Zekâya 5 - MUKANDA WA MYIDI MUKULU

Maweja-Nangila udi uleja Zekarya malu musangu muisambombu: mukanda wa mulawu

¹ Maweja-Nangila kundeja kabidi bualu bukuabu. Meme kumona muvungu wa mukanda, ubuka mulu.

² Mutumibue wa Mvidi Mukulu kunkonka ne: — Tshiudi umona ntshinyi? Meme kumuandamuna ne: — Ndi mmona muvungu wa mukanda ubuka mulu: udi ne metre dikumi mu bule, ne metre atanu mu butshiama.

³ Ke yeye kungambila ne: — Mu mukanda ewu mudi miaku ya mulawu wa kuela ditunga dijima: luseke lumue lua muvungu wa mukanda mbafunde ne: nebipate bivi bonsu mu ditunga, luseke lukuabu mbafunde ne: nebipate kabidi bonsu badi baditshipa mitshipu ya dishima.

⁴ Maweja-Nangila wa bukole buonsu udi wamba ne: Yeye nkayende neele mulawu ewu; neufike mu nzubu mua muivi yonsu, ne mua muntu yonsu udi uditshipa mitshipu ya dishima mu dina dianyi. Mulawu neushale mu nzubu ewu. Neubutule bionsu bidimu, nansha mikamba ne mabue mene.

Maweja-Nangila udi uleja Zekarya malu musangu wa muanda mutekete: mukaji mu tshibondu

⁵ Mutumibue wa Mvidi Mukulu uvua uyukila nanyi, kungambila ne: — Tangila! Tshiudi umona tshifumina kuaka ntshinyi?

⁶ Meme kumukonka ne: — Ntshinyi etshi? Kungandamunaye ne: — Munda mua tshibondu etshi mudi malu mabi a mu ditunga dijima.

⁷ Diba adi, tshibuikidiji tshia tshiamu tshifike tshia bujitu tshivua ku mushiku wa tshibondu kubulukatshi. Meme kumona mukaji musombe munda mua tshibondu.

⁸ Mutumibue wa Mvidi Mukulu kungambila ne: — Mukaji ewu udi tshimfuanyi tshia Bubi. Pashishe mutumibue wa Mvidi Mukulu kusakila mukaji munda mua tshibondu. Kumubuikilaye tshiakabidi.

⁹ Mbanduluka, meme kumona bakaji babidi babuka mulu, basakila kudi lupepele: bavua ne mapuapua bu a kasonganyunyi. Bobu kuangata tshibondu, kubuka natshi mulu.

¹⁰ Meme kukonka mutumibue wa Mvidi Mukulu ne: — Badi baya ne tshibondu etshi penyi?

¹¹ Kungandamunaye ne: — Badi baya natshi ku Mezopotamiya. Nebatshiashile nzubu, pashishe nebatshienzele tshibumba, bua kutshitekapu.