Yowanane 6 - MUKANDA WA MYIDI MUKULU

Yezu udi udisha bantu binunu bitanu

¹ Pashishe, Yezu kuya dishiya dia dijiba dia Ngalileya (didibu binyika kabidi ne: dia Tiberiyade).

² Bantu ba bungi bavua bamulonda. Bualu bavua bamone bishima bivuaye wenza pavuaye ujikija masama a bantu.

³ Yezu kubanda pa mukuna, kusombapu ne balongi bende.

⁴ Tshibilu tshia bena Yuda tshia Dipita dia Maweja-Nangila tshikavua pabuipi.

⁵ Yezu ukenzakana, kumona tshisumbu tshia bantu tshinene tshienda tshimuvuila. Nanku kukonkaye Filipe ne: — Nkuepi kutudi mua kusumba biakudia bia kubadisha buonsu bungi buabu?

⁶ (Yezu uvua muebeje nanku awu bua kumanya tshivua Filipe mua kuandamuna, bualu uvua mudianze kumanya tshivuaye musue kuenza.)

⁷ Filipe kumuandamuna ne: — Nansha tuetu batula nkanu nkama ibidi ya tshiamu tshitoke tshia mushinga mukole, katuena mua kusumba mampa makumbane bua muntu yonsu wa kudibu kupetaye kapese.

⁸ Umue wa ku balongi bende, dina diende Andre, muanabu ne Simone Petro, kumuambilaye ne:

⁹ — Kudi nsongalume muaba ewu udi ne mampa a orje atanu ne mishipa ibidi. Kadi binebi, bua bantu bungi nenku, tshienzabi ntshinyi?

¹⁰ Ke Yezu kuamba ne: — Sombeshayi bantu bonsu panshi. (Muaba awu uvua mashinde a bungi.) Nanku bantu kusomba panshi. Bantu bavua bu binunu bitanu.

¹¹ Yezu kuangata mampa. Mumane kuela Mvidi Mukulu tuasakidila, kuabanyinaye bavua basombe panshi abu. Kubapeshaye kabidi mishipa, bungi buvuabu basue.

¹² Bonsu bamane kudia kuukuta, Yezu kuambila balongi bende ne: — Sangishayi bipese bionsu bidi bishala, tshipese nansha tshimue katshijiminyi.

¹³ Kusangishabu bipese bia mampa a oije atanu bivua bishala pavuabu bamane kudia. Kuwujabu bisaka dikumi ne bibidi tente.

¹⁴ Bantu bamona tshishima tshivua Yezu muenze, kuambabu ne: — Bulelela, muntu ewu mMuambi uvua ne bua kulua pa buloba!

¹⁵ Yezu kumanya ne: nebankuate ku bukole bua ngikale mukalenga wabu. Nanku kumukaye tshiakabidi, bua kuya ku mukuna nkayende.

Yezu udi wenda pa mayi

¹⁶ Pakavua diba dibuela, balongi bende kupueka ku muelelu wa dijiba.

¹⁷ Kubandabu mu buatu. Kubangata kusabuka dijiba batangila ku Kefamawume. Butuku bukavua bumane kuila. Yezu kavua muanji kufika pavuabu.

¹⁸ Tshipepele tshikole tshivua tshituuta, mayi avua ajula bikole mavuala.

¹⁹ Balongi bavua bamane kuita buatu mutantshi wa kilometre itanu nansha isambombu. Kumonabu Yezu wenda pa mayi, usemena ku buatu. Buowa kubakuata.

²⁰ Kadi Yezu kubambila ne: — Kanutshinyi, mmeme!

²¹ Balongi bavua basue kumubueja mu buatu, kadi diakamue buatu kufika ku muelelu wa dijiba, muaba uvuabu basabukila.

Bantu badi bakeba Yezu

²² Butshia, bantu bavua bashala dia munu dia dijiba, kumonabu ne: buatu muaba ewu buvua amu bumue. Bavua bamanye kabidi ne: Yezu kavua mubande mu buatu pamue ne balongi bende, bualu balongi bavua baye nkayabu.

²³ Kadi matu makuabu afumina ku tshimenga tshia Tiberiyade, avua mafike pepi ne muaba uvuabu badile mampa, pavua Mfumu mumane kuela Mvidi Mukulu tuasakidila.

²⁴ Bantu bamone ne: Yezu kenaku, balongi bende kabenaku, kubandabu mu matu awu. Kuyabu ku Kefamawume, benda bamukeba.

Yezu ke diampa dia muoyi

²⁵ Kusanganabu Yezu dishiya dia dijiba. Kumukonkabu ne: — Mulongeshi, udi mufike apa diba kaayi?

²⁶ Yezu kubandamuna ne: — Ndi nnujadikila ne: nudi nunkeba bualu nuvua badie buukute, kadi kanuvua bajingulule bishima bimvua muenze to.

²⁷ Kanukuatshi mudimu bua biakudia bidi binyanguka. Kadi nuenze mudimu bua biakudia bidi bishala, bifikisha bantu ku muoyi wa kashidi. Muana wa muntu neanupe biakudia abi, bualu Mvidi Mukulu Tatu mmumutue tshitampi tshia bumfumu buende.

²⁸ Ke bantu kumukonka ne: — Kadi tuenze tshinyi bua kukumbaja malu adi Mvidi Mukulu musue?

²⁹ Yezu kubandamuna ne: — Bualu budi Mvidi Mukulu utekemena kunudi, mbua nuenu kuitaba udiye mutume.

³⁰ Kumuambabu ne: — Kadi bualu bua dikema kaayi buudi mua kutuleja bua tukuitabe? Biudi mua kuenza mbinganyi?

³¹ Bankambua betu bavua badie mana mu tshipela, bu mudibu bafunde mu Mukanda wa tshijila ne: “Uvua mubapeshe mampa mafume mu diulu bua kudiabu.”

³² Yezu kubandamuna ne: — Ndi nnujadikila ne: Moshe kavua munupe mampa a mu diulu nansha. Kadi Tatu wanyi ke udi unupa mampa malelela a mu diulu.

³³ Bualu diampa didi Mvidi Mukulu ufila, ke didi difuma mu diulu, dipetesha bantu muoyi.

³⁴ Ke kumuambilabu ne: — Mulongeshi, wikale utupeshaku matuku onsu mampa awu.

³⁵ Ke Yezu kubambila ne: — Meme ndi diampa dia muoyi. Muntu udi ulua kundi kakufua nzala to. Udi ungitaba kakufua nyota nansha.

³⁶ Kadi mvua munuambile ne: nuvua bammone kadi kanuena nungitaba to.

³⁷ Muntu yonsu wa ku badi Tatu umpesha neafike kundi. Yonsu udi ufika kundi, tshiakumuipata to.

³⁸ Bualu ndi mufume mu diulu bua kuenza tshidi udi muntume musue, ki mbua kuenza tshindi meme musue to.

³⁹ Tshidi udi muntume musue ntshiotshi etshi: bua tshijimiji muntu nansha umue wa ku bantu badiye mumpeshe, kabidi bua mbabishe bonsu ku lufu, bapete muoyi dituku dia nshikidilu.

⁴⁰ Eyowa, tshidi Tatu wanyi musue ntshiotshi etshi: bua bonsu badi bamona Muana, bamuitaba, bapete muoyi wa tshiendelele, kabidi bua mbabishe ku lufu, bapete muoyi dituku dia nshikidilu.

⁴¹ Bena Yuda kufikila Yezu munda, bualu uvua muambe ne: “Ndi diampa difume mu diulu.”

⁴² Bavua bakonkangana ne: — Muntu ewu ki nYezu muana wa Yozefe anyi? Tudi bamanye tatuende ne mamuende. Kadi mudiye wamba mpindiewu ne: “Ndi mufume mu diulu mbishi?”

⁴³ Yezu kubandamuna ne: — Lekelayi kufika munda munkatshi muenu.

⁴⁴ Muntu kena mua kufika kundi padi Tatu uvua muntume kayi mumufikishe kundi. Meme nemmubishe ku lufu dituku dia nshikidilu.

⁴⁵ Bambi bavua bafunde ne: “Mvidi Mukulu neabalongeshe bonsu buabu.” Muntu yonsu udi uteleja Tatu, ulonga malu ende, udi ufika kundi.

⁴⁶ Tshiena musue kuamba ne: muntu kampanda mmumane kumona Tatu nansha. Amu uvua mufume kudi Mvidi Mukulu ke uvua mumone Tatu.

⁴⁷ Ndi nnujadikila ne: muntu udi witaba, udi ne muoyi wa tshiendelele.

⁴⁸ Meme ndi diampa dia muoyi.

⁴⁹ Bankambua benu bavua badie mana mu tshipela, kadi kufilabu.

⁵⁰ Diampa didi difuma mu diulu didi nunku, muntu udi udidia kena ufua to.

⁵¹ Meme ndi diampa dia muoyi difume mu diulu. Wadia diampa edi, neashale ne muoyi tshiendelele. Diampa dindi mfila, mmubidi wanyi meme. Ndi ngufila bua bantu bikale ne muoyi.

⁵² Yeye mumane kuamba nanku, bena Yuda kuelangana mpata bikole, bakonkangana ne: — Mmunyi mudi muntu ewu mua kutupesha mubidi wende tuetu kuudia?

⁵³ Yezu kubambila ne: — Ndi nnujadikila ne: nuenu kanuyi badie mubidi wa Muana wa muntu, kanuyi banue mashi ende, kanuakuikala ne muoyi munda muenu to.

⁵⁴ Muntu udi udia mubidi wanyi, unua mashi anyi, udi ne muoyi wa tshiendelele. Meme nemmubishe ku lufu dituku dia nshikidilu bua apete muoyi.

⁵⁵ Bualu mubidi wanyi udi tshiakudia tshilelela, mashi anyi adi tshiakunua tshilelela.

⁵⁶ Udi udia mubidi wanyi, unua mashi anyi, udi ne muoyi munda muanyi, meme kabidi ndi ne muoyi munda muende.

⁵⁷ Tatu uvua muntume udi ne muoyi, meme kabidi ndi ne muoyi kudiye. Momumue kabidi udi undia neapetele muoyi kundi.

⁵⁸ Edi ke diampa difume mu diulu. Kadiena bu divuabu badie kudi bankambua benu bakadi bamane kufua. Muntu udi udia diampa edi neikale ne muoyi tshiendelele.

⁵⁹ Yezu uvua muambe miaku eyi pavuaye ulongesha mu nzubu wa kutendelela wa bena Yuda mu Kefamawume.

Miaku ya muoyi wa tshiendelele

⁶⁰ Balongi ba bungi bamane kumvua muvua Yezu muambe, kuambabu ne: — Dilongesha edi ndikole be! Udi mua kudilaba nnganyi?

⁶¹ Yezu umona ne: balongi bende badi banungana bua miaku eyi, kubakonkaye ne: — Miaku eyi idi mua kundenduisha anyi?

⁶² Kadi nenuenze tshinyi panuamona Muana wa muntu upingana kuvuaye bangabanga?

⁶³ Mueyelu wa Tshijila ke udi ufila muoyi. Muntu nkayende kena ne tshidiye mua kuenza nansha. Miaku imvua munuambile idi Mueyelu ne muoyi.

⁶⁴ Kadi bamue ba munkatshi muenu kabena bitaba nansha. (Bualu Yezu uvua mudianjile kumanya ku tshibangidilu bavua kabayi bitaba. Uvua mumanye kabidi muntu uvua ne bua kumuyila mu tshitungu.)

⁶⁵ Kuambaye kabidi ne: — Ke pamvua munuambile ne: muntu kena mua kufika kundi padi Mvidi Mukulu kayi mumupeshe mushindu wa kuenza nanku.

⁶⁶ Biangatshile ku diba adi, bantu ba bungi kumbukabu kudiye. Kabavua bamulonda kabidi to.

⁶⁷ Yezu kukonka balongi bende dikumi ne babidi ne: — Nuenu kabidi nudi basue kumuka anyi?

⁶⁸ Simone Petro kumuandamuna ne: — Mfumu, netuye kudi nganyi? Wewe ke udi ne miaku idi ifila muoyi wa tshiendelele.

⁶⁹ Mpindiewu tudi tuitaba, tumanya ne: wewe ke wa Tshijila udi mufume kudi Mvidi Mukulu.

⁷⁰ Yezu kubandamuna ne: — Tshivua munusungule bonsu buenu dikumi ne babidi anyi? Kadi umue wenu ndiabolu!

⁷¹ Uvua Yezu wamba awu ke Yudase, muana wa Simone muena mu Iskariyote. Bualu nansha muvua Yudase umue wa ku balongi dikumi ne babidi, uvua ukeba kutungila Yezu tshitungu.