Yowanane 9 - MUKANDA WA MYIDI MUKULU

Yezu udi ujikija disama dia muntu mulela mpofu

¹ Pavua Yezu upita, kumonaye muntu muikale mpofu katshia bamutela.

² Balongi bende kumukonka ne: — Mulongeshi, muntu ewu mbamulele mpofu bua tshinyi? Mbufumine ku bubi buende anyi bua baledi bende?

³ Yezu kubandamuna ne: — Bufofu ebu ki mbufumine ku bubi buende nansha ku bubi bua baledi bende to. Kadi udi mpofu bua midimu ya Mvidi Mukulu imuenekele kudiye.

⁴ Patutshidi mu munya, tudi ne bua kukuata midimu ya uvua muntume. Butuku bukadi pa kuila, budi muntu nansha umue kayi mua kukuata mudimu.

⁵ Pantshidi pa buloba, ndi butoke bua pa buloba.

⁶ Yezu mumane kuamba nanku, kutuilaye mate ende panshi, kusopakaja kabidi ne bitotshi bikese, kulabaye pa mesu a mpofu bitotshi abi.

⁷ Kumuambilaye ne: — Uye kuowa mayi ku mesu ku dijiba dia Silowa. (Dina adi Silowa didi diumvuija ne: “Mutumibue”.) Mpofu kuya ku dijiba, kuowa mayi ku mpala, kupingana umona.

⁸ Bena mutumba nende ne bantu bonsu bavua bamumonamona kale ulombangana bintu bavua bebejangana ne: — Ki mmuntu uvua musombe ulombangana bintu anyi?

⁹ Bamue bavua bamba ne: — Nyeye. Bakuabu bavua bamba ne: — To, ki nyeye nansha, kadi mmumufuane. Kadi uvua mpofu kuamba ne: — Mmeme!

¹⁰ Kumukonkabu ne: — Mesu ebe mmatabale bishi?

¹¹ Kubandamunaye ne: — Muntu udibu binyika ne: Yezu, uvua musope bitotshi ne mate, undaba pa mesu, ungamba ne: “Uye kuowa mayi ku mpala mu dijiba dia Silowa.” Meme kuya ku dijiba, kuowa mayi. Mumane kuowa mayi, meme kushisha kumona.

¹² Kumukonkabu kabidi ne: — Muntu awu udi penyi? Kubandamunaye ne: — Tshiena mumanye.

Baparushe badi balumbuluisha mpofu

¹³ Nanku kuyabu ne uvua mpofu awu kudi Baparushe.

¹⁴ Kadi dituku divua Yezu musopakaje buloba, mumutabeje mesu adi, divua dituku dia Dikisha.

¹⁵ Ke pavua Baparushe kabidi bakonka muntu ewu bivua bimuenzekele bua kutabalaye mpindiewu. Kubambilaye ne: — Uvua mundabe bitotshi bikese pa mesu, meme kuowa mayi ku mpala, diakamue meme kumona.

¹⁶ Bamue Baparushe bavua bamba ne: — Muntu uvua muenze bualu bua nenku kena mua kufumina kudi Mvidi Mukulu to. Bualu kena utumikila mikenji ya dituku dia Dikisha. Kadi bakuabu bavua bamba ne: — Muntu muikale muena malu mabi, udi mua kuenza bishima bia nanku anyi? Ke kupanganganabu munkatshi muabu.

¹⁷ Baparushe kukonka muntu uvua mpofu tshiakabidi ne: — Kadi wewe, bua muntu uvua mukutabaje mesu awu, udi wamba bishi? Kuandamunaye ne: — Udi muambi.

¹⁸ Kadi bamfumu ba bena Yuda kabavua basue kuitaba ne: muntu ewu uvua mpofu, kadi ukadi umona, kabayi banji kubikila baledi bende,

¹⁹ bua kubebeja. Kubakonkabu ne: — Nsongalume ewu mmuana wenu bushuwa anyi? Nudi nujadika ne: mmulela mpofu anyi? Kadi mudiye umona mpindiewu mbishi?

²⁰ Baledi kuandamuna ne: — Tudi bamanye ne: mmuana utuvua balele, kabidi mmulela mpofu.

²¹ Kadi katuena bajingulule mukadiye umona mpindiewu. Katuena bamanye muntu uvua mumutabaje mesu. Numukonke yeye. Ukadi muntu mukole. Udi mua kudilumbuluila!

²² Bavua bandamuna nanku, bualu bavua batshina bamfumu ba bena Yuda. Bualu bamfumu bavua bamane kumyuangana bua kuipata mu nzubu wa kutendelela wa bena Yuda muntu yonsu wajadika ne: Yezu udi Meshiya.

²³ Ke pavua baledi bandamuna ne: “Ukadi muntu mukole. Numukonke!”

²⁴ Baparushe kubikila muntu uvua mpofu awu tshiakabidi, kumuamba ne: — Uditshipe kumpala kua Mvidi Mukulu bua kuamba malu malelela. Tuetu tudi bamanye ne: muntu ewu udi muenji wa malu mabi.

²⁵ Kuandamunaye ne: — Ne udi muenji wa malu mabi, ne kena muenji wa malu mabi, tshiena mumanye to. Kadi tshindi mumanye tshidi amu ne: mvua mpofu, nkadi mmona mpindiewu.

²⁶ Kumukonkabu ne: — Uvua mukuenze tshinyi? Mmukutabaje mesu bishi?

²⁷ Kubandamunaye ne: — Nkadi mumane kunuambila, kadi kanuena banteleje. Nudi basue bua nnuambile tshiakabidi bua tshinyi? Nuenu kabidi nudi basue kudienza balongi bende anyi?

²⁸ Kumupendabu bikole, bamba ne: — Wewe ke udi mulongi wa muntu awu. Kadi tuetu tudi balongi ba Moshe.

²⁹ Tudi bamanye ne: Mvidi Mukulu uvua muakule ne Moshe. Kadi muntu ewu, katuena nansha bamanye kudiye mufume!

³⁰ Muntu kubandamuna ne: — Ebu mbualu bua dikema! Kanuena bamanye kudiye mufume, kadi mmuntabaje mesu!

³¹ Tudi bamanye ne: Mvidi Mukulu kena uteleja benji ba malu mabi. Kadi udi uteleja muntu udi umunemeka, ukumbaja bidiye musue.

³² Katshia katuena banji kumvua ne: muntu mmutabeje mesu a muntu mulela mpofu.

³³ Bu muntu ewu kayi mufume kudi Mvidi Mukulu, kavua mua kuenza bualu nansha bumue to.

³⁴ Ke Baparushe kumuandamuna ne: — Wewe kantu katela kajima mu bubi, ukadi musue kutulongesha anyi? Kumuipatabu mu nzubu wa kutendelela.

Bumpofu bua mu muoyi

³⁵ Yezu kumvua mu wabu bipate mpofu. Kusambakenaye nende, kumukonkaye ne: — Udi witaba Muana wa muntu anyi?

³⁶ Muntu kuandamuna ne: — Mfumu, ungambile ne: Muana wa muntu nnganyi mene, bua mmone mua kumuitaba.

³⁷ Yezu kumuambila ne: — Udi mumumone. Ke muntu mene udi wakula nebe mpindiewu.

³⁸ Muntu awu kuamba ne: — Mfumu, ndi ngitaba. Kutuaye binu panshi kumpala kua Yezu.

³⁹ Ke Yezu kuamba ne: — Ndi mulue pa buloba ebu bua balumbuluishe bantu: bua bampofu bamone, kabidi bua badi bamona bashale bampofu.

⁴⁰ Bamue ba ku Baparushe bavua nende bumvua nanku, kumukonkabu ne: — Tuetu kabidi tudi bampofu anyi?

⁴¹ Yezu kubandamuna ne: — Bu nuenu bampofu, kanuvua mua kupila. Kadi bu munudi nuamba ne: “Tudi tumona,” nudi nushala bena tshibawu.