II Thessaloniciens 2 - New Testament in Mitsogo

Môbévine

¹ Ana aTétee asi mbumu éaNzambé, gôébégô éagénikéô saKumu Jésus‐Christ na gô tsina na vangakôkangana wa n’anyô vandé angô, gôndéké ébégôe éevéda me anye.

² Nômbiasinga môma anôétsa gomo gô mitéma, na anôyungéda gô édidi mbe Kumu Jésus oombi éviga. Mavooe môma anganôbeenda nane gô meekédume vo eenda mbe apandôéda ébégô émeetsô angô na Nzambé. Mavooe dôta anganôpatéda mbe: Te Paul amatendéa we gô gésangôge nane.

³ Nômbiasinga môma anôbôméda nane. Menyani mbe ndéône éagénikéô saKumu ésangabuéa buétsé te gékékôéô gévôni samabégô mamisôba gépanga éenanô. Na buétsé te ône môbévani, kumu agébunganéô apanga étsutsuga.

⁴ Môdudeo nône angaboa nyemo mbe: Mane maneegedanye mane, masaba na tsoongo. Me nootéa mane maNzambé metso. Gô eba ôneegeda Ajuif Nzambé, môdudeo nône angadigaa gô tsongo éadisambô éndé gédigaa saNzambé. Na angeenda mbe: Me te Nzambé.

⁵ Bangôani gameevéda me anye mabégô mema vamaba me nagébaka gôndé anye.

⁶ Anye nôsabômu mbe gôndéké ébégô éebakanéda mane madagani gôéenanô n’atsatsee. T’ebandô mômane môbévani ône angatsutsuga te gô ndéône émavanga amuene Nzambé.

⁷ Ngudi dipôni yaMôbévine ône, dindéké gôéyanza v’esooe, ivô disangeenanô yetso ngu na vangatubédangô mabégôme medi mavôni. Na mangô masangatubédu buétsé te ône eebakanéda mangô pitsi yedi apanga énôtôga.

⁸ Vane te vangatsutsuga Môbévine. Ivô Kumu Jésus angamôyôha gô ngudi yamodie ôkusa gô mônyedi. Angamôbunganéda gô ngudi yobébayi agévigéô sedi.

⁹ Môbévine angaviga na ngudi yaSatan yetso na angayanza étsutsuku éyekani, na émbégéa éangudi yedi na mayanza mamavéto.

¹⁰ Angayanza na mabégô mabévani gô minongo mietso gôébôméda ane andé gô nzéa éebungana. Ane akea gôébungana gôébégô asinyôngéô na asivambé na mabégô mapie mamabaka na ngudi gôéoboo ahngô.

¹¹ T’ebandô Nzambé angasinga omee ane gôéétsa mitéma miaô gô mane madiboe.

¹² Vane muetso ane asiitsé mitéma miaô gô mane mapie, ivô ameena gényônga gôétsôkéa mane mabévani, angakea gôébungana.

Anye nômasevou gôédiia géobogeo

¹³ Ana aTétee asi mbumu éaNzambé tôkuméda Nzambé gôndé anye gédundé gôébégô nôndé anedi amôtéma. Nzambé amasevoa anye mbe nôngaba ane angapanga édiia géobogeo gô ngudi yaGédidi sedi. Te sangô génôvambéda môvo na Nzambé gômaagana anye na mane matsengene. Nôgédiia dôta gômeetsanye mitémamie gô Mabégô MaPie gémôtsumé paga.

¹⁴ Nzambé amanôbambéa gôédiia géobogeo, te gô ngudi yaTsangô Eamôsôba émeekéda we anye. Amanôbambéa mbe nôngagésangana ôndômba ôvo na Kumu asô n’anyô Jésus‐Christ.

¹⁵ T’ebandô nanôbeenda mbe: Ana aTétee asi mbumu éaNzambé oodoni gô mabégô mapie. Ditégani meekédume metso mamanigôa we anye, buéyé na mônya, buéyé mbe na gésangô.

¹⁶ Amuene Kumu asô n’anyô Jésus‐Christ, na Tétasô n’anyô Nzambé atônyôngéô na amatôétsa gô ngeba yedi gékasôgédéô gésakôdéakani, na ébégô éatsoongone éténdéda we.

¹⁷ Tônyôngéô mbe ahngô anôyuéséda mitémamie na bôkédé. Na mbe anôétsa ngudi gôéyanza mane medi mamisôba metso, gô mavovia na gô môdigédi.