Yowanane 11 - MUKANDA WA MYIDI MUKULU

Lufu lua Lazare

¹ Kuvua muntu usama, diende Lazare. Uvua musombe mu Betanya, musoku uvua Mariya ne muanabu wa bakaji Marte basomba kabidi.

² (Mariya ewu ke mukaji uvua muele Mfumu manananshi ku makasa, muakupule ne nsuki yende. Nunku muanabu Lazare ke uvua usama).

³ Nsongakaji ibidi eyi kutumina Yezu diyi ne: — Mfumu, mulunda webe udi usama.

⁴ Yezu mumane kumvua lumu elu, kuambaye ne: — Disama dia Lazare ki ndia lufu to. Didi bua kuleja mudi bukole bua butumbi bua Mvidi Mukulu, kabidi bua kutumbisha Muana wa Mvidi Mukulu.

⁵ Yezu uvua munange Marte ne muanabu wa bakaji, kabidi ne Lazare.

⁶ Mumane kumvua ne: Lazare udi usama, kushalaye kabidi matuku abidi kuvuaye aku.

⁷ Pashishe kuambilaye balongi bende ne: — Tupinganayi mu Yudeya.

⁸ Balongi kumuandamuna ne: — Mulongeshi, kudi matuku makese menemene avuabu bakeba kukuasa mabue bua kukushipa. Wewe udi ujinga kupinganamu kabidi anyi?

⁹ Yezu kubandamuna ne: — Dituku dijima kadiena ne meba dikumi ne abidi anyi? Padi muntu wenda munda munya, kena utuuta dikasa ku dibue, bualu udi umona butoke bua panu.

¹⁰ Kadi padi muntu wenda butuku, udi utetuka, bualu butoke kabuena munda muende to.

¹¹ Yezu mumane kubambila nanku, kutungunukaye kabidi ne: — Mulunda wetu Lazare mmulale. Ndi nya kumubisha ku tulu.

¹² Balongi kuandamuna ne: — Mfumu, pikalaye mulale, disama nedijike.

¹³ Yezu uvua musue kuamba ne: Lazare mmumane kufua. Kadi balongi bavua bela meji ne: Yezu udi wamba bua tulu tua misangu yonsu.

¹⁴ Ke Yezu kubatokeshila ne: — Lazare mmumane kufua.

¹⁵ Ndi ne disanka buenu nuenu bua pamvua tshiyi muaba awu, bua nanku numone mua kungitaba. Kadi tuyayi kudiye.

¹⁶ Kadi Tomase udibu binyika ne: Dipasa, kuambilaye balongi bakuabu ne: — Tuyayi bonsu ne Mulongeshi, batushipe nende!

Yezu udi dibika ne muoyi

¹⁷ Yezu mumane kufika, kusanganaye bamane kujika Lazare kupita matuku anayi.

¹⁸ Betanya udi pabuipi ne Yerushalayime mutantshi wa kilometre bu isatu.

¹⁹ Bena Yuda ba bungi bavua balue kusamba Marte ne Mariya bua lufu lua muanabu.

²⁰ Marte mumane kumvua ne: Yezu udi ufika, kuyaye kumuakana. Kadi Mariya uvua mushale musombe mu nzubu.

²¹ Marte kuambila Yezu ne: — Mfumu, bu wewe muikalepu, muanetu kavua mua kufua to.

²² Kadi ndi mumanye ne: nansha mpindiewu, Mvidi Mukulu neakupe tshionsu tshiwamulomba.

²³ Yezu kumuambila ne: — Muanenu neabike ku lufu.

²⁴ Marte kuandamuna ne: — Ndi mumanye ne: neabike ku lufu, pabika bafue bonsu dituku dia nshikidilu.

²⁵ Yezu kumuambila ne: — Meme ke udi ubisha bantu ku lufu, ubapesha muoyi. Muntu yonsu udi ungitaba, neikale ne muoyi, nansha yeye ufua.

²⁶ Yonsu udi ne muoyi, ungitaba, kena ufua nansha. Udi witaba nanku anyi?

²⁷ Marte kuandamuna ne: — Eyowa, Mfumu, ndi ngitaba ne: Wewe udi Meshiya, Muana wa Mvidi Mukulu udi ne bua kulua pa buloba.

Yezu udi udila muadi

²⁸ Marte mumane kuamba nanku, kuyaye kubikila muanabu wa bakaji Mariya, umuambila ku luseke ne: — Mulongeshi ukadi mufike. Udi ukubikila.

²⁹ Mariya umvua nanku, kujukaye diakamue. Kuyaye kudi Yezu.

³⁰ (Yezu kavua muanji kubuela mu musoku. Utshivua amu kuvua Marte muye kumuakana.)

³¹ Pavua bena Yuda bavua ne Mariya mu nzubu bua kumusamba bamumona ujuka upatuka lukasa, kumulondabu. Bavua bela meji ne: udi uya ku lukita bua kudilamu muadi.

³² Mariya ufika muaba uvua Yezu, umumona, kudielaye ku makasa ende, wamba ne: — Mfumu, bu wewe muikalepu, muanetu kavua mua kufua.

³³ Yezu umona muvua Mariya udila, kabidi umvua bena Yuda bavuaye muvue nabu badila, kubungamaye bikole, ubinduluka.

³⁴ Kubakonkaye ne: — Nudi bamujike penyi? Kumuandamunabu ne: — Mfumu, luaku umone.

³⁵ Ke Yezu kudila.

³⁶ Bena Yuda kuamba ne: — Monayi muvuaye mumunange bikole!

³⁷ Kadi bamue ba kudibu bavua bamba ne: — Muntu ewu uvua mutabaje mpofu mesu, muvuaye kayi mua kukuata mudimu bua Lazare kafu mbishi?

Lazare udi ubika ku lufu

³⁸ Yezu kuwula tshiakabidi ne tshinyongopelu tshikole. Kuyaye ku lukita luvuabu bumbula mu lubuebue, babuikila ku mushiku ne dibue.

³⁹ Yezu kuamba ne: — Umushayi dibue. Marte, muanabu ne mufue, kuamba ne: — Mfumu, ukadi ununka bibi, bualu mbamujike kukadi matuku anayi.

⁴⁰ Yezu kumuandamuna ne: — Tshivua mukuambile ne: wewe muitabe, neumone butumbi bua Mvidi Mukulu anyi?

⁴¹ Bantu kumusha dibue. Yezu utangila mulu, kuamba ne: — Tatu, ndi nkuela tuasakidila, bualu uvua munteleje.

⁴² Ndi mumanye ne: udi unteleja misangu yonsu. Kadi ndi ngamba nanku, bua bantu badi bannyungulukila bitabe ne: wewe ke uvua muntume.

⁴³ Yezu mumane kuamba nanku, kuelaye diyi dikole ne: — Lazare, patuka!

⁴⁴ Mufue kupatuka, makasa ne bianza bijingila mikaba ya bilamba, mpala mubuikila tshitambala. Yezu kubambila ne: — Mukutululayi, numulekele aye.

Badi belela Yezu tshifufu tshibi

⁴⁵ Bena Yuda ba bungi ba munkatshi mua bavua balue kudi Mariya, bamone bivua Yezu muenze, kumuitababu.

⁴⁶ Kadi bamue ba kudibu kuya kudi Baparushe, kubalondela muvua Yezu muenze.

⁴⁷ Baparushe ne bamfumu ba batuangaji kudisangisha mu Tshipangu tshiabu tshikulu. Kuebejanganabu ne: — Netuenze tshinyi? Bualu muntu ewu udi wenza bishima bivule!

⁴⁸ Tuetu bamulekele wenza nunku, bantu bonsu nebamuitabe. Pashishe bamfumu ba bena Rome nebafike bua kunyanga nzubu wetu wa Mvidi Mukulu ne tshisamba tshietu!

⁴⁹ Umue wa kudibu, diende Kayifa, uvua mutuangaji munene tshidimu atshi, kubambilaye ne: — Kanuena bajingulule bualu nansha bumue to!

⁵⁰ Kanuena numona ne: mbimpe muntu umue afuile bantu, bua tshisamba tshijima katshibutuki anyi?

⁵¹ (Kavua muambe nanku ku meji ende yeye nkayende. Kadi bu muvuaye mutuangaji munene tshidimu atshi, Mvidi Mukulu uvua mumuakuishe ne: Yezu uvua ne bua kutuila tshisamba tshia bena Yuda,

⁵² kadi kavua ne bua kutuila amu tshisamba etshi nkayatshi, kadi mmufue kabidi bua kusangisha mu bobumue bantu bonsu ba Mvidi Mukulu bavuabu batangalaje.)

⁵³ Biangatshile dituku adi, bamfumu ba bena Yuda kujadikabo bua kushipesha Yezu.

⁵⁴ Ke pavua Yezu katshiyi wendakana kabidi patoke munkatshi mua bena Yuda to. Kuyaye mu ditunga divua pabuipi ne tshipela, mu musoku uvuabu binyika ne: Efrayime. Kushalayemu ne balongi bende.

⁵⁵ Tshibilu tshia bena Yuda tshia Dipita dia Maweja-Nangila tshivua pabuipi. Bantu ba bungi ba mu ditunga bavua baya mu Yerushalayime, tshibilu etshi katshiyi tshianji kuenzeka, bua bumushe mikiya yabu.

⁵⁶ Bavua bakeba Yezu. Pavuabu mu nzubu wa Mvidi Mukulu, bavua bebejangana ne: — Nudi nuela meji bishi? Udi mua kulua mu tshibilu anyi kena ulua?

⁵⁷ Bamfumu ba batuangaji ne Baparushe bavua bamane kuela mukenji ne: Muntu yeye mumanye muaba udi Yezu, amanyishe bua tumone mua kumukuata.