Zekâya 9 - MUKANDA WA MYIDI MUKULU

BENA IZRAYELE NE BISAMBA BIKUABU Badi balumbuluisha, basungidila bantu badi mutumba ne bena Izrayele

¹ Maweja-Nangila mmutume mukenji. Diyi diende ndifike mu ditunga dia Adrake, ndishikidile mu tshimenga tshia Damase. Bualu Maweja-Nangila kena umona amu meku a bena Izrayele, kadi udi utangila bantu bonsu.

² Diyi diende ndifike mu tshimenga tshia Amate, tshidi pabuipi ne tshimenga tshia Damase, ne mu tshimenga tshia Tire ne tshia Sidone, bimenga bidi ne bantu ba meji.

³ Bena Tire mbakoleshe tshimenga tshiabu ne bimana; mbakunguje tshiamu tshitoke tshia mushinga mukole, bungi bu buloba bua mu njila; mbakunguje tshiamu tshia mpawungi, bungi bu lusenga lua mu misesu.

⁴ Kadi Maweja-Nangila neapawule bionsu bidi mu tshimenga etshi, neele bimana biatshi mu mayi manene, neatshioshe, tshibutuke.

⁵ Pamona tshimenga tshia Askalone bidi bienzeka ebi, netshikuatshike bowa; tshimenga tshia Ngaza netshizakale; tshimenga tshia Ekrone netshipampakane, bualu katshiena mua kutekemena kabidi badi mua kutshiambuluisha. Mu tshimenga tshia Ngaza, kamuakuikala mukalenga kabidi. Bena mu tshimenga tshia Askalone nebaye nabu mu bupika.

⁶ Bantu ba bisamba bishilangane, nebasombe mu tshimenga tshia Asdode. Maweja-Nangila udi wamba ne: “Ke mundi mbutula bena Peleshete badi baditambisha nanku.

⁷ Nempatule mukana muabu, minyinyi kayiyi mipatule mashi, nansha minyinyi buabu balambule mvidie. Bena Peleshete badi bashale ne muoyi, nebikale bantu banyi, anu bu bena diku kampanda mu tshisamba tshia Yuda. Bena Ekrone nebadisangishe ne bantu banyi, muvua bena Yebusa benza kale.

⁸ Nendame ditunga dianyi, bua baluishi kabafikimu, muntu nansha umue kakengeshi bantu banyi, bualu mpindiewu ndi mubatabalele.”

Mukalenga wa Izrayele neafile ditalala

⁹ Yerushalayime, sanka bikole! Wewe tshimenga tshia Siyone, ela tunkunduluila! Tangila mudi mukalenga webe ukuvuila. Udi uvua kukusungidila, kukosa nsambu pa yoyi. Kadi kena uditambisha to! Udi mubande pa nyama wa mpunde, pa muana wa mpunde mukaji.

¹⁰ Neumushe matempu a mvita mu Efrayime. Neapatule tubalu mu Yerushalayime. Neatshibule mata a mvita. Neafile ditalala mu bisamba bia bantu, neashale mfumu ku mayi manene ne ku makuabu, biangatshile ku musulu wa Perate, too ne ku ndekelu wa buloba.

Maweja-Nangila neapikule bena Izrayele

¹¹ Maweja-Nangila udi wamba ne: “Bualu bua ndondu undi mutue nenu, udi mashi a nyama ya milambu mashindike, nempikule bana benu badi mu lukanu, badi basomba mu bupika bu mu tshina katshiyi ne mayi.

¹² Nuenu bena lukanu badi mua kutekemena lupandu mpindiewu, pinganayi mu tshimenga tshienu. Mbamane kuibakulula bimana biatshi. Mpindiewu ndi nnuambila ne: nennuvudijile disanka dipite misangu ibidi dikenga dinuvua nadi.

¹³ Yuda neangambuluishe bu buta bua mvita, Efrayime neikale bu mukete. Siyone, nentume bantu bebe, bua kuluishabu bena Ngreke. Nebangambuluishe bua kuluangana mvita, bu mudi muele wa myita wambuluisha muluanganyi wa bukitu.”

¹⁴ Maweja-Nangila neamueneke, ku mutu kua bantu bende. Mukete wende neuye bu muele wa mvula. Maweja-Nangila Mvidi Mukulu, neele mpungi, neafike munkatshi mua mvunde, udi ufuma kuinshi kua ditunga.

¹⁵ Maweja-Nangila wa bukole buonsu, nealame bantu bende, nealokeshe mvula ya mabue, bua kubutula ne kuzaza baluishi babu. Nebitshikije mashi a baluishi babu panshi, bu mudibu bitshikija pa matumba a tshilambuilu maluvu, nansha mashi a nyama ya milambu, adi tente mu makopu a kumiamina nawu.

¹⁶ Dituku adi, Maweja-Nangila Mvidi Mukulu neasungidile bantu bende, mudi mulami wa mikoku usungidila mikoku yende. Nebakenke bu mabue a mushinga mukole, adi ku tshifulu tshia lumu. Nebele nsese mu ditunga.

¹⁷ Mu ditunga diabu dimpe ditambe, nemuikale diakalenga dinene. Ntete ya bukula, ne maluvu mapiamapia, nebipeshe bansongalume ne bansongakaji mubidi muimpe mupite.