I Corinthiens 10 - New Testament in Mitsogo

Bakani n’ekena gôékina mbumba

¹ Me Paul nanyôngéô mbe anye nôkôngéda éne émabuéa gôndé peeye yanyô yambeegô amakénga môtôô ômakea Moïse. Ahngô muetso na Moïse ahmakénga na ahmeebakanédu n’obôngé gô ngongo. Ahngô muetso na Moïse ahmaabôga mubue ôtetu mbe Rouge.

² G’ôbôngé na gô mubu ahmeenaméa muetso ga batemene émeetsô ahngô kukepo na Moïse môtômine waô.

³ Ahngô muetso na Moïse ahmaaka môyakô ôvo ômeetsô angô na Gédidi SaNzambé.

⁴ Na ahmanyuaka muetso meba mavo mameetsô ahngô na Gédidi SaNzambé. Vamanyua ahngô meba mamakusa g’ôbobo, menyani mbe amadôngédu na ôboboe ômeetsa Nzambé gô nzéane émakeahngô. Oboboe ône te amuene Jésus‐Christ.

⁵ Buéyé gamakeneoko ahngô na Nzambé ayekani ahsibé n’evamba na Nzambé. T’ebandô amawa na amasanéa gô tsenge émagasani.

⁶ Mabégôme mameena peeye yasô n’anyô matôétsa ndongi kabaga wa n’anyô tônyima mane mabévani mamanyima ahngô.

⁷ Tambô anye nômbiagétôga aneegedi ambumba gamabaka peeye yanyô. Te gatônigôu na Matendeo MaNzambé mbe: Omeaa adigaa gôéaa na gôényua n’enguta. Atimôga gôégina.

⁸ Tômbiakea gésasô gameenda avo va gatse aô na ahmawa nyovo nzima dibaé yamitônisa na mitônisa mitatô mioma.

⁹ Tômbiakanéga éseka Nzambé géene angô gomo gameenda tétee yasô n’anyô. Ahmambatô na nyogo na ahmawa.

¹⁰ Nômbiavovo na Nzambé na tsévi gameenda avo va gatse aô na ahmayôu na môyanzi aNzambé, môsi g’ôba amaviga n’owa.

¹¹ Magugame mamabuéa gôndé ahngô mandéké te ndongi gôndé ane aanda va ngima aô. Magugame mameenahngô mamatendu gôéevéda wa n’anyô tôdôngani pitsi yedi tôka vabambani n’ekôdéô éatsinane.

¹² T’ebandô ône atsôkéa mbe: Natemi naka môtie gésimbédu, awemé kabaga anikea ékuéa.

¹³ Gôsaba ta gô éangô. Nzambé asavétsua ôvangee wedi gôétôkenea gô éne ékanégu wa n’anyô. Nzambé asasinga mbe éne ékanégu wa n’anyô éôtéa ngudiye dindé na wa n’anyô mbe tôkékôa éangô. Gô ndéône éngatsiga éne énganôkanégani, Nzambé anganôétsa ngudi gôésipa na gôékékôa gômbe nôsangakuéa.

¹⁴ T’ebandô nanôevéda wee yami mbe baani n’ekena mbe nôsaneegeda mbumba.

¹⁵ Anye nôndé oma andé n’eodo. ?Gô éne évovo me éva anye nôôkô nayee? Tanganédani.

¹⁶ Tasani gô gébunguge gématôétsô na Nzambé na tôduka mate medi gô sangô. Vatônyua gébunguge ége? ?gésatôvambéda évambevo na nzina yaJésus‐Christ‐a? Tasani dôta môpemba ôtôbukuani. ?Vatôaa angô ôsatôvambéda évambevo na ôtô aJésus‐Christ‐a?

¹⁷ Buéyé mbe tôndéké ayekani tôaa muetso môpemba ôvo. Te éne étubéda mbe tôndé muetso te ôtô ôvo.

¹⁸ Bononi dôta éongo éaIsraël. Gévumbéô saô sadigondoku te saNzambé. Na digondoku dideekedu te na gôndé Nzambé. Ane aa gô digondokuye dine aka évambevo na Nzambé.

¹⁹ Vavovo me vane ?te mbe mbumba éndé na ngudi‐a? Aé. ?Te mbe nyama édeekedu na gôndé mbumba éndé na tsoongo‐a? Aé.

²⁰ Neendi mbe ane adeekeda nyama na gôndé mbumba eetsa yangô na gôndé édidie ébévani, kaka na gôndé Nzambé. Ti me tsanyôngéô mbe nôvamba na édidie ébévani.

²¹ ?Anye nayee nônganyua kukepo ébungue ébaé? Nômbianyua géne saKumu na géne sedidi ébévani. ?Anye nayee nôngaa kukepo va tabudé dibaé? Nômbiaa va éne éaKumu na va éne éedidi ébévani.

²² ?Nômenya mbe Kumu asaba n’opisa‐a? ?Tônyôngéô émôétsa ôpisa‐a? Na wa n’anyô, na amuene Kumu ?ône ootéa ngudi indaa?

Eetsô étôéndani te gôékuméda Nzambé

²³ Avo va gatse anyô, nôvovo mbe: Gô éetso me tsaba na môge. Ii, te buedi. Ivô menyani mbe mavo mabégô masanyepa gôndé wa n’anyô. Nôvovo mbe: Gô éetso me tsaba na môge. Menyani mbe mavo mabégô maaganéda wa n’anyô na Nzambé.

²⁴ Môma na môma asoongôa éénda éne éteka amuene. Buedi mbe abuta dôta éne énganyepeda akedi.

²⁵ Aakani éetso éngasômba anye gô ékasa ésômbédu nyama gébé na mikebanganô gôébambéa mbe: ?Nyamane édué éviga gôni?

²⁶ Matendeo MaNzambé matôbeenda mbe: Totone na éetso éndé gô yangô, te éamuene Kumu Nzambé.

²⁷ Okô môma asavamba na Nzambé agôbambéa gôéaa môyakô. Kiaka ôkéaa éetso éngeetsô éwe gôéaa. Aaka gébé na mikebanganô gôémôbambéa mbe: ?Môyakôe ôdôô ôviga gôni?

²⁸ Ivô ôkô môkoo apangi égônigôa mbe: Nyamane édué éviga gô ésôga. Tambô gôndé éwe ômbiaa gôébégô éamôkoo ône agôbeendini kabaga abévédu. Asigôbeenda bobo.

²⁹ Me tsavovo gôndé éwe mbe ôngakuba, ivô navovo te kabaga ôkubéda akoo. Ewe ôtsapéô mbe: Tambô me nangaa, vo tsangaa ?te gatômu me na mianga miamitéma mindé n’akasô‐a? Me nangabanda, vo tsangabanda ?te gatômu me na matasame mandé n’akasô‐a? ?Ebégôé éne ékegea nayee?

³⁰ Mavooe ôngavovo mbe: Me nakuméda Nzambé gô môyakôe ôngaa me. ?Môma angatsuava me na eetsa me ôési gô éne éduki me mate maNzambé nayee?

³¹ Nômbiatsapéô. Buéyé mbe aakani buéyé mbe nyuakani, buéyé mbe indakani pati ébégô, indakani metso te gôékuméda Nzambé.

³² Digaakani n’etsimama gôndé Nzambé gômbe môdigédie wanyô ôsangatôngéda Ajuif, na ôsangapatsa ane asaba Ajuif, na ôsayungéda ina ambumu éaNzambé.

³³ Me neenda te nane. Me Paul nagényôga gôényepeda oma muetso gô metso meenda me. Tsabuta mane mamemuene matévo. Nabuta te na mane makasô muetso gômbe n’ahngô dôta angoobou.