Ephésiens 6 - New Testament in Mitsogo

Môdigédi atétee n’eyee n’anaô

¹ Ndongi yedi te yanyô anéngé. Eyanzee éetsô anye na Kumu Nzambé te gôégobeda yoo na tétoo, gôébégô Nzambé amuene anyôngéô te nane.

² Gô mitôma na mige miaNzambé amatôma mbe: Gobeda yoo na tétoo. Gô nzima yamitôma, ôdôô te môtômee amapanga ômavangana Nzambé na môgobedi mbe: Okô ôéndi angô, nangagôétsa mate.

³ Mateme te mbe ôngaba na gétabé na pitsiye yoo yava tsina dingayeka.

⁴ Ndongi yedi te gôndé téteye. Nônabévéda ananyô na yôgi yakangégangé gébé na ébégô. Ivô nôékéda ahngô na nôsiséda ahngô na ngeba ganyôngéô Kumu Nzambé.

Môdigédi amôvéga na kumu

⁵ Ndongi yedi te yangô avéga. Gobedani kumuye yanyô yava tsina n’edita na gomo. Yanzéani ahngô na môtémovo ti eembe nôyanzéa te amuene Christ.

⁶ Kumu abéyee, asabéyee, yanzani ti eembe andé vangô gôénôbono. Vane nôngadugéda na môtéma ômasumani éne enyôngéô Nzambé ti eembe nôndé avéga aChrist.

⁷ Indakani éyanzee éanyô éovéga na ngudi yanyô yetso mônongo ganôyanzéa Kumu Jésus, kaka môma.

⁸ Bangôani mbe môma na môma abéyee môvéga, asabéyee môvéga, tôngadiia gô mane mayanza wa n’anyô mamisôba manyôngéô Nzambé nyee ôngaviga Kumu Jésus.

⁹ Gôndé anye kumuye, ndongi yedi te dipo. Bakani n’avégee wanyô na gétabé. Nônakangéa ahngô. Bangôani mbe anye kumuye n’avégee wanyô, nôndé muetso avéga aKumu épo, te amuene Christ asaba na tato oma.

Ekeeyie égenya môma aChrist

¹⁰ Endé te nane. Butani édiia ngudi yanyô gô ngudi dipôni yaKumu Jésus na gô évamba éndé anye n’edi.

¹¹ Nzambé anôétsa ékeeyie éedi gôégenya. Tambô tsuani na aatani éangô gôéba na ngudi yekumba yabédé n’eodo éndé n’edi gôégenya.

¹² Ebadie éndé na wa n’anyô tôsagenya n’oma. Tôgenya te na édidi ébévani éndé n’enyanga na édigaa va gatse atsina n’oba, na atômie, na ditômuye na kumuye yagô tsengene yaô yevitsi.

¹³ T’ebandô nanôbeenda mbe n’atsatsee tsôpani na tsuani ékeeyi éaNzambé éetso. Vane gô ndéô édangani nôngaba na vévé gôévéngéa môdudeo. Na vangamananye égenya ngu na v’ekôdéô éebadie, nôngaba te ôbéôbéô mitie gô étungue éanyô.

¹⁴ Bakani na vévé gôéenéa môgenyee. Oodedani Mabégô MaPie MaNzambé goodedanye môkodi v’ôninge. Aatani étsimama gaatô ngoyi éamianga.

¹⁵ Aatani géviôviô seekéda Tsangô Eamôsôba éagétabé, gaatanye pondu gô makôdô.

¹⁶ Môtéma ôndé gôndé Jésus gébé na paga te ga gébakanédéô sotô. Gô mabadime metso sumbédani sangô géngabakanéda anye gôékumba makongo mayôa na soto magunya One Môbévani.

¹⁷ Singani géobogeo saJésus géndé ga gépôkôdô samianga gôéata gô môtsé. Tsôpani Mane Mamavovo Nzambé gatsôpu ébaga émeetsô anye na Gedidi sedi.

¹⁸ Aatani ékeeyi éetso éne, nôndé gôéduka Nzambé g’ôsambô mbe anôwedéa. Vovoni na Nzambé ndéô yetso gangatévédu anye na Gédidi sedi. Bakani misiki gôésambéda gédundé. Vovoni dôta na Nzambé gôndé asi mbumu éedi muetso.

¹⁹ Vovoni na Nzambé gôndé me Paul mbe vakukua me mônyee wami mbe nangeetsô mavovia makuanakue na mbe nangavovo gébé na tsoyi gôémenyeda oma mabégô maTsangô Eamôsôba masinigôganéôkô na mbeego.

²⁰ Me te gékambi saNzambé gô Tsangô Eamôsôba buéyé mbe nandé gô eba atsôgôô. Sambédani mbe nangaba na ngudi gôénigôa Tsangône na bôkédé ganyôngéô Nzambé.

Kômbôye yamôyusumédu

²¹ Muana aTétee n’asô n’anyô agô mbumu éaNzambé Tychique andé wee yami na môwedi abôkédé gô éyanzee éaKumu Jésus. Anganônigôa tsangône éami égô gôénômenyeda mônongovo gandé me.

²² Natôma angô na gôndé anye te ti ndi gôénônigôéa gandé we égô na gôénôkasôgéda mitémamie.

²³ Te mbe Tétasô n’anyô na Kumu asô n’anyô Jésus‐Christ eetsé anye muetso agô mbumu éedi mabégô mema matatô. Eetsé gétabé sedi na étondo éedi. Eetsé na ngudi gôévamba n’edi gémôtsumé paga.

²⁴ Te mbe mate maNzambé mabaké gôndé muetso ane anyôngéô Kumu asô n’anyô Jésus‐Christ na vitoo ésagogakani.