Gétsutsuéô 17 - New Testament in Mitsogo

Ebégôé éagétôa gévôni

¹ Môsi g’ôba môvo ava gatse ane tsambué amasumbéda ébungu tsambué, amaviga na gôndé me, Jean. Amavovo mbe: Viga ôviena gangeetsô môsi gétôa tsôgôô. Môéndine agétôa ône te môsenge ôvôni ômabatô gô kôbangô ambéyi.

² Atômi atsengeye ahmakea n’edi gésasô. Na asi tsinane nyetso aka n’edangi éamaduku mameetsô ahngô n’edi.

³ Gédidi SaNzambé gémeengéa gôndé me Jean na môsi g’ôba amatsua me na gô tungu émagasani gôsibé oma ayekani. Nameena gône môgeto andé digaa gô Gényamanyama satsoo gématendu ôtôe wetso miname matoko Nzambé. Gényamanyama géne gémabaka na miôtsé tsambué na nzima atséba.

⁴ Mikanda mimaata môgetone ône te miosunu ôvôni na mianza mimasaô na dodo mimootéa ényepani. Amasumbéda g’ôgogo edi gébungu gémakônzu na dodo na gémayôa n’esima éedi éasagô éanzoh.

⁵ Va panzane edi vamatendu ina ésoongôa môma émenya éevisô. Inee ématenduni te mbe: Oô te Babylone épôni. Odôô yeene émabôta étôa éetso éagésasô. Na émabôta dôta n’esimee éetso éanzoh éava tsina.

⁶ Nameena mbe môgeto noo andéké n’edangi. Edangie yedi te éanzina yasi mbumu éaNzambé ahmayôhu gô ina aNzambé. Nzina yaô dimaaga gôébégô ahngô ahmootéa ényôngéô Jésus na ahmasipa gô mabégô medi. Vameena me môgeto nône namasôbasôbana.

⁷ Môsi g’ôba ameevôa me mbe: ?Osôbasôbana ndé? Na amanigôa me mbe: Oeni événdégéôe éav’evisô éamôgetone andé digaa gô Gényamanyama. Oeni dôta événdégéôe éaGényamanyamage géndé na miôtsé tsambué na nzima atséba.

⁸ Gényamanyama gegé gémadônga ivô n’atsatsee gésadôngadô. Gémakusa gô éduku éamongodi gémakea gôébungana. Asi tsinane nyetso ane ahsaba na mina maô mamatendu v’ebandô atsina n’oba gô môganda amonyo, ahngatsapéô veenahngô Gényamanyama. Gôébégô sangô gémadônga va mbeego na gémabungana na géngatsutsuga.

⁹ Gô ébégô édué éenanô éodo éamôma gôémenya éangô. Miôtsé tsambué te mikôdi tsambué na môgeto andé digaa gô miangô. Miôtsémie mine mindé dôta kumu tsambué.

¹⁰ Va gatse ayangô tsambué, ditayi dimanôtôu. Epo éndé gôétôma. Epo dôta te éne éatsambué, madeo ésiviga. Vangatsiga kumune éatsambué éne, ôtômue wedi ésangadinga.

¹¹ Gényamanyama géne gémabaka gédôngani ivô gémabungana, sangô te kumune éagénana éndé gô géômbé sadine tsambué na ékea gôébungana.

¹² Nzima na tséba dibaé te nzima akumu madeo disibandôa étôma. Dingeetsô ényanga gôétôma kukepo na Gényamanyama gô vipesu viandéô.

¹³ Yangô yetso nzima étasee te évo. Na yangô dingeetsa ngudiye na ôtômue waô na gôndé Genyamanyamage.

¹⁴ Dingagenya na Môpagee Endombo na te Môpagee ôngadiiani gôébégô angô te Kumu akumu yetso na angô te môtômi aatômie muetso. Môpagee ôngadiia, angô n’ane andé n’edi. Ane andé n’edi te ane ahmasevouni na ahmabambéôni na amamôétsa mitéma miaô.

¹⁵ Môsi g’ôba amoomba évovo na me Jean mbe: Ewe ômeena mbéyi na môsi gétôa amadigaa va kôbangô ayangô. Oeni, mbéye te oma. Te éômbé évôni éagô tsenge yetso na yôgiye yetso.

¹⁶ Nzima atséba na dôta Gényamanyama géngadudu môsi gétôa. Géngasasa maduani medi metso na angadigaa mônyenge. Géngaa ôtôe wedi te aakaga. Na géngamôbéka gô soto.

¹⁷ Gôébégô Nzambé amakuya gô mitéma miaô mbe angayanza éne émavanga amuene Nzambé. Vameetsa kumuye ôtômue waô na gôndé Gényamanyama na vamadigaa kumuye na sangô évambevo, éetso éne émadugéda éne émavovo Nzambé mbe: Engaba te nane.

¹⁸ Ekegea te nane. Môgetone te môsenge ôvôni ôndé n’otômu gôétôma kumuye yava tsina.