II Thessaloniciens 3 - New Testament in Mitsogo

Vovoni na Nzambé gôndé we

¹ Ana aTétee n’ami asi mbumu éaNzambé, vovoni na Nzambé gôndé we gômbe mabégô metso maKumu Jésus mangoomba étsanzabana gésikamé. Na mbe mangaditédu n’akanyô gamapanganye émaditéda v’ebandô.

² Vovoni na Nzambé mbe ayuua we gô mogo moma abévani oopisa. Gôébégô kaka muetso eetsa Nzambé mitéma miaô gémôtsumé paga.

³ Kumu Jésus andé na mavôma na asakoga. Anganôodeda na anganôebakanédéa Môbévine.

⁴ Kumu Jésus atôsuméda mitéma gôndé anye mbe nôndé gôégobeda ndongi yasô na mbe nôngoomba édigobeda.

⁵ Tônyôngéô mbe Kumu Jésus aweseda mitéma mianyô gôévamba na vitoo na Nzambé. Na mbe ayuéséda mitéma mianyô n’obibô ôviga gôndé amuene Christ.

Buedi mbe môma ayanzé

⁶ Ana aTétee n’ami asi mbumu éaNzambé, gô ina aKumu Jésus‐Christ tônôbeenda mbe: Nômbiavamba n’asi mbumu éaNzambé andé na gésima sadakadaka na asagobeda meekédume mamatôékéda angô.

⁷ Anyene nôsabômu mbe éndé ti éamôsôba gôédeka mônongoe wami. Vamadigaa we va gatse anyô tôsibaké na gésima sadakadaka.

⁸ We tôsibone miso masô gôndé môma mbe abôngôa we géenza, ivô tômagogo n’eyanza gôédiia éne édôngéda ôtô. Tômayanza na pitsi n’omanda buta mbe tôsaba ga égumba éngadagéô anye.

⁹ Tômeenda nane, kaka mbe we eekédi tôsoongôa ékeneo n’omee wasô, ivô tômeenda te gôénôtubéda mônongovo gadigaa ône eetsa Jésus môtémee.

¹⁰ Bangôani gamavovo we n’anye mbe: One asanyôngéô éyanzani te ône asanyôngéô éaani.

¹¹ We tôvovo n’anye nane gômookô we mbe avo va gatse anyô adigaa na dakadaka gébandé éyanza. Ene ésabômu ahngô te gôéyungéda mane makaô.

¹² Gôndé ahngô tôvovo ébégô édué. Gô ina aKumu Jésus‐Christ, tônôongô ndongi mbe: Yanzakani pitsi yetso gôédiia mane madôngéda ôtô.

¹³ Géé gôndé anye ana aTéta asi mbumu éaNzambé, nômbiagogo nôndé gôéénda mane manyô mamisôba.

¹⁴ Okô môvo asagobeda ndongi yagésangô gegé, tendani inee éedi. Kinani évamba n’edi buta mbe eena tsoyi.

¹⁵ Ombieenda angô mbe môdudeo. Ivô ivédani angô te ivéda, gôndé angô muana aTétee môsi mbumu éaNzambé.

Mate na kômbô

¹⁶ Te mbe Kumu Jésus amuene môétsi agétabé anôsuméda mitéma gô ndéô yetso na gô minongo mietso. Te mbe abaké gôndé anye muetso.

¹⁷ Mabégô mema natenda na misavi miami mbe: Oô te me Paul. Nôeni gakôdéda me ésangô éami éetso. Nôeni ôtendédie wami.

¹⁸ Te mbe mate maKumu asô n’anyô Jésus‐Christ mabaké gôndé anye muetso.