Yowanane 7 - MUKANDA WA MYIDI MUKULU

Yezu ne bana babu

¹ Pashishe Yezu kuendakana mu ditunga dia Ngalileya. Kavua musue kualukila mu Yudeya, bualu bamfumu ba bena Yuda bavua basue kumushipa.

² Tshibilu tshia bena Yuda tshia tuzubu tua Bisasa tshikavua pabuipi.

³ Bana babu ne Yezu kumuambila ne: — Umuka munemu, uye mu Yudeya bua balongi bebe kabidi bamone midimu iudi ukuata.

⁴ Muntu kena usokoka bidiye wenza padiye musue bua bamumanye. Bu muudi wenza midimu minene nanku, enza bua bantu bonsu bakumone.

⁵ (Bana babu mene kabavua bamuitaba to).

⁶ Yezu kubambila ne: — Dianyi diba kadiena dianji kufika to. Kadi buenu nuenu, diba dionsu ndimpe.

⁷ Ba pa buloba kabena mua kunukina. Kadi badi bankina meme, bualu ndi njadika ne: midimu idibu bakuata mmibi.

⁸ Nuye nuenu ku tshibilu. Meme tshiena nya ku tshibilu etshi to, bualu dianyi diba kadiena dianji kufika.

⁹ Yezu mumane kubambila nanku, kushalaye mu Ngalileya.

Yezu mu tshibilu tshia tuzubu tua Bisasa

¹⁰ Bana babu ne Yezu bamane kuya ku tshibilu atshi, Yezu kabidi kuyamu mu musokoku, kayi musue kudileja kudi bantu.

¹¹ Bamfumu ba bena Yuda bavua bamukeba mu tshibilu atshi, bakonkangana ne: — Udi penyi?

¹² Bantu bavua belangana mpata bikole bualu buende. Bamue bavua bamba ne: “Mmuntu wa malu mimpe.” Bakuabu ne: “To, udi udinga bantu.”

¹³ Kadi kakuvua muntu nansha umue uvua umutela patoke, bualu bavua batshina bamfumu ba bena Yuda.

¹⁴ Matuku a tshibilu akavua pankatshikatshi, ke Yezu kubuela mu nzubu wa Mvidi Mukulu, kubanga kulongesha.

¹⁵ Bena Yuda bavua bakatshila, bamba ne: — Mmunyi mudi muntu ewu mumanye malu bungi nenku, kayi mulonge mikanda.

¹⁶ Ke Yezu kubandamuna ne: — Dilongesha dindi ndongesha kadiena difuma kundi, kadi kudi Mvidi Mukulu uvua muntume.

¹⁷ Muntu udi musue kuenza tshidi Mvidi Mukulu musue, neajingulule mudi dilongesha dianyi difume kudi Mvidi Mukulu, nansha kundi meme nkayanyi.

¹⁸ Muntu udi wakula mu dina diende nkayende udi udikebela lumu. Kadi muntu udi ukuata mudimu bua kutumbisha uvua mumutume, udi wamba malu malelela. Kena ushima ku bualu nansha bumue to.

¹⁹ Moshe uvua munuelele mikenji. Ki mmomu anyi? Kadi kakuena muntu wa kunudi nansha umue udi utumikila mikenji eyi. Kadi nudi nukeba kunshipa bua tshinyi?

²⁰ Bantu kumuandamuna ne: — Udi ne mukishi mubi munda muebe! Udi ukeba kukushipa nnganyi?

²¹ Yezu kubandamuna ne: — Ndi muenze amu tshishima tshimue, nuenu nukadi nukemangana bonsu!

²² Moshe uvua munuelele mukenji wa kuteka bana ba balume panshi. Moshe kavua mutuadije kuenza nanku to, kadi bavua batuadija mbankambua benu. Nudi nuanyisha bua bateke muntu panshi, nansha dituku dia Dikisha!

²³ Panudi nuteka muana wa balume panshi dituku dia Dikisha, bualu kanuena basue kunyanga mikenji ya Moshe, kadi nudi numfikila munda bua tshinyi, pandi meme mujikije disama dijima dia muntu dituku dia Dikisha?

²⁴ Lekelayi kukosa nsambu amu ku malu anudi numona ne mesu. Kadi nulonde tshilumbu tshia muntu kanuyi ne kansungasunga.

Yezu udi Meshiya anyi?

²⁵ Bena mu Yerushalayime bakuabu bavua bakonka ne: — Muntu ewu bamfumu bavua bakeba kumushipa, ki mmomumue anyi?

²⁶ Kadi tangilayi: udi wakula kumpala kua bantu bonsu, kakuyi muntu umuenza bualu! Bamfumu betu mbajadike bulelela ne: udi Meshiya anyi?

²⁷ Kadi pafika Meshiya, muntu kena mua kumanya kudiye ufuma. Kadi muntu ewu tudi bamanye kudiye ufuma.

²⁸ Diba adi Yezu uvua ulongesha mu nzubu wa Mvidi Mukulu. Kuelaye diyi dikole ne: — Nuenu nudi baajingulule meme, bamanye menemene kundi mfuma anyi? Tshiena mudivuile mu dina dianyi to. Kadi uvua muntume, nudi mua kutekemena kudiye. Nuenu kanuena bamumanye.

²⁹ Meme ndi mumumanye, bualu ndi mufume kudiye. Yeye kabidi ke udi muntume.

³⁰ Nanku bantu bavua basue kumukuata. Kadi muntu nansha umue kavua mua kumupeta, bualu diba dia kumukuata kadivua dianji kukumbana.

³¹ Kadi ba bungi ba ku bavua muaba awu, kumuitaba. Bavua bakonkangana ne: “Pafika Meshiya, neenze bishima bipite bivua muntu ewu muenze anyi?”

Badi batuma basolayi bua kukuata Yezu

³² Baparushe kumvua bantu bavule banungana bua Yezu. Ke bamfumu ba batuangaji ne Baparushe kutuma basolayi bua kumukuata.

³³ Kadi Yezu kuamba ne: — Ntshidi kabidi nenu amu bua matuku utabala ku minu, pashishe nenye kudi uvua muntume.

³⁴ Nenunkebe, kadi kanuakummona kabidi. Bualu kanuena mua kuya muaba undi to.

³⁵ Bena Yuda kukonkangana ne: — Nkuepi kuayaye kutudi katuyi mua kumumona? Uyaya kudi bena Yuda badi batangalaka mu bena Ngreke bua kulongesha bena Ngreke anyi?

³⁶ Padiye wamba ne: Nenunkebe kanuyi nummona, bualu kanuena mua kuya kundi nya, tshidiye musue kumvuija ntshinyi?

Misulu ya mayi a muoyi

³⁷ Dituku dia ndekelu dia tshibilu divua dituku dinene dipite. Dituku adi, Yezu kuimana kulu kumpala kua bantu tshisumbu tshinene, wela diyi dikole ne: — Pikala muntu ne nyota, alue kundi, anue.

³⁸ Ke padibu bafunde mu Mikanda ya tshijila ne: “Misulu ya mayi a muoyi neyipueke munda mua muntu udi ungitaba.”

³⁹ (Yezu uvua uleja nanku Mueyelu wa Tshijila uvua bantu bavua bamuitaba ne bua kupeta. Bualu diba adi bantu kabavua banji kupeta Mueyelu wa Tshijila to, bualu Yezu kavua muanji kupeta butumbi buende).

Bantu badi baditapulula bualu bua Yezu

⁴⁰ Ku bantu bavua bamane kumvua muvua Yezu muakule, bamue bavua bamba ne: — Bulelela muntu ewu udi Muambi utudi bindile!

⁴¹ Bakuabu bavua bamba ne: — Yeye ke Meshiya! Kadi bamue bavua bakonka ne: — Meshiya udi mua kufumina mu Ngalileya anyi?

⁴² Mbafunde mu Mikanda ya tshijila ne: Meshiya neikale wa ku ndelanganyi ya Davide. Neatumine mu Betleyeme, mu musoku uvua Davide usomba.

⁴³ Nanku bantu kuditapulula bua Yezu.

⁴⁴ Bamue ba kudibu bavua basue kumukuata. Kadi muntu nansha umue kavua umulenga pambidi.

Bamfumu ba bena Yuda badi babenga kuitaba

⁴⁵ Basolayi kupingana kudi bamfumu ba batuangaji ne kudi Baparushe. Bobu kubakonka ne: — Kanuena balue ne Yezu bua tshinyi?

⁴⁶ Basolayi kuandamuna ne: — Katshia muntu kena muanji kuakula bu muntu ewu!

⁴⁷ Ke Baparushe kubakonka ne: — Mbanudinge ne nuenu kabidi anyi?

⁴⁸ Kudi mfumu wa kutudi nansha umue, nansha muntu wa ku Baparushe uvua mumuitabe anyi?

⁴⁹ Kadi bantu abu kabena bamanye mikenji ya Moshe nansha. Mbantu bavuabu bela mulawu!

⁵⁰ Nikodemu uvua umue wa ku Baparushe bavua muaba awu. Ke yeye uvua muye kumonangana ne Yezu kumpala kua matuku. Kubambilaye ne:

⁵¹ — Bilondeshile mikenji yetu, katuena mua kupisha muntu katuyi banji kumvua bidiye wamba, katuyi bamanye bivuaye muenze.

⁵² Kumuandamunabu ne: — Wewe kabidi udi muena Ngalileya anyi? Longa Mikanda ya tshijila! Neumone ne: muambi nansha umue katshia ki mmuanji kufuma ku Ngalileya. [

⁵³ Pashishe muntu yonsu kupingana kuende.