I Pierre 4 - New Testament in Mitsogo

Midigédi mioma ahmakoamani

¹ Christ ameena maguga g’ôtô, tambô n’anye dôta oodedani mitéma mianyô étasevo n’edi gôébibéda maguga. Gôébégô ône abibéda maguga g’ôtô aseena panda étsika mabégô mabévani.

² Bandôa deo noo môma nône asadigaa gô manyima mamôtéma ômabôtu na ôtô amôma. Ivô gô ndéône égébakangô va tsina adigaa ganyôngéô Nzambé.

³ Kôdéanidô. Tsikani ésima émayanzanye gô ndéô dimootani. Te ésima éoma ahsavamba na Nzambé. Nômayanza gébunzénge gô manyima mabévani, na madangi, na miambô na mbaga, n’egobeda éambumba diôtéa ébévani.

⁴ Akanyô ahndé gô mabégô mabévani deo noo ahtsapéô gôébégô nôsagésangana n’ahngô gô mane mabévani mameendanye n’ahngô va mbeego. Na ahngô ahnôbuanya.

⁵ Anguene ahnganigôa mane maô metso vandé môtsundédi ane adôngani n’ane amawani.

⁶ T’ebandô Christ ameekéda Tsangô Eamôsôba gôndé oma amawani, vane vangamanahngô étsundédu na Nzambé gatsundédu muetso gô mane mameendahngô ahdônga, édidi éaô éngadiia monyo gasabômu amuene Nzambé.

Yanzédani gôndé akanyô migôô mimeetsô anye na Nzambé

⁷ Ekôdéô éamabégô metso ésangaamba ébuéa. Bakani n’ekena. Bakani na tsambu éamabégô gômbe nôngaba na môvinéné g’ôsambô.

⁸ Nas’ediiaka mabégô metso pángani ényônganéô anyene n’anyene ti v’ekôdéô éenyônganéô. Gôébégô étondo épika mabégô mayekani mabévani.

⁹ Bakani na géenza na sekaseka gôékenea oma gô yeba yanyô. Nômbiaba na migianganô na misésu.

¹⁰ Buedi mbe môma na môma ayanzédé n’ekena migôô mimeetsô angô na Nzambé ôbiia. Adôngédé akedi na miangô.

¹¹ One asabômu évovoni, anigôé akedi meekédu maNzambé. One asabômu éyanza na mogo medi ayanzé akedi gô ngudi yaNzambé. Gômbe gô mabégô metso kumane éngabata na gôndé Nzambé gô ina aJésus‐Christ. Ondômba na ôkumaka na ngudi dindé gôndé Jésus‐Christ gô môbô na môbô. Amen.

Oma aChrist eena panda

¹² Anami amôtéma, nônatsapéô gôébégô éapanda dibuéa na gôndé anye gôénôkanéga mônongo gasoto gékoa madi. Nônatasa mbe: Panda yedi diena te memuene môtévo.

¹³ Eébéyée nane tsôkéakani g’ôkabô ômadiia anye gô maguga mameena Christ. Mônongovo gangatsôkéanye na gényônga gémootéani vangatsutsuga ôbébayi ôtubéda ôndômba aJésus.

¹⁴ Tsôkéakani. Eenani gényônga ôkô môma anôtoko gôndé anye oma aChrist. Gôébégô Gédidi géndéké n’anyô te géne sondômba aNzambé.

¹⁵ Va gatse anyô nômbiadenganô ta na môma môvo atubédu maguga mbe muisui, mbe môsi môkôbé, mbe môma môbévani, môsi ngusu, mbe môma eengéa gô maanga mabégô mavovu angô gébaakésu.

¹⁶ Okô môma atubédu maguga gôébégô andé môma aJésus, nômbiôkô tsoyi ivô neegedani Nzambé gômeetsô anye ina aJésus‐Christ.

¹⁷ Géyénza gébuéyi, géne gébandôa môtsundu. Oma aNzambé to angô apanga étsundédu na Nzambé. Okô môtsundu ôbandôi na wa n’anyô oma aNzambé ?ékôdéô éamôtsundue gôndé ane akina Tsangô Eamôsôba éviga gôndé Nzambé éngaba nayee?

¹⁸ Matendeo MaNzambé matônigôa mbe: Okô mbe ébégô édagani gôndé môma amatsimamani gôéobou na Nzambé ?Tambô gôndé oma adibagaa na oma abévani éngaba nayee?

¹⁹ Te nane, muetso ahsindéa maguga gasinga Nzambé gôndé môma na môma, ayanzéké mamisôba. Ahdeekede mitéma miaô gôndé Nzambé môvangi asô n’anyô aseeba divanga yedi.