1 Thessaloniciens 5 - New Testament in Mitsogo

¹ Ana aTétee n’ami asi mbumu éaNzambé, nôsabutadô éoongu ndongi gôémenyedu ndéône na éyénzee éngabuéa mabégôme mane.

² Anyene nôsabômu mbe génikéô saKumu Jésus géngaba ga muisui aviga na pitsi.

³ Vangeenda oma mbe: Tôndé ti buedi gô gétabé. Tôsabutadô sôma. Te vangabunzangana éetso tsina na tsina. Asangabusuga. Engaba ga gégôngôta géevéda môgeto mbe amahbôta.

⁴ Ivô anye asi mbumu éaNzambé nôsadigaadô gô évitsi. Génikéô saJésus nôsangagétsapéô ga gévigéô samuisui.

⁵ Anye oma aChrist nôndé oma andé gô gévede, na oma andé g’ômanda. Nôsaba asi évitsi na oma apitsi.

⁶ Wa n’anyô tôsoongôa éeboga vio gandé avo oma. Tôndé oma eemba géembémba n’ekenge gébé gô édangi.

⁷ Ane eebogani, éeboga te na pitsi. Ane andé n’edangi, adanga te na pitsi.

⁸ Géé wa n’anyô tôndé oma agévede na tôndé ékenge gébé gô édangi. Gandé môgode aata ngoyi éamianga, tôaaténi mabégô maJésus masatsuma we paga mameetsa we mitémamie, na tôaaténi étondo. Gaata môgode gépôkôdô samianga gô môtse, tôaaténi géobogeo. Sangô te tsoongone éasô n’anyô étôebakanédani.

⁹ Endé te nane. Nzambé asivangé gôndé wa n’anyô mbe tôngeena ôpisedi. Amavangéa wa n’anyô géobogeo gô ngudi yaKumu Jésus‐Christ mbe sangô gétôyuua g’ôpisa.

¹⁰ Gôébégô Jésus‐Christ amawa gôndé wa n’anyô te mbe tôba monyovo n’edi. Vangavigangô tôwéyee, tôsawéyee, tôngaba monyovo n’edi.

¹¹ T’ebandô kasôgédanani na oodedanani anyene n’anyene gô mabégô mema geendanye na mbeego.

Ndongi yamôyusumédue na kômbôye

¹² Ana aTétee asi mbumu éaNzambé, tônôongô mbe: Tubédani égoba gôndé ane ayanza va gatse anyô. Kumu Nzambé amasevoa ahngô gôéékéda anye na gôétévéda anye nzéa.

¹³ Tubédakani angô géneega na étondo gôébégô éene éyanzangô. Digaani n’evamba éagétabé.

¹⁴ Ana aTétee, we tônôongô ndongine mbe: Kenedani asi dakadaka. Sipédani ane adeeda mitéma. Keneani na divooti ane asaba na ngudi. Bakani n’obibô gôndé muetso.

¹⁵ Keneani kabaga va gatse anyô gôbaka môma eendô ébévani na avénda te ébévani. Ivô indakani gôndé anyene na va gatse akanyô kuka yetso te mane mamisôba.

¹⁶ Tsôkéakani gô ndéô yetso.

¹⁷ Vovoni na Nzambé gédundé.

¹⁸ Kumédani Nzambé gô mabégô metso. Te éne ényôngéo Nzambé mbe nôénda gôndé anye na vitoo na Jésus‐Christ.

¹⁹ Gédidi SaNzambé gégono na soto. Nômbieeméda sangô.

²⁰ Nômieenza ndongi dipandôéduni diviga gôndé Nzambé.

²¹ Vasani na tônegedani mabégô metso. Nôsevoa gôékenea mane mamisôba mandé na tsoongo.

²² Aaganani na mabégô metso mabévani.

²³ Tônyôngéô mbe Nzambé, môsumédi amitéma aaganédé anye gô mabégô mabévani gôénôkoa omedi amatsimamani. Buta mbe vangaviga Kumu Jésus‐Christ nôba gébé n’oési gô mitémamie mianyô, buéyé na gô édidié éanyô, buéyé na gô matasame manyô, buéyé na gô yôtôye yanyô.

²⁴ One amanôsevoani andé na mavôma na asapenganani. Angamangôa éyanzee éedi gô mitéma mianyô.

²⁵ Ana aTétee n’ami asi mbumu éaNzambé, vovoni na Nzambé gôndé we.

²⁶ Sambanéani n’ana aTéta Nzambé na kômbô agéneega.

²⁷ Nanôgondo gô ina aKumu Jésus mbe kokooye anye, tangéani ana aTétee asi mbumu éaNzambé gésangô gegé.

²⁸ Te mbe mate maKumu asô n’anyô Jésus‐Christ mabaké gôndé anye.