I Corinthiens 3 - New Testament in Mitsogo

Ayanzi aNzambé

¹ Na gô pie ana aTéta asi mbumu éaNzambé, me Paul tsiôngôé évovo n’anye gandé oma ahndé na Gédidi SaNzambé gô mitéma miaô. Ti anye gôsiôkô anye tambô navovo n’anye ga oma abôtu gô tsengene. Navovo n’anye nôndé g’anéngé avembo abôtiô na Christ madeo asiditéga mane meetsi ahngô mitémamie.

² Ti anye gôsiôkô anye tsiôngôé énôétsa môyakô ga môma andé na minô, ivô namanôétsa te ôbuba geetsô muana av’ebene asoongôa étaguna môyakô. Ngu na deo noo anye nôndé te mônongovo géôngôé éaa môyakô.

³ Endé te nane gôébégô anye nôgédigaaka gadigaa oma atsengene ahsavamba na Nzambé. Gô ngusune eendanye na gô masaganédame meendanye nôtubéda mbe, tôndé oma atsengene na tôénda mônongovo geenda oma muetso, ane ahsavamba na Nzambé. ?Ene te kuanakue‐a?

⁴ Môvo va gatse anye avovo mbe: Me te géômbé saPaul. Môvo dôta mbe: Me te géômbé sApollos. ?Veendanye nane kaka masaganédana moma asavamba na Nzambé‐a?

⁵ Beendani me ?ône atetu mbe Apollos indaa? ?Na ône atetu mbe Paul indaa? ?Apollos na Paul kaka ayanzi aNzambé‐a? We tôndé ti ayanzi aNzambé na gô ngudi yameekédume mamanôékéda we, anye nômagésangana môtémovo na Nzambé. We eekédi tômayanza te éne émeetsô we na Kumu gôéyanza.

⁶ Me Paul namagaaba mibiemie gô tsina. Apollos amamiitéa meba. Nzambé amuene amamikandéda.

⁷ Vane tôeni mbe ône agaabani na ône eetéa meba asaba n’ebégô. One andé n’ebégô te Nzambé, amuene môkandédine.

⁸ One agaabani na ône eetéa meba andé te mônongovo. Nzambé angeetsa ahngô môsenda kuanakue na éne émayanzahngô.

⁹ Gô tsaga éaNzambé we eekédi tôyanza évévé. Anye asi mbumu éaNzambé te tsaga éaNzambé éyanza we eekédi. N’anye nôndéké dôta te eba ôsaa Nzambé.

¹⁰ Gô ngudi yagésooge gémeetsô me na Nzambé namayanza ga môseedi eba gôésiga ôbôgee ôngatema ebee. N’atsatsee gôvigi muene avigi gôébatéda pogogoye. Buedi mbe môma na môma abaké n’ekena vasaa angô pogogone yedi.

¹¹ Obôgee ômamana ésiigô. Obôgee te amuene Jésus‐Christ. Gôsaba wene ôngayanzô na môma.

¹² Avo ayanza eba gô ngongo obôgee asaa eba na dodo na muanga osônu ôvôni, na mataé magéneemba mosunu ôvôni. Avô dôta asaa na péndé na yeko na kônza.

¹³ Mônongo na mônongo eyanza ôngeenanô gô nyee amôtsundu ôngatsutsuu mabégô metso. Endé te nane. Nyaa amôtsundu te nyaa asoto gékanéga éyanza éamôma na môma mbe éndé na tsoongo.

¹⁴ One amasaa gô ngongo obôgee eba ôkina soto, angadiia môsenda.

¹⁵ Géé ône asimenya ésaa na ebee ôngayôa, asangadiia sôma. Kôndi nane amuene angoobou, ivô amanikidô te éyôa te angô yuéga va gatse asotoge.

¹⁶ Anye nôsabômu mbe anye te eba aNzambé. Gédidi sedi gédigaa gô mitéma mianyô.

¹⁷ Menyani mbe ôkô môma abunzéda ebee aNzambé ône, na Nzambé angamôbunza. Gôébégô eba aNzambé ôndé ômatsimamani na te anye nôndéké ebedi.

¹⁸ Nôkenea kabaga môma abômu amuene. Okô môvo va gatse anye amenya mbe andé n’eodo gakegea éodo éatsengene asugédé amuene mbe: tsaba n’eodo, na vane angadiia éodo éapie.

¹⁹ Gôébégô éodo éatsenge nedué éndé ti éogiô va mbene aNzambé. Endé te mônongovo gatônigôu na Matendeo MaNzambé mbe: Nzambé akubéda oma eodo gô pagôye dimatambéa ahngô gôékubéda akaô.

²⁰ Matendeo MaNzambé matônigôa dôta mbe: Kumu asabômu mbe matasa masi éodo masaba na tsoongo.

²¹ Endé te nane. Nômbianyemôga gô mane masô n’anyô oma. Na gô pie, éetso te éasô n’anyô.

²² Na Paul, n’Apollos, na Pierre, na tsinane, na monyo, n’owa, na mane madeo noo, na mane magô mbene n’okendo, éetso te éasô n’anyô.

²³ Na wa n’anyô tôndé te aChrist. Na Christ te aNzambé.