II Thessaloniciens 1 - New Testament in Mitsogo

Mikudéga na kômbô

¹ Oô te me Paul, na Silas na Timothée. Tônôtendéa gésangô gegé, anye asi mbumu éaNzambé gô môsenge aThessalonique. Anye nômavamba na Tétasô n’anyô Nzambé na Kumu asô n’anyô Jésus‐Christ.

² Tônyôngéô mbe Tétasô n’anyô Nzambé na Kumu asô n’anyô Jésus‐Christ anôétsa gétabé sedi na mate medi.

Gôngaba môtsundu nyee ôngaviga Jésus‐Christ

³ Ana aTétee asi mbumu éaNzambé, tôsatsika ékuméda Nzambé gôndé anye. Endé kuanakue gôtôénda nane. Gôébégô anye nôôtéa éwesea gô mbene na gô mbene gô nzéa éaJésus étôkeani édué. Etondo éndé n’anyene n’anyene éndé gôékôndama ti kôndama

⁴ T’ebandô tônyemôga na gényônga gôndé anye vadigaa we n’avo asi mbumuye yaNzambé. Gôébégô, buéyé gô tsina agékuanô na maguga metso meenanye nôndé na môvinéné génôtôgé gô nzéane éaJésus na gétsumé Nzambé paga.

⁵ Nôeni gayanza Nzambé gépenganédé mabégôme. Gô gékuanôge gésipanye, andé gôénônyepeda mbe nôngaba kuanakue gôéengéa g’ôkumu edi. Magugame meenanye te gôndé angô.

⁶ Endé te nane. Nzambé ayanza gépenganédé ta n’ebégô. Anganikéa événda gékuanô gôndéké ane anôtubéda gékuanô.

⁷ Na angeetsa gévôgiméô gôndé anye nôndé gô maguga. Na gôndé we te mônongovo. Tôngaba na gévôgiméô te vangaviga Kumu Jésus g’ôba na ngudi yetso, angô n’asi g’ôba ane avigédu na Nzambé.

⁸ Asi g’ôba angavigédu na Nzambé atsiga na soto géyôani gôésiséda ane asineegede Nzambé n’ane asigobede Tsangô Eamôsôba éaKumu asô n’anyô Jésus‐Christ.

⁹ Gésisédéôge géngeetsô ahngô te gébunganéô gésakôdéakani géngadigaahngô gôdagôda na Kumu. Asangavamba na ngudi yedi. Asangeena ôbébayi ôtubéda ôndômba aNzambé.

¹⁰ Engabuéa te gô ndéône éngavigangô gôéneegedu n’asi mbumu éedi na gôékumédu n’ane amamôétsa mitémamie. N’anyene nôngaba wangô gôébégô nôsitsumé paga gô meekédume mamanigôa we anye.

¹¹ T’ebandô tôsatsika évovo na Nzambé gôndé anye. Tômôduka mbe anônyepeda pepe gôéba kuanakue gô monyoe ômasevoangô anye mbe nôdigaa ganyôngéô angô. Tômôduka mbe go ngudi yedi anganôdugédéa mane masema anye tsémo yamisôba. Na mbe gô ngudi yedi angatsimaméda mane mayanzanye nôndé gôégobeda mane mameetsanye mitéma.

¹² Vane, ina aKumu asô n’anyô Jésus ékumédu na éditédu n’anye. Anye dôta nôngakumédu n’edi gô mate mangeetsô anye na Nzambé na Kumu asô n’anyô Jésus‐Christ.