Zekâya 3 - MUKANDA WA MYIDI MUKULU

Maweja-Nangila udi uleja Zekarya malu musangu muinayi: Yeshuwa mutuangaji munene

¹ Maweja-Nangila kundeja Yeshuwa, mutuangaji munene, muimane kumpala kua mutumibue wa Maweja-Nangila. Satane uvua muimane ku dia balume dia Yeshuwa bua kumufunda ku tshilumbu.

² Mutumibue wa Mvidi Mukulu kuambila Satane, mufundianganyi, ne: — Satane, Maweja-Nangila neakunyoke. Eyo, Maweja-Nangila uvua musungule tshimenga tshia Yerushalayime, neakunyoke. Yeshuwa kena bu tshishelele tshiyuabu bapatule kuiku anyi?

³ Yeshuwa uvua muimane kumpala kua mutumibue wa Mvidi Mukulu, muvuale bilamba bia manyanu.

⁴ Mutumibue wa Mvidi Mukulu kuambila batumibue bavuaye nabu ne: numuvule bilamba abi. Pashishe kuambilaye Yeshuwa ne: — Ndi mukumushe bubi buebe. Nenkuvuadike bilamba bia tshibilu.

⁵ Kubambilaye kabidi bua bajingile Yeshuwa tshitambala tshimpe ku mutu. Nanku kumujingilabu tshitambala ku mutu, kumuvuadika ne bilamba bimpe, mutumibue wa Mvidi Mukulu mutangile.

⁶ Mutumibue wa Mvidi Mukulu kuambila kabidi Yeshuwa ne:

⁷ Maweja-Nangila wa bukole buonsu udi ukulaya ne: “Wewe muitabe mikenji yanyi, mukumbaje bimvua mukufundile, nenkomekele bujitu bua kulama nzubu wanyi wa tshijila ne mbanza yende. Nanku nenkuteleje amu mundi nteleja batumibue badi bankuatshila mudimu muaba ewu.”

Mvidi Mukulu neatume muntu wende

⁸ “Wewe Yeshuwa, mutuangaji munene, teleja. Nuenu batuangaji badi bakuata nende mudimu, telejayi. Nuenu bonsu nudi tshimanyinu tshidi tshijadika ne: matuku adi kumpala nenupete lupandu. Nentume muntu wanyi, dina diende Lutonga.

⁹ Nenteke dibue kumpala kua Yeshuwa. Dibue adi nedikale dimue, kadi nedikale ne nseke muanda mutekete ikenka. Nentape meme nkayanyi miaku pa dibue edi. Nanku, munkatshi mua dituku dimue nengumushe bubi bua bantu, budi bunyanga buloba. Eyo, meme Maweja-Nangila wa bukole buonsu, ndi njadika nanku.

¹⁰ Pafika dituku adi, nenubikilangane bua nusombe talalaa, nusanke ne bintu bia mu madimi enu a mionji ya mvinyo, ne bia mu mitshi ya mfiku.”