Ephésiens 1 - New Testament in Mitsogo

Mikudéga na kômbô

¹ O te me Paul namasevou na Nzambé na namatômu na Jésus‐Christ gôétsua tsangô éedi. Nanôtendéa, anye asi mbumu éaNzambé nôndé gô Ephèse. Anye nôsitatôané gô vitoone éndé n’anye na Jésus‐Christ.

² Te mbe Tétasô n’anyô Nzambé, na Kumu asô n’anyô Jésus‐Christ eetsé mate medi na gétabé sedi gôndé anye.

Nzambé amatôétsa mane medi mamisôba gô ina aChrist

³ Tôkumédéni Nzambé Tétene éaKumu asô n’anyô Jésus‐Christ. Nzambé aagéda mate medi mag’ôba, te mane maGédidi sedi na gôndé wa n’anyô, gômatôvamba évambevo na Christ.

⁴ Menyani mbe Nzambé madeo asikana tsina n’oba amapanga ésevoa wa n’anyô gôévamba n’edi gô ngudi yaChrist, gômbe tôngaba n’etsimama na gébé n’oési va mbene edi.

⁵ Buéyé mbeego, Nzambé amabaka n’etondo gôndé wa n’anyô na amatôsevoa mbe tôngakou gôéba anedi gô ngudi yaJésus‐Christ. Te Nzambé amuene amanyôngéô éénda nane.

⁶ Tambô tôkumédéni Nzambé gô ngeba yedi disaba n’okana na dimootéani, dimeena angô wa n’anyô gébé na ninge, gô ngudi yaJésus Muanedi amôtéma.

⁷ Gôébégô wa n’anyô tômoobou na tômasingéô kokoo gô ébévee éasô n’anyô gô ngudi yowa aChrist, ône amatômu na Nzambé. Te gô ébégôe éne tôene gayekégéa ngeba yaNzambé gôndé wa n’anyô.

⁸ Gô ngeba yedi yagékôdéé, atôétsa dôta ékena na éodo évôni gôémenya matasi medi.

⁹ Amatômenyeda étasa émabaka n’edi ésinigôganéô na mbeego n’oma. Etasee te nzéane émanyôngéô angô ékônza gôndé wa n’anyô gô ngeba yedi gô ngudi yaChrist.

¹⁰ Amuene Nzambé angadugéda v’ekôdéô atsinane étasee éndé n’edi. Etasee éedi na nzéane yedi te mbe: Nangakôkanganéda mane mag’ôba metso na mane magô tsina metso g’ôtômu amôsi ényangee môvo, te Christ.

¹¹ Gô évambee éndé wa n’anyô na Jésus‐Christ, tômani édiia géôbogeo sasô n’anyô. Gôébégô wa n’anyô madeo tôsibôtu, Nzambé amapanga étôsevoa mbeego gamanyôngéô angô. Nzambé eenda ti metso ganyôngéô amuene na gavangangô mbe éngaba te nane.

¹² Tôkumédéni ôndombee na ôkumakee aNzambé. Tôndé anedi akuua gôédiia monyo ôtôténdédani gôndé Christ.

¹³ Anye asi Ephèse nômookô Tsangô Eamôsôba éaJésus‐Christ, yangô te meekédu mapie manônigôa géôbogeo. Vamookô anye nômeetsa Christ mitéma mianyô gébé na paga. Na vane Nzambé amatôéémba ndémbô étubéda inedi. Ndémbône te Gédidi sedi sovanga ômavanga angô mbeego.

¹⁴ Gédidi sedi te môkodi ôkata Nzambé wa n’anyô gôétôbangôéda môkuanya asô n’anyô omedi ômatôtsikéô gô géôbogeo. Nzambé atôsuméda mitémami mbe: Nômbiaba na mikebanganô gô môkuanya. Nôngadiia angô vangakôdéda me éyanza éami éetso. Tambô tôkumédéni ôndômbee aNzambé.

Osambô ômasambéda Paul

¹⁵ Me Paul nootéa évovo na Nzambé gô mabégô mabaé. Ene éamapanga te metso mane mamayanzéa Nzambé wa n’anyô. Ene éamôbaé te gômookô me kumane yanyô gameetsanye Kumu Jésus mitéma mianyô gébé na paga na gandé anye na vitoo n’asi mbumu éaNzambé muetso.

¹⁶ T’ebandô tsagogo ékuméda Nzambé gôndé anye. Kuka yetso nateta mina manyô gô disambô.

¹⁷ Naduka Nzambé Tétene aKumu asô n’anyô Jésus‐Christ, angô Téta ondômbee wetso, gôndé anye. Namôduka mbe anôétsa Gédidi sedi. Te sangô géngamenyeda anye, ne génganôtsutsuéda Nzambé, mbe nôsangadôtsuma angô paga.

¹⁸ Me naduka Nzambé mbe gévede sedi gévôni géngatana gô mitéma mianyô gômbe anye nôngeena na vede na miso magédidi mane matôténdédani mandé gôndé wa n’anyô tômabambeô na Nzambé gô nzéane étôkeani. Na mbe nôngeena ôkitie ondômbee amikuanya ômakôkégéô gôndé ane amabambéô na Nzambé gôéba asi mbumu éedi.

¹⁹ Na mbe nôngeena ngudi yedi dimootéani disaba n’okana dindéké deo noo gôndé wa n’anyô tôsatsuma angô paga. Ngudiye yaNzambé dine,

²⁰ te dine dimakundua Jésus g’ôwa na dimamôdigéda gô géeyo gémôgôô saNzambé gô tsenge éedi éag’ôba.

²¹ Gône Christ, ône amasevouni, amadigédu gô ngongo aditômuye yetso, na ényangee éetso na ngudiye yetso na ôkumaka wetso. Na andé va ngongo aminame metso mangoongôa môma éteta, mane magô tsenge nedué na mane magô tsenge évigani.

²² Nzambé amatsigéda éôma éetso na gô tsina amakôdô maChrist. Na vane ameetsa Christ na gô mbumu éedi mbe angaba môtsé ôtômani gô mbumu éaNzambé.

²³ Mbumu éaNzambé te ôtô aChrist. Christ te ébandô na ékôdéô éatsinane nyetso. Na angô andéké gô mbumu éedi na eenanô va gatse ayangô.