Gétsutsuéô 14 - New Testament in Mitsogo

Embô étôa ane amoobouni

¹ Vane me Jean namabono. Nameena Môpaga Endombo va ngongo amôkôdi ôtetu mbe Sion. Vamadenganô n’edi môkama amitônisa na nzima dinayi na mitônisa minayi mioma mimatendu gô diôsô yaô inedi na ina aTétedi.

² Me Jean namookô ôgi ômaviga g’ôba na nzongodi épôni ga ngubu, ga môdumu ôdumédani. Ogie ône dôta ômavovo na gényônga ga ôgi angombi égôbuni.

³ Mitônisamie mioma mine mimatema va mbene eoma énayi évégumani, na va mbene apeeye. Na ahmatôa imbô éamanza madeo ésitôôni. Gôsibé môma oongôa éétôa buétsé te ahngô mitônisamie mioma mine mimoobouni mimanôtôga gô tsina.

⁴ Yôtô yaô disigésangané n’ageto ahmadeekeda yangô na gôndé Nzambé. Ahmakea nzéepo na Môpagee na gô tunguye yetso dimakeangô. Te ahngô ahmapanga éobouni va gatse omee gôédeekedu na gôndé Nzambé na Môpagee.

⁵ Gôndé ahngô madeo gôsiôkanô éoboe. Ahsaba n’oési ta n’ovo.

Asi g’ôba atatô

⁶ Vane me Jean nameena môsi g’ôba môvo amaveea gô ngongo ngongo. Amabaka na Tsangô Eamôsôba éamabégô mamôbô na môbô masakôdéakani gôébeenda oma agô tsina. Tsangône te gôndé asi tsengeye yetso na asi mongo metso na asi yôgi yetso na oma muetso.

⁷ Amavovo na ôgi agô ngongo mbe: Gobedani Nzambé na gomo. Tubédani angô géneega géwanya n’okumakee ôndé n’edi. Nôeni, ndéône ébuéyi éne éngatsundédangô oma. Negeedani ône amakana ôba na tsina na mbéyi na tungu yetso dibunduga meba.

⁸ Môsi g’ôba amôbaé amavigédu na Nzambé gôéaanda môkedi va ngima, ameenda mbe: Môsenge ôvôni aBabylone ômapanzô, ômapanzô. Môsengee ône ômeetsa gébungu sedi samaduku na gôndé oma muetso gô tsenge mbe ahnganyua. Madukume mane te ésima éedi éetso ébévani éengéa gô gésasô na ékusa te gô gésasô.

⁹ Môsi g’ôba amôtatô amaanda akedi va ngima na amavovo n’ogi agô ngongo mbe: Anye nôneegeda Gényamanyama na gégonige sedi gémapakôni na nômasinga éétsô ndémbô n’edi gô panza na g’ogogo.

¹⁰ Anye nônganyua gébungu géyôa n’opisa aNzambé ôsigésu na sôma gôésusua ôbagee. Anye muetso nômasinga Gényamanyama na gégonige sedi nôngabisa gô soto géyôa na mbônga ébévani, géndé va mbene asi g’ôba ayanzie aNzambé na Môpaga.

¹¹ Sotoge géne gébisongoneda omee na môtutu wedi ôbutima môbô na môbô géemé. Nôsangadunda na pitsi n’omanda te bisongono, anye nômaneegeda Gényamanyama na gégonige sedi na nômasinga éétsô ndémbô étubéda inee éedi.

¹² Nôeni ébandôe ésipa asi mbumu éaNzambé na bôkédé, te ane ahgobeda mitôma na mige miedi na ahsanôtôga gôndé Jésus ône ameetsangô mitémamie gébé na buétsé.

¹³ Vane me Jean namookô ôgi ômaviga g’ôba ômatôma me mbe: Tendaka édué. Na ômavovo mbe: Gényônga gôndé ane ahwa pitsi yedi gô éyanza éaKumu. Gédidi SaNzambé gémaabéa mbe: Ii, te na gô pie. Angadunda gô éyanzee éaô édagani. Na mane maô mamisôba mangakea n’ahngô géômbé.

Mane mamagaabô gô tsina mamani éombo

¹⁴ Me Jean namoomba ébono. Nameena ôbôngé avembo. Gô ôbôngé ône gômabaka sôma gémagono na môma digaa. Amaata gô môtsé gépôkôdô sokumaka gémakônzu na dodo. Amasumbéda g’ôgogo môsagôe amengô.

¹⁵ Môvo môsi g’ôba amakusa gô eba aNzambé na amaamugana na gôndé ône amabaka digaa g’ôbôngé mbe: Tsôpaka môsagôe woo. Oeni, ndéône éekitsa mane mamagaabôkôni ébuéyi. Mabégô metso mameenanô va tsina mamani édeeda.

¹⁶ Vane ône amadigaa g’ôbôngé amoota gô tsinane nyetso na môsagôe wedi gôékitsa mane mamagaabôkôni.

¹⁷ Môvo môsi g’ôba amakusa gô eba aNzambé ôndé g’ôba na angô dôta amasumbéda môsagô amengô.

¹⁸ Na muene môsi g’ôba dôta amaviga gô gévumbéô sadigondoku. Angô amabaka n’otômu asoto. Amaamugana na gôndé môkedi amasumbédaka môsagôe amengô. Angô mbe: Kitsa na môsagôe woo miôndamie miameba maduegi mindé gô tsinane nyetso. Miangô mimani éombo.

¹⁹ Môsi g’ôba ône amakea akitsa na môsagôe wedi miônda miomboni miagô tsinane nyetso. Ahmamikuya gô gétsanga sopisa aNzambé gôékuséda mebame.

²⁰ Miôndamie mimapinyô gô gétsangage v’etumba amôsenge. Gô gétsangage géne gômakusa nzina ti ga mbéyi. Mbéne éanzina ématongo gatongo môtôô agô tsina ôkeo nzima apitsi. Mbéne éanzina éne ématiba gô ôkana ga gétie samôma.