I Corinthiens 7 - New Testament in Mitsogo

Mabégô mayômba

¹ Gésangô gématendéa anye me nômeevôa me nyivô gôébégô éayômba. Me Paul naabéa nyivô éanyô mbe: Ii, éndé te amôsôba gôndé mômôgôô gôédigaa gépaga.

² Ivô kabaga mômôgôô aba na gésima sekea gésasô buedi mbe mômôgôô muetso abaké na môgayedi na môgeto muetso abaké na mômiedi.

³ Buedi mbe mômôgôône asakina éne éôkô môgayedi tsôvé éamôgeto na mômôgôô. Na gôndé môgetone te mônongovo. Asakina éne éduka mômiedi.

⁴ Môgetone asoongôa éyanza na ôtô edi éne ényôngéô angô amuene. Otô edi te amômiedi. Na mômôgôône te mônongovo. Asoongôa éyanza na ôtô edi éne ényôngéô angô amuene. Otôe edi te amôgayedi.

⁵ Nômbiakinana anyene n’anyene. Buétsé te nôvanga anyene abaé g’ôtangô apitsi mbe: Tsanyôngéô éyungédu na mane matasa nandé gôévovo na Nzambé pitsi yedi. Na va mbene ene nikéani égésangana kabaga nôsoongôa ébibéda na kabaga nôkuéa gô éne éngakanégu anye na Satan.

⁶ Metso manôbeendi me, kaka môtôma ivô dindé ndongi.

⁷ Ti gôndé me, nanyôngéô mbe oma muetso abaké gandé me. Ivô tsabômu mbe môma na môma na wedi môgôô ômeetsô angô na Nzambé. Oô wedi, ôô dôta wedi.

⁸ Oôkôni ndongi diétsa me épaga na mikué. Eôtéa buedi gôndé anye gôédigaa g’ôpaga gadigaa me.

⁹ Ivô ôkô nôsiôngôa ébibéda édigaa g’ôpaga tambô baani, na baaôkoni. Okô mbe édaga gôédigaa g’ôpaga na tsôvé dipôni diyôéda ôtô ga soto, buedi mbe gépaga gébaa na gébaaô.

¹⁰ Gôndé anye oma aChrist nômabaani na nômabaaôni ôôkôni môtômee ôdôô. (Kaka me nanôtôma angô ivô te amuene Kumu.) Môtômee te mbe, môgeto amabaaôni asanôtôga gôndé mômiedi.

¹¹ Na mômôgôône dôta asapatsa môgayedi. Okô môgetone anôtôgi gôndé mômiedi asoombadô ébaaô na muene ivô buedi mbe aniké na gôndé mômiedi.

¹² Anye avo, ôôkôni édué. (Kaka Kumu anôétsa ndongi yedi, ivô te me Paul nanôongôni.) Okô mômôgôône andé môma aChrist na môgayedi asavamba na Nzambé, na angô adigaa na gétabé na mômiedi môma aChrist, buedi mbe mômôgôône asapatsa môgayedi.

¹³ Na gôndé môgeto te mônongovo. Andé môma aChrist na mômiedi asavamba na Nzambé na angô adigaa na gétabé na môgayedi ône andé môma aChrist. Buedi mbe môgetone abaké gékiné mômiedi.

¹⁴ Ekegea te nane. Mômôgôône asivambé na Jésus awesedu na gôndé Nzambé gôétsimamédu n’edi gô vitoone éndé angô na môgayedi, môma aChrist. Na môgetone asivambé na Nzambé awesedu na gôndé Nzambé gôétsimamédu n’edi te gô vitoone éndé angô na mômiedi, môma aChrist. Mbeka mbe nane anaô mbe andé gôdagôda na Nzambé, tambô na anaô andé atsimamédu na Nzambé.

¹⁵ Na gôndéké yene ébégô. Okô môgetone asisingé Jésus anyôngéô ékina mômiedi tsangô mbe angô môma aChrist, akinéké. Na mômôgôône asaba n’oési mbe amayôha yômba. Okô mômôgôô asisingé Jésus anyôngéô épatsa môgayedi tsangô mbe angô môma aChrist, apatséké. Na môgetone asaba n’oési mbe amayôha yômba. Nzambé amasevoa anye oma aChrist mbe nôdigaa gô gétabé.

¹⁶ Môgeto, éwe môma aChrist nagôbeenda mbe tôsamenya mavooe mômioo asangasinga Jésus buéyé mbe éwe ôkina vapatsô éwe n’edi. Na éwe mômôgôô môma aChrist, nagôbeenda mbe tôsamenya mavooe môgayoo asangasinga Jésus buéyé mbe éwe ôsasinga vakinô éwe n’edi.

Digaakani gamabakanye vamabambéô anye na Nzambé v’ebandô

¹⁷ Gamadigaanye vamabambéô anye na Kumu Nzambé na môgôô ômadenganô n’anye, digaakani te nane. Ene ébeendi me anye te môtôma ôtôma me gô étungue éetso éndé mbumu éaNzambé.

¹⁸ Tôkanéga te n’edué. Okô mômôgôô andé amageetuni vabambéô angô na Nzambé gôémôsinga, asangoongôa étôna mbe: tsigeetu gô gémbégéa sAjuif. Adigéké gadenganiô angô. Okô mômôgôô andé gégeetu vabambéô angô na Nzambé gôémôsinga, asabuta égeetu gô gémbégéa sAjuif. Adigéké gadenganiô angô.

¹⁹ Ogeetuye, ôsageetuyee ésaba ébégô. Ene éndéké ébégô évôni te gôégobeda mitôma miaNzambé.

²⁰ Buedi mbe môma na môma adigéké gô éne édanganiô n’edi vamabambéô angô na Nzambé gôékea n’edi nzéepo.

²¹ Mavooe vamabambéô éwe na Nzambé ômabaka môvéga. Ombiakébangana mbe: ?Tambô tsangakusadô g’ôvéga‐a? ?Nangaba môbo te nane‐a? Aé, kaka nane. Okô môma aviga gôéoboo éwe te buedi gôékusa.

²² Endé te nane. Môvéga amabambéô na Kumu Jésus gôékea n’edi nzéepo, aka môma amanzeegeduni na monyo edi te gôndé Kumu edi Jésus. Mônongovo dôta ône asibaké môvéga amabambéô na Kumu Jésus aka te môvéga akôô aKumu edi Jésus.

²³ Nzambé amavana anye n’osunu ôvôni. Nômbiasingana na mane mayanza oma kabaga nôkoga avéga aô.

²⁴ Ana aTéta n’ami buedi mbe môma na môma adigéké va mbene aNzambé gô éne édenganiô angô vabambéô angô na Nzambé gôémôsinga.

Mabégô mepaga na mamikué

²⁵ Gôébégô éepaga tsiitsô môtôma na Kumu Jésus ivô navovo éva te gô matasa mamemuene Paul. Gô ngudi yangeba yaKumu Jésus ndongiye diitsa me anye édi dindé kuanakue mbe môma eetsé môtémedi gô yangô.

²⁶ Gôébégô éapanda dienanô pitsi yedi, ôôkôni étasee éami. Te buedi gôndé mômôgôô gôédigaa gandé angô.

²⁷ ?Ondé na môgayoo? Tambô ômbiasinga éaagana n’edi. ?Osibéé môgetô? Tambô ômbiabuta môgeto.

²⁸ Buéyé mbe nane, gôébaa môgeto kaka ébégô ébévani. Na gôndé tômbô te mônongovo vabaaô angô kaka ébégô ébévani. Ivô menyani mbe ane abaani na abaaôni eena ti maguga pitsi yetso. Nanyôngéô énôgôngéda gô magugame mane.

²⁹ Oôkôni éne énônigôa me ane aTéta agô mbumu éaNzambé. Gôndé wa n’anyô tôsaba na pitsi diyekani, gôsanéa te pesu andéô. Tambô bandôa deo noo, ane amabaani ayanzéké gandé ane asibaéni.

³⁰ Ane adéani eendéké gaasaba na gégeba. Ane asekani eendéké gaasaba na gényônga. Ane asômbani adigé gaasisômba.

³¹ Ane ayanzéda ôkiti atsengene abaké gaasayanzéda angô. Gôébégô tsengene na éetso éndé wangô éndé éotaga na ésangadinga pitsi diyekani.

³² Me Paul nanôongô mbe gô mane meenanôni na mane mabandôni makebangana môma, bakani ga môma amapaba gésengo samane matsengene. Tôsabômu gandé môma. Mômôgôô asibeeni abuta éénda éne ényôngéô Kumu Jésus na matasa medi metso mandéké te gôéyanzéa Kumu edi.

³³ Géé ône amabaani, matasa medi metso mandé gôéyanzéa mabégô mamonyo atsengene, na abuta éénda éne ényôngéô môgayedi.

³⁴ Andé ga môma ayanzéa kumu diabaé. Te mônongovo gôndé môgeto asibaaôni na gôndé tômbô anyôngéô éyanzéa Kumu Jésus. Môgeto nône te aNzambé, ôtô edi wetso na gédidi sedi setso. Géé ône amabaaôni, matasa medi metso mandé gôéyanzéa mabégô mamonyo atsengene na abuta éénda éne ényôngéô mômiedi.

³⁵ Nanônigôa mabégô mema, kaka gôénôdagéda midigédi, ivô nanôsuméda mitémamie mbe minongomie mietso mibaé minyepa. Nanyôngéô mbe anye nôdigaa gô mônongoe ône ônganyepa gôndé anye, môma na môma abaké môtémovo na Kumu Jésus na ayanzéké angô.

³⁶ Tôôta na gô évo ébégô. Okô mômôgôô asoongo môgeto na asinga mbe: tôbaana. Na vane mômôgôône, matasa medi metso mandéké gôndé môgetone na asangoongôa ébibéda édigaa gébé na môgeto, buedi mbe angô abaé abaané. Ene ésabéva.

³⁷ Ivô ôkô mômôgôône asidékédu mbe: ômbiabaa, na avanga amuene mbe: Tsangabaa. Na angô andé na ngudi gôébibéda édigaa gébé na môgeto, buedi mbe abaké gébaaé.

³⁸ Vane tôena mbe ône abaa môgeto anyôngéô angô, eenda te éamôsôba, ivô ône asabaa môgetone eenda éne éôtéa éamôsôba.

³⁹ Môgetone amabaaôni adigé gô yômba na mômiedi ngu na g’ôwedi. Okô mômiedi awéyi andé amatsikôni. Andé na ngudi gôébaaô na muene mômôgôô. Buedi mbe ône amôbeeni abaké môma aChrist.

⁴⁰ Buéyé vane namenya mbe môgeto nône angootéa na gétabé gôédiga amuene. Ene te étasa éami gôébégô Gédidi SaNzambé géndéké n’ami.