Yowele 4 - MUKANDA WA MYIDI MUKULU

Mvidi Mukulu nealumbuluishe baluishi ba bantu bende

¹ Maweja-Nangila udi wamba ne: “Tshikondu atshi, bena ditunga dia Yuda ne bena Yerushalayime, bavuabu baye nabu mu bupika, nembapingaje muaba wabu wa kale.

² Nensangishe bisamba bia benyi, nembipuekeshe bionsu mu tshibandabanda, tshidibu binyika ne: ‘Maweja-Nangila udi ukosa nsambu.’ Nembalumbuluishe muaba awu, bua malu avuabu benzele bena Izrayele, bantu banyi. Bavua babamuangalaje munkatshi mua bisamba bikuabu, babanyangane ne ditunga dianyi.

³ Bavua babanyangane bantu banyi, batshinka mua kumanya wa kudibu udi muntu yonsu mua kuangata. Bavua basumbishe bana ba balume, bua kupeta bia kuonda bakaji bena tshiendenda. Bavua basumbishe bana ba bakaji, bua bapete bia kusumba nabi maluvu.

⁴ Nangananga nuenu bena tshimenga tshia Tire ne tshia Sidone, nuenu bantu bonsu badi basomba mu maloba a bena Peleshete, tshinudi basue kungenzela ntshinyi? Nudi basue kudisombuela kundi anyi? Panudi nungenzela bibi, nennupingajile malu mabi onsu anudi nungenzela.

⁵ Nuvua bangate mpawungi wanyi, biamu bitoke bia mushinga mukole, bintu bianyi bia mushinga mukole, nuenu kuya nabi mu nzubu ya mvidie yenu.

⁶ Nuenu kusumbisha bantu bavua basombe mu Yuda ne mu Yerushalayime, kudi bena Ngreke bua kubumusha mu buloba buabu, kubatuma mutantshi mule.

⁷ Kadi meme nembumushe muaba unuvua babasumbishe, nembapingaje kuabu. Nennunyoke, nnupingajile malu mabi anuvua benze.

⁸ Nensumbishe bana benu ba balume ne ba bakaji, kudi bantu badi basomba mu ditunga dia Yuda. Bobu nebabasumbishe kudi bena Saba, badi basomba mutantshi mule. Meme Maweja-Nangila ndi ngamba nanku.”

Mvita ya nshikidilu ne tshilumbuluilu

⁹ Ambilayi bisamba bikuabu ne: “Dilongololayi, nudi ne mvita! Julayi bilobu bienu, bena mvita benu beele mualu wa mvita.

¹⁰ Nkasu yenu inudi nudima nayi, nuyenze miele ya mvita. Miele inudi nunowa nayi bia pa madimi, nuyenze mafuma. Nansha muena bowa, adimone ne: ndi tshilobu.

¹¹ Nuenu bisamba bia bantu badi pa mpenga, luayi lukasa, koleshayi, disangishayi mu tshibandabanda atshi.” Kadi wewe, Maweja-Nangila, tuma bena mvita bebe, babaluishe.

¹² Maweja-Nangila udi wamba ne: “Bisamba bia benyi bijuke, biye mu tshibandabanda, tshidibu binyike ne: ‘Maweja-Nangila udi ukosa nsambu.’ ” Ke muaba undi nsomba, bua kulumbuluisha bisamba bionsu bia pa mpenga.

¹³ Angatayi miele ya kunowa nayi bia pa madimi; bia pa madimi mbimane kuboba. Luayi, nubaboze mudibu baboza tumuma tua nwinyo, buwuja tshikaminu tente. Bubi buabu mbuwule mu milondu, buya ne panshi.

¹⁴ Bisumbu ne bisumbu bia bantu bidi bifika, mu tshibandabanda tshia tshilumbuluilu, bualu dituku didi Maweja-Nangila ukosa nsambu, dikadi pabuipi.

¹⁵ Diba ne ngondu bidi bibuitshidila, mitotu kayitshiena ikenka.

¹⁶ Maweja-Nangila udi ukungula bu nyama wa ntambue pa mukuna wa Siyone, udi wakula utantamana mu Yerushalayime. Diulu ne buloba bidi bizakala! Kadi Maweja-Nangila udi ulama bantu bende, udi tshisokomenu tshia bena Izrayele.

¹⁷ Maweja-Nangila udi wamba ne: “Diba adi nenummanye ne: Ndi Maweja-Nangila Mvidi Mukulu wenu; ndi nsomba mu Siyone, pa mukuna wanyi wa tshijila. Yerushalayime mujima mmushale tshiakabidi muaba wanyi, kashidi bisamba bia benyi kabiena bipitshilamu kabidi.”

Bantu ba Mvidi Mukulu nebapete disanka dipiadipia

¹⁸ Tshikondu netshifike tshidi mionji ya nwinyo idi pa mikuna ikuame tumuma tua bungi, tshidi bimuna bidi pa mikuna bipatula mabele mavule. Mayi neikale mu misulu ya mu Yuda, musulu wa mayi neupatuke mu nzubu wa Maweja-Nangila, ubolesha tshibandabanda tshia ndunga.

¹⁹ Ditunga dia Ejipitu nedishale munda mutupu, ditunga dia Edome nedishale tshipela, bualu bavua bakengesha bena ditunga dia Yuda, bashipa bantu bavua kabayi ne bualu.

²⁰ Eyowa, ndi mbabingisha! Bantu nebase mu ditunga dia Yuda ne mu Yerushalayime.

²¹ Nenku, meme Maweja-Nangila nensombe mu Siyone.