wami madeo asiwa.

⁵⁰ Jésus amamôaabéa mbe: Kiaka na gô eboo. Muanee adôngi. Mômôgôô nône asitsumé ôgi aJésus paga na amakea.

⁵¹ Agébaka gô nzéa madeo asibuéa gô ebedi, amawanya n’ayanzi edi. Ahngô mbe: Muanee woo adôngi.

⁵² Mômôgôô nône ameevôa ayanzie mbe: ?Muanee ami abandôi étugugéô ndéô ndé? Ayanzie angô mbe: Adôngi nzônzônzône kôdôtsé gô ndéône éténgami kômbéne.

⁵³ Vane môtômine, tétene amuanee amabangôa mbe: Kôdôtsé vaténgami kômbéne, te ndéône évovi Jésus mbe: Muanee adôngi. Mômôgôô nône môvôni môtômi atsenge, na mbumu éedi muetso ameetsa Jésus mitéma miaô gémôtsumé paga.

⁵⁴ Vamadôngéda Jésus muanee, te ébégô éamôbaé évoni émanyônganéôni na ésoongôa môma énigôa émayanzangô vamavigangô gô Judée na gô Galilée.