Zekâya 11 - MUKANDA WA MYIDI MUKULU

Maweja-Nangila udi utshimuna bakalenga banene

¹ Lebanone, unzulula biibi biebe, kapia kabutule mitshi yebe ya sedre.

² Mitshi ya siprese, asayi miadi. Mbakose mitshi ya sedre, mbabutule mitshi mimpe. Mitshi ya nsanga ya mu Bashane, tuayi mikemu, mbasole difu dienu, divua muntu kayi mua kubuela.

³ Bakalenga ba matunga mbase miadi, tshikondu tshiabu tshia kuditambisha ntshijike. Nyama ya ntambue idi ikungula, bualu mbabutule metu ayi mimpe, ku muelelu wa Yardene.

Balami babidi

⁴ Dituku dikuabu, Maweja-Nangila Mvidi Mukulu wanyi kungambila ne: — Ikala mulami wa mikoku idibu bakeba kushipa.

⁵ Bantu badi bayisumba badi bayishipa, kabayi bitaba ne: tudi ne tshilumbu. Bantu badi bayisumbisha badi bela mbila ne: “Tuele Maweja-Nangila tuasakidila, bualu tudi ne bintu bivule!” Balami bayi mene kabena bayifuila luse.

⁶ Ke pandi meme Maweja-Nangila ngamba ne: Tshiena mfuila bantu ba mu buloba ebu luse kabidi to. Nemfile muntu yonsu mu bianza bia muena mutumba nende, ne mu bianza bia mukalenga wende. Bakalenga nebanyangakaje buloba. Tshiena usungidila muntu ku bianza biabu.

⁷ Ke meme kushala mulami wa mikoku, ivua bangenda mushinga bakeba kushipa. Nanku meme kuangata makombu abidi. Meme kuinyika dikombu dia kumpala ne: “Bulunda,” dibidi ne: “Bobumue.” Ke meme kulama nawu mikoku bimpe!

⁸ Meme kuipata ku mudimu balami basatu ba mikoku, munkatshi mua ngondu umue. Kadi tshivua mulame mikoku ne lutulu, bualu ivua imbenga.

⁹ Ke meme kuyambila ne: — Tshiena musue kunulama kabidi to. Idi ne bua kufua, ifue! Idibu bakeba kushipa, bayishipe! Idi ishala ne muoyi, idiangane nkayayi.

¹⁰ Meme kuangata dikombu dimvua muinyike dina ne: bulunda, kuditshibula, bua kuupula ndondu uvua Maweja-Nangila mutue ne bisamba bionsu.

¹¹ Ndondu kunyanguka dituku adi. Bangenda mushinga ba mikoku eyi bavua bantangile. Kujingululabu ne: Maweja-Nangila ke udi utuambila malu ku bidi muambi wenza.

¹² Meme kubambila ne: — Panudi bamona ne: mbimpe kumfuta, numfute; tshianana nulekele. Ke bobu kubala nkanu ya tshiamu tshitoke tshia mushinga mukole makumi asatu, kumfuta.

¹³ Maweja-Nangila kungambila ne: — Badi bela meji ne: ke mushinga wanyi mujima! Upeshe muntu udi wengulula biamu nkanu eyi ya tshishingashinga! Meme kuangata nkanu ya tshiamu tshitoke tshia mushinga mukole ayi makumi asatu, kuyipesha muntu udi wengulula biamu mu nzubu wa Maweja-Nangila.

¹⁴ Pashishe meme kutshibula dikombu dibidi dimvua muinyike dina dia ne: bobumue, bua kushipa buena muntu pankatshi pa bena Yuda ne bena Izrayele.

¹⁵ Maweja-Nangila kungambila kabidi ne: — Mpindiewu udileje bu mulami wa mikoku mutshimbakane.

¹⁶ Bualu ndi musue kutuma mulami mukuabu wa mikoku mu ditunga: kakutangila mikoku idibu bakeba kushipa, kakukeba idi mijimine, kakuondapa idibu batape, kakudisha itshidi mishale ne bukole. Kadi neadie munyinyi wa idi ne manyi; neayiboze bikonu, bua kayinyemi.

¹⁷ Mulami mutshimbakane udi ushiya mikoku yende, mmuena diakabi. Mvita ibutule bukole budi mu maboku ende, ishipe mesu ende, diboku diende ndiedi diuminyine, disu diende dia balume kadiakumona to!