Zekâya 8 - MUKANDA WA MYIDI MUKULU

Maweja-Nangila udi ulaya bena Yerushalayime ditalala ne bubanji

¹ Maweja-Nangila wa bukole buonsu kungambila ne:

² “Meme Maweja-Nangila, ndi nnanga Yerushalayime bikole. Ke pandi mfikila baluishi bende munda.

³ Ke pandi ngamba ne: Nempingane mu Yerushalayime. Nensombe mu Siyone tshiakabidi. Bantu nebinyike Yerushalayime ne: ‘Tshimenga tshidi tshilamata Mvidi Mukulu.’ Mukuna wanyi wa Siyone, nebawinyike ne: ‘Mukuna wa tshijila.’

⁴ Eyo, bakulakaja, balume ne bakaji, badi benda bashindamena ku dikombu, nebasombe tshiakabidi mu misesu ya mu Yerushalayime.

⁵ Bana ba balume ne ba bakaji ba bungi, nebanayile tshiakabidi mu misesu ya mu tshimenga.

⁶ Pikala bena Izrayele badi bashale ne muoyi, bamona ne: ebi kabiena mua kuenzeka. Kadi meme Maweja-Nangila wa bukole buonsu, ndi mua kubikumbaja.

⁷ Ndi nnulaya ne: neusungidile bantu banyi, badi mu bupika mu matunga a kudi diba dipatukila ne kudidi dibuelela.

⁸ Nembumushe ku matunga awu, bua kusombabu mu Yerushalayime. Nebikale bantu banyi, meme nengikale Mvidi Mukulu wabu. Nengikale mukalenga wabu, wa muoyi umue, udi ukosa nsambu pa yoyi.”

⁹ Maweja-Nangila wa bukole buonsu, udi wamba ne: “Koleshayi muoyi! Mpindiewu nudi bumvue malaya, avua bambi bamane kunuambila mu dina dianyi, tshikondu tshiyuabu babange kuasulula tshitaku tshia nzubu wanyi.

¹⁰ Ku kale kabavua bafuta muntu, bua mudimu uvuaye wenza, nansha bua mudimu uwa nyama ikuata. Bantu kabavua mua kutambakana mu ditunga, bualu baluishi bavua miaba yonsu, kabidi meme mvua musongakaje bantu.

¹¹ Kadi ndi nnuambila ne: mpindiewu tshiena nkengesha kabidi bena Izrayele badi bashale ne muoyi, mumvua muenze ku kale.

¹² Nentume ditalala mu buloba: mionji ya nwinyo neikuame tumuma, buloba nebumene biakudia, mvula neyiloke ya bungi. Bantu banyi badi bashale ne muoyi, nembapeteshe bintu ebi bionsu.

¹³ Nuenu bena mu bukalenga bua Yuda ne bua Izrayele, nuvua tshilejilu tshia bantu batshipa munkatshi mua bisamba bikuabu. Mpindiewu ndi nnusungidila, nenuikale tshilejilu tshia badibu bela lupemba. Kanutshinyi kabidi! Kolayi muoyi!”

¹⁴ Maweja-Nangila wa bukole buonsu udi wamba ne: “Pamvua mujadike bua kunukengesha, bualu bankambua benu mbamfikishe munda, tshivua mushintulule diyi dianyi.

¹⁵ Kadi mpindiewu ndi mujadike bua kunuela lupemba, nuenu bena Yerushalayime, ne bena ditunga dia Yuda dijima. Nanku kanutshinyi kabidi.

¹⁶ Telejayi munudi mua kuenza: Muntu yonsu ambile muanabu malu malelela. Mu tubadi tuenu nukose nsambu pa yoyi, nupingaje ditalala mu ditunga.

¹⁷ Kanuedi meji a kuenzelangana bibi. Nulekele kutshipa mitshipu ya dishima, bualu meme Maweja-Nangila tshiena muanyishe malu a nanku.”

Matuku a kujila biakudia neashale matuku a kusanka

¹⁸ Maweja-Nangila wa bukole buonsu kungambila ne:

¹⁹ — Matuku anudi nujila biakudia, mu ngondu muinayi, muitanu, wa muanda mutekete, nansha wa dikumi, ku tshidimu tshionsu, neikale a tshibilu tshinene adi bena Yuda basanka, batshionkomoka. Kadi nuambilangane amu malu malelela, nukebe kabidi diakalenga dia bonsu!

²⁰ Maweja-Nangila wa bukole buonsu udi wamba ne: “Bantu ba mu bisamba bikuabu, ne ba mu bimenga bivule, nebafike mu Yerushalayime tshiakabidi.

²¹ Bena mu tshimenga kampanda, nebambile bena mu tshimenga tshikuabu ne: — Tuyayi kutendelela Maweja-Nangila wa bukole buonsu. Tumusengelele bua atuele lupemba. Bobu nebandamune ne: — Eyo, tudi tuya nenu.

²² Bushuwa, bantu ba bungi, ne ba mu bisamba bidi ne bukole, nebalue mu Yerushalayime, nebantendelele, nebansengelele bua mbele lupemba.

²³ Diba adi, bantu dikumi ba mu bisamba bishilangane, nebakuate muena Yuda umue, ku luzemba lua tshilamba, bamuambila ne: ‘Tudi basue kuya nebe, bualu tudi bajingulule ne: Mvidi Mukulu udi kuenu.’ ”