Yowanane 5 - MUKANDA WA MYIDI MUKULU

Yezu udi ujikija disama dia muntu muena tuneke

¹ Bionsu ebi bimane kuenzeka, bena Yuda bavua ne tshibilu. Yezu kabidi kuya ku Yerushalayime.

² Mu tshimenga atshi mudi dijiba ne bitanda bia makunji bia kuikishila bitanu. Dijiba adi didi pepi ne tshiibi tshia Mikoku, badinyike mu buena ebrewu ne: Betzata.

³ Mu bitanda ebi, babedi ba bungi bavua balalamu: ke bampofu, batebuki, bena tuneke. [Bavua bindile bua mayi avunduluke bikole.

⁴ Bualu mutumibue wa Maweja-Nangila uvua upueka meba makuabu mu dijiba amu, uvundulula mayi bikole. Mubedi uvua ubuela mu mayi kumpala pavuawu avunduluka bikole, disama diende divua dijika, nansha diodi dikole bishi.]

⁵ Muaba awu uvua muntu ne disama bidimu makumi asatu ne muanda mukulu.

⁶ Yezu kumumona mulale panshi, kujadika ne: muntu ewu udi usama matuku a bungi. Kumukonkaye ne: — Udi musue disama diebe dijike anyi?

⁷ Mubedi kuandamuna ne: — Mfumu, tshiena ne muntu udi mua kunteka mu dijiba padi mayi avunduluka bikole. Pandi nkeba kuyamu, mukuabu udi udianjila kubuelamu kumpala kuanyi.

⁸ Yezu kumuambila ne: — Juka, ambula tshiata tshiebe, asa luendu.

⁹ Diakamue disama dia muntu kujika. Kuambulaye tshiata tshiende, kuasa luendu. Kadi bu muvua bualu ebu buenzeka dituku dia Dikisha,

¹⁰ bamfumu ba bena Yuda kuambila muntu uvuabu bajikija disama diende ne: — Dituku edi ndia Dikisha. Mikenji yetu kayena mianyishe bua wewe kuambula tshiata tshiebe to.

¹¹ Kubandamunaye ne: — Muntu uvua mujikije disama dianyi uvua mungambile ne: “Ambula tshiata tshiebe, asa luendu.”

¹² Kumukonkabu ne: — Uvua mukuambile ne: “Angata tshiata tshiebe, asa luendu” nnganyi?

¹³ Kadi muntu uvuabu bajikija disama kavua mumanye uvua mumujikijedi. Bualu Yezu uvua mumane kumbuka bua bungi bua bantu bavua muaba awu.

¹⁴ Pashishe Yezu kusambakena ne muntu awu mu nzubu wa Mvidi Mukulu. Kumuambilaye ne: — Teleja. Disama diebe ndijike mpindiewu. Kuenji bualu bubi kabidi, bua bualu bupite bubi kabukukuatshi nansha.

¹⁵ Muntu awu kuya, kuambila bamfumu ba bena Yuda ne: Yezu ke uvua mujikije disama dianyi.

¹⁶ Bamfumu ba bena Yuda kufikila Yezu munda bikole, bualu uvua muenze bualu ebu dituku dia Dikisha.

¹⁷ Kadi Yezu kubandamuna ne: — Tatu wanyi udi ukuata mudimu diba dionsu. Meme kabidi ndi nkuata mudimu.

¹⁸ Biangatshile ku diba adi, bamfumu ba bena Yuda bavua bakeba bikole kumushipa, bualu uvua mushipe mukenji wa dituku dia Dikisha, kabidi uvua muambe ne: Mvidi Mukulu ke Tatuanyi menemene, uditeka nanku mulongu umue ne Mvidi Mukulu.

Bumfumu bua Muana wa Mvidi Mukulu

¹⁹ Yezu kuambila kabidi bamfumu ba bena Yuda ne: — Ndi nnujadikila ne: Muana kena udienzela bualu nansha bumue to. Udi wenza amu bidiye umona Tatu wenza. Tshionsu tshidi Tatu wenza, Muana udi utshienza kabidi.

²⁰ Bualu Tatu udi munange Muana, unuleja bionsu bidiye wenza. Neamuleje malu a kuenza mapite aa bunene. Malu awu neanukemeshe.

²¹ Bualu bu mudi Tatu ubisha bantu bafue, ubapingajila muoyi, ke mudi Muana upesha bantu badiye musue muoyi.

²² Tatu kena ulumbuluisha muntu; kadi mmupeshe Muana bumfumu buonsu bua kulumbuluisha bantu,

²³ bua bantu bonsu banemeke Muana bu mudibu banemeka Tatu. Udi kayi unemeka Muana, kena unemeka Tatu uvua mumutume.

²⁴ Ndi nnujadikila ne: muntu udi uteleja bindi ngamba, witaba uvua muntume, udi ne muoyi wa tshiendelele. Kabena bamupisha ku tshilumbu to. Kadi ukadi mumane kumuka ku lufu, mupete muoyi.

²⁵ Ndi nnujadikila ne: tshikondu tshidi kumpala, ntshimane kufika mene, tshidi bantu bafue bumvue diyi dia Muana wa Mvidi Mukulu. Badi badiumvue nebikale ne muoyi.

²⁶ Bualu bu mudi Tatu ne bumfumu bua kupesha bantu muoyi, ke mudiye mupeshe Muana bumfumu bua kupesha bantu muoyi.

²⁷ Udi mupeshe Muana mudimu wa kulumbuluisha bantu, bualu udi Muana wa muntu.

²⁸ Kanukemi bua bualu ebu nansha. Bualu tshikondu tshidi tshifika tshidi bafue bonsu ba-vuabu bajika bumvue diyi dia Muana wa muntu.

²⁹ Nebapatuke mu nkita yabu. Bavua benza bimpe nebabike bua kupeta muoyi. Kadi bavua benza bibi nebabike bua babapishe.

Dijadika dia bumfumu bua Yezu

³⁰ — Tshiena mua kudienzela bualu nansha bumue to. Ndi nkosa nsambu bilondeshile bidi Mvidi Mukulu ungambila. Ndi nkosa nsambu pa yoyi, bualu tshiena nkeba kuenza tshindi musue, kadi amu tshidi uvua muntume musue.

³¹ Bu meme ndijadikila nkayanyi, bindi ngamba kabiena mua kujadika bualu.

³² Kadi muntu mukuabu ke udi unjadikila bualu. Ndi mumanye ne: tshidiye wamba bualu buanyi tshidi tshitetela.

³³ Nuvua batume bantu kudi Yowanane bua kumukonka bualu buanyi. Yeye kunujadikila malu malelela.

³⁴ Meme tshiena nkengela ne: muntu ajadike bualu. Kadi ndi ngamba nanku amu bua numone mua kupeta lupandu.

³⁵ Yowanane uvua bu muendu mutemesha ukenka. Nuenu kuanyisha bua kusanka tshitupa tshipi ku bukenke buawu.

³⁶ Kadi meme, malu adi ajadika bulelela buanyi mmapite avua ajadika bulelela bua Yowanane. Malu andi ngenza, adi Tatu mumpeshe bua kuenza, ke adi ajadika bulelela buanyi, aleja kabidi ne: Tatu mmuntume.

³⁷ Tatu kabidi uvua muntume udi ujadika malu anyi. Katshia kanuena banji kumvua diyi diende, kanuena banji kumona mpala wende.

³⁸ Kanuena nulama miaku yende munda muenu. Bualu kanuena nuitaba uvuaye mutume.

³⁹ Nudi nulonga malu a mu Mikanda ya tshijila, bualu nudi nuela meji ne: netupetelemu muoyi wa tshiendelele. Kadi mikanda ayi menemene ke idi ijadika bulelela buanyi!

⁴⁰ Kadi kanuena basue kufika kundi bua kupeta muoyi mulelela.

⁴¹ Meme tshiena nkeba bua bantu bantumbishe.

⁴² Kadi ndi numujingulule. Ndi mumanye ne: kanuena banange Mvidi Mukulu munda muenu.

⁴³ Ndi mutumine kudi Tatu wanyi, kadi nuenu kanuena basue kungakidila. Kadi padi muntu mukuabu udiluila kunudi mu dina diende yeye nkayende, nudi numuakidila!

⁴⁴ Nudi basue kutumbishangana, kadi kanuena nukeba butumbi budi bufuma kudi Mvidi Mukulu nkayende. Munudi mua kuitaba mbishi?

⁴⁵ Kadi kanuedi meji ne: nennufunde kudi Tatu wanyi. Moshe unudi batekemene awu, ke wanufunda.

⁴⁶ Bu nuenu bitabe Moshe menemene, nuvua mua kungitaba ne meme kabidi. Bualu Moshe uvua mufunde malu aa bualu buanyi.

⁴⁷ Kadi bu munudi kanuyi nuitaba bivuaye mufunde, munudi mua kuitaba bindi ngamba mbishi?