1 Thessaloniciens 4 - New Testament in Mitsogo

Môdigédi ônyôngéô Nzambé

¹ Ana aTétee asi mbumu éaNzambé, nômani émenya môdigédi na ésima éamisôba ényôngéô Nzambé. Na gô pie nôdigaa te gô angô. Ivô deo noo nanôtôma, na nanôgondo gô ina aKumu Jésus mbe, ombani ényepeda mônongoe wanyô.

² Anye nôsabômu ndongiye dimoongô me anye gô ényangee émeetsô me na Kumu Jésus.

³ Nôeni éne ényôngéô Nzambé gôndé anye, te mbe nôaaganana na mabégô mabévani gôéba môvo n’edi gô étsimama. Na mbe nôkina minongo mietso miagésasô.

⁴ Buedi mbe môma na môma akenee na atômé ôtôé wedi amuene n’egoba n’etsimama ényôngéô Nzambé.

⁵ Abaké gésingé ôtô edi ôtômu na manyima mabévani gatômu ane asavamba na Nzambé.

⁶ Gô mabégô mema Nzambé asanyôngéô mbe môma abévéda muana aTétee n’edi gôébongo éne ésaba éedi. Tômani énôbeenda na tômani énôevéda mbe, Kumu Nzambé angeeséda ane eenda mônongoe ebéva ône.

⁷ Nzambé asisevoa wa n’anyô mbe tôdigaa gô minongo mietso miagésasô. Amasevoa wa n’anyô mbe tôaagané n’ebéva gôédigaa môvo n’edi gô étsimama.

⁸ T’ebandô ône akina ndongi yedi asakina ôgi amôma, akina te ôgi aNzambé ône ameetsa we Gédidi sedi.

⁹ Nôsabutadô éongu ndongi gôébégô éavitoone éndéké n’ana aTétee asi mbumu éaNzambé. Endé te nane, nômani éékédu na amuene Nzambé gakegea étondo éavitoone éasô n’anyô.

¹⁰ Anye nôndé n’evamba n’asi mbumu éaNzambé gô tsenge yetso yaMacédoine te nane. Ivô tônôongô mbe, ombani ékôndéga vitoone éndéké n’anyô.

¹¹ Gényôngani gôédigaa va gatse anyô na gétabé. Bononi na keneani te mane manyene. Yanzani na mogo manyene gôédôngéda yôtô yanyô. We tômani énôongô gô mabégô mema.

¹² Okô nôgobedi ndongi yedi nôsangagômbéô sôma, buéyé mbe nôsaba na môma gôénôwedéa. Na dôta ane asaba oma aChrist anganôbono na angamenya gô tsina yamitéma miaô mbe: Na gô pie, gôndéké ébégô.

Kumu Jésus anganika na gô tsina

¹³ Ana aTétee n’ami tônyôngéô mbe nômenya gakegea ébégôe ane amawani. Vane vangawéô anye nôsangadéa gandé akanyô adéa gébé na éne éténdéda wa n’anyô.

¹⁴ Ene éétsa we mitéma miasô gébé na paga, te mbe Jésus amawa na amakunduga. Te mônongovo na we, tôténdéda mbe ane amawa amamôétsa mitéma miaô, Nzambé angakundua ahngô gôéba monyo ga Jésus.

¹⁵ Oôkôni éne énigôa we anye gô mane mameekéda amuene Kumu Jésus. Wa n’anyô tôngadenganô tôdônga gô nyee ônganika Kumu Jésus na gô tsina, tôsangapanga éôbégéa tôtsika ane amawani.

¹⁶ Gôngookanô mbeea enyanga. Te ôgi apene éasi g’ôba ayanzi aNzambé na gémbômba saNzambé géngatoonguni. Vane amuene Kumu Jésus angasuma g’ôba. Ane amawa andé n’edi na vitoo te ane angapanga ékundugani.

¹⁷ Na vane wa n’anyô tôngadenganô tôdônga nyoone, tôngatômbu étepo n’ahngô na gô dibôngé gôéwanya na Kumu Jésus va gatse atsina n’oba.

¹⁸ Kasôgédanani anyene n’anyene gôésumanéda mitéma na mabégô mema.