1 Thessaloniciens 2 - New Testament in Mitsogo

Eyanza émakôdéda Paul gô Thessalonique

¹ Ana aTétee n’ami gô mbumu éaNzambé, anyene nôsabômu mbe môtôôe wasô na gôndé anye ôsibé abobo.

² Nôsabômu dôta mbe me n’egétsigaka na gôndé anye gô Thessalonique, namapanga étubédu maguga gô môsenge ôtetu mbe Philippes. Ivô Nzambé ameetsa we bôkédé gôénigôa anye Tsangô éedi Eamôsôba, buéyé gamadenga we gékuanô gévôni.

³ Endé te nane. Mbeeane ébambéa we oma mbe aabéa ésabandôa na ôboe na ésabandôa na mabégô masagô. We tôsabuta ébôméda môma.

⁴ Ivô éne ébuta we te gôévovo kuka yetso ganyôngéô amuene Nzambé. Amatôétsa ôséngue wedi. Amatôétsa na Tsangô éedi Eamôsôba. We tôsabuta ôséngu ôétsa môma. Tônyôngéô te ône aNzambé, môvasi na mômenyi amitéma miasô.

⁵ Anye nôsabômu mbe we tôsinôvooto na buembe. Tôsivigé na gôndé anye mbe nôviitsa we dode. Amuene Nzambé te mbangine éasô.

⁶ Tôsibuta ékumédu na anye, vo na muene môma. Tambô, tômabaka n’enyanga gôénôtôma ti tômaga. Enyangee te gômasevou na gômatômu we na Jésus‐Christ.

⁷ Géé nane, we tômabaka na deede vandé anye gandé iyee anyuéséda anedi.

⁸ Gôébégô tônônyôngéô na nzoo na gô mitéma miasô, tômanyôngéô énôétsa Tsangô Eamôsôba éviga gôndé Nzambé. Kaka éne étévo, ti na monyoe awéene. Mitéma miasô mimabaka te nane gôndé anye.

⁹ Ana aTéta, nôsoongôa ééba gamayanza we ti v’ekôdéô éegogo évôni. Tômayanza na pitsi n’omanda kabaga we tôba ga égumba gôékeneo n’anyô gô ndéône émabaka we gôénôékéda Tsangô Eamôsoba émeetsô we na Nzambé.

¹⁰ Anyene te mbangiye yasô. Na amuene Nzambé te épo mbangi émeena mbe môdigédie wasô na mônongoe wasô ômabaka kuanakue na déédéké gébé na ôési va gatse anyô nômeetsa Nzambé mitémamie.

¹¹ Nôsabômu gamayanza we va gatse anyô. Tômabaka n’anye môma na môma gandé tétee n’anedi.

¹² Tômakasôgéda anye na tômasuméda anye mitéma. Tômeekéda anye na môvinéné mbe: Digaani ganyôngéô Nzambé, ône amabambéa anye gôéengéa g’ôkumu edi na gôégésangana g’ôndômbee wedi.

¹³ Na gôndéké na yene ébégô ésatsika we ékuméda Nzambé gôndé anye. Vameekéda we anye Matendeo MaNzambé, nômookéô mangô na nômasinga mangô, ti pidi mbe ôgi aNzambé, kaka mavovia mamôma. Na mandéké te ôgi aNzambé. T’ebandô mandé na ngudi gô mitéma mianyô nosamatsuma paga.

¹⁴ Ana aTétee, anye nômeena mabégô mameena dôta asi mbumu éaNzambé andé gô Judée, ane ameetsa Jésus mitémamie. Anye nômatubédu gékuanô n’ane andé tsenge épo n’anyô. Gékuanôge géne te gévo na géne gématubédu asi mbumu éaNzambé gô Judée na Ajuife n’aô.

¹⁵ Ajuife ane te ane amayôha Kumu Jésus, na amayôha apandôédi amatasa maNzambé, na amakuana me. Aseenda ganyôngéô Nzambé. Andé adudeo oma muetso.

¹⁶ Agényôga gôéebakanéda me mbe kabaga neekéda mabégô magéobogeo gôndé ane asaba Ajuif. Gô éne andé gôékôndéga na gôédugéda mabégô maô mabévani mamayanzangô bandôa na peeye yaô va mbeego. Ivô ôpisa aNzambé ômani épikaméa ahngô.

Paul amookô asi Thessalonique tsôvé

¹⁷ Ana aTétee n’ami, bandôa gômatôaagana pesu andéô, tômaagana te gô yôtô kaka gô mitéma, me nookô anye tsôvé pepe. Me nakanéga gô minongo mietso gôéviga gôénôena.

¹⁸ Tômanyôngéô énika ébuéa vandé anye. Memuene Paul namakanéga ékea kuka dibaé ditatô, ivô Satan ameebakanéda me. Tsiôngôé éviga.

¹⁹ ?Ane andéké tsoongone yami yandaa? ?Ane andé gényôngage sami yandaa? ?Ane andéké gémbégéa sebadi émagenya me yandaa? Ka te anye. Vangaviga Kumu Jésus nanganyemôga na gényônga te gôndé anye.

²⁰ Ii na gô pie, anye te kumane yasô na gényôngage sasô.