I Corinthiens 11 - New Testament in Mitsogo

¹ Indani tsingayi gô éne éénda me, mônongovo geenda me tsingayi gô mabégô mameenda Christ.

Agetoe aatakani mibôtô vakeanye na gô eba aNzambé

² Me Paul nanôsénga ôséngu gôébégô anye nôgobeda me gô minongo mietso na gôékenea ndongi diongô me anye.

³ Buéyé nane nanyôngéô mbe anye nôôkô édué. Jésus‐Christ ébandô na te môtômi oma muetso. Na mômôgôô te môtômi amogayedi. Na Nzambé dôta te môtômine aChrist.

⁴ Menyani mbe ôkô mômôgôô avovo na Nzambé vo apandôéda ndongi dimeetsô angô na Nzambé gôévovo gô géwanyéô, andé na sôme gudéga gô môtsé edi asaditéda Christ.

⁵ Ivô gôndé môgeto andé gôévovo na Nzambé vo gôépandôéda ndongi dimeetsô angô na Nzambé gô géwanyéô, angô gébé na soma gudéga gô môtsé, asaditéda mômiedi. Andé ga môgeto amatsubuu môgôngô.

⁶ Okô môgeto asaata môbôtô gô môtsé andé te ga amakitsa tsôgéye. Okô mbe te ébégô éatsoyi gôndé môgeto gôéba na môtsé ômatsubuuni, vo na tsôgé dimakitsôni, tambô na gôédigaa na môtsé ôsiaatédu sôma te tsoyi. Buedi mbe aata sôma gô môtsé.

⁷ Gôndé mômôgôô ésaba nane. Mômôgôô asaatéda môtsé edi sôma. Ondômbee aNzambé ôenanô gôndé mômôgôô amavangangô. Na ôndômbee amômôgôô ôenanô gôndé môgeto.

⁸ Endé te nane. Mômôgôône amapanga asivangô n’obanza amôgeto ivô môgeto te amavangô n’obanza amômôgôô.

⁹ Na mômôgôô asivangô gôndé môgeto ivô te môgeto amavangô gôndé mômôgôô.

¹⁰ T’ebandô môgeto aata môbôtô gô môtsé edi te gémbégéa gétubéda mbe andé n’enyanga gôégobeda na mbe asi g’ôba ayanzie aNzambé angatsôkéa.

¹¹ Buéyé mbe nane, gôdigaa wa n’anyô môvo na Kumu Jésus‐Christ, môgeto asadônga gébé na mômôgôô, na mômôgôô asadônga gébé na môgeto.

¹² Gôébégô môgetone amapanga amakusa gôndé mômôgôô. Na amôgôô abôtu te na môgeto. Na muetso aviga te gôndé Nzambé.

¹³ Anye nôôkô gavovo me ivô tasani anyene. Okô môgeto avovo na Nzambé gô géwanyéô géaaté môbôtô gô môtsé ?te éamôsôba‐a?

¹⁴ Gabôtu wa n’anyô oma, tôsabômu mbe te tsoyi gôndé mômôgôô gôédigaa na tsôgé ditongoni.

¹⁵ Ivô gôndé môgeto te égobeda gôéba na tsôgé ditongoni. Endé te nane. Tsôgé ditongoni dimeetsô môgeto te gépôkôdô sedi.

¹⁶ Gôndé ane anyôngéô étsumana paga gô ébégô édué, apangé éôkô édué. Gôndé wa n’anyô asi mbumu éaNzambé, édué kaka môtôma, ivô te mônongoe asô n’anyô gô eba aNzambé.

Tabudé éaKumu Jésus (Bono na Matt. 26:26–29 )

¹⁷ Eva tôka gô mene mabégô na gô mangô tsoongôa énôkuméda gôébégô éwanyéô édigaa anye ésaba éamisôba.

¹⁸ Me Paul namabeendu mbe vawanyanye asi mbumu éaNzambé, nôndé éômbé épenganani nôsaba n’evamba. Namenya mbe te na gô pie éndé te nane.

¹⁹ Buétsé vandé tatô va gatse anyô te gôémenyanganô ane andé na vitoo na Nzambé.

²⁰ Vaduganye vavo menyani mbe éne ééndanye, kaka tabudé émeetsa Kumu wa n’anyô.

²¹ Ivô nôénda eembe nôndé va tabudé yanyene. Môma na môma akumbuga gôébongo môyakô gôéaa n’enguta. Avo asadugu môyakô na meba. Avo dôta nônyua n’edangi.

²² ?Tambô anye nôsaba na yeba yanyô gôéaa na gôényua ganyôngéô anye‐a? ?Nôbuta ébévéda mbumu éaNzambé‐a? ?Nônyôngéô étubéda tsoyi gôndé ane adônga te gô ngudi yambumu éaNzambé‐a? ?Gô mônongoe ôéndanye ône nangavovo n’anye vita mbe ndé? ?Nônyôngéô me nanôkuméda‐a? Tsangoongôa énôkuméda.

²³ Aanakani meekédume mameetsô me na Kumu. Na me nanôtsuéa mangô. Gô pitsine émakabô Kumu asô n’anyô Jésus amabongo môpemba.

²⁴ Vamamanangô ékuméda Nzambé gô angô amoobukua. Amavovo n’aneengi edi mbe: Odôô te ôtôe wami ômakitsôni ôbukuu gôndé anye. Indakani nane gôébangôa me.

²⁵ Vamamanahngô éaa, Jésus amabongo dôta gébunguge. Angô mbe: Gébunguge egé te gémbégéage gétubéda évamba éamanza éawene mônongo anzina yami divambéda oma na Nzambé. Kuka yetso dinganyuakanye sangô, indakani gôébangôa me.

²⁶ Endé te nane ane aTéta. Ngu na vangaviga Kumu Jésus wa n’anyô tôndé gôéaa môpembee ôdôô na tôndé gôényua gébunguge egé. Vatôaani na vatônyuani, tôndé gôénigôa ôwedi ômawaangô gôndé oma.

²⁷ T’ebandô ôkô môma aa môpemba na anyua gébungu gémeetsa Kumu Jésus, angô gébé kuanakue va mbene aKumu, andé n’oési ôvôni na eenza ôtô na nzina yaKumu Jésus.

²⁸ Buedi mbe môma na môma avasé gô môtémedi gôéeséda amuene na vane aaké môpembee na anyuaké gébunguge.

²⁹ Okô môma aa môpembee ôdôô na anyua gébunguge egé n’osôbedi gébé n’evamba n’otô aKumu, aduta géesédéô na gôndé amuene gôyeeyi angô.

³⁰ Te gô ébégôe éne ayekani va gatse anyô nôbeea na nôsaba gétabé na ayekani awaani.

³¹ Okô wa n’anyô tôpanga eeséda wéene tôsangatsundédu na tôsangeetsô tsôgôô na Nzambé.

³² Tônyôngéô étsundédu na tôétsô ôési na Kumu te ndéô nedué kabaga tôesédu kukepo n’asi tsengene gô ndéône yaô.

³³ Te nane ana aTéta, vaduganye tungu épo gôéaa môyakô ômeetsa Kumu Jésus, eenanéani anye muetso.

³⁴ One ôôkô nzaa apangé éaa gô ebedi, kabaga nôkôva géesédéô saNzambé gô éne ééndanye gô géwanyéô. Gôndé na mene mabégô mangakônza me nandé va gatse anyô.