Yowanane 10 - MUKANDA WA MYIDI MUKULU

Lusumuinu lua mulami wa mikoku

¹ — Ndi nnujadikila bulelela ne: muntu udi kayi ubuelela ku tshiibi tshia lupangu lua mikoku, kadi usambukila muaba mukuabu pa tshimana, mmuivi kabidi mmuena mutshima.

² Kadi udi ubuelela ku tshiibi, mmulami wa mikoku.

³ Mulami wa ku tshiibi udi umunzuluila tshiibi, mikoku idi iteleja diyi diende. Udi ubikila mikoku yende, mukoku onsu mu dina diawu, uyipatula pambelu.

⁴ Yeye mumane kuyipatula yonsu, udi wenda kumpala kuayi. Yoyi idi imulonda munyima, bualu idi mimanye diyi diende.

⁵ Kadi kayena mua kulonda muntu udiyi kayiyi mimanye. Neyimunyeme kule, bualu kayena mimanye diyi diende.

⁶ Yezu uvua mubele lusumuinu elu, kadi bobu kabavua bajingulula tshivuaye musue kubambila.

Yezu udi mulami muimpe wa mikoku

⁷ Yezu kuamba kabidi ne: — Ndi nnujadikila ne: meme ndi tshiibi tshia lupangu lua mikoku.

⁸ Bonsu bavua badianjidile kumpala kuanyi mbivi, kabidi mbena mutshima. Kadi mikoku kayivua mibateleje.

⁹ Ndi tshiibi. Muntu udi ubuelela kundi neapande. Neabuele, neapatuke, neapete kabidi tshiakudia tshiende.

¹⁰ Muivi udi ufika amu bua kuiba, kushipa ne kubutula. Meme ndi mulue bua bantu bapete muoyi, baupete wa bungi.

¹¹ Ndi mulami muimpe wa mikoku. Mulami muimpe wa mikoku udi ufuila mikoku yende.

¹² Muntu udi ukuata mudimu amu bua kupeta difutu, kayi mulami wa mikoku, kabidi kayi muena mikoku, padiye umona nyama wa lonji ufika, udi ulekela mikoku, unyema. Nanku nyama wa lonji udi uyikuata, uyitangalaja.

¹³ Udi unyema, bualu mmuena mudimu udi ukeba difutu. Kena bualu ne mikoku to.

^14-15 Ndi mulami muimpe wa mikoku. Mudi Tatu mummanye, kabidi mundi mumanye Tatu, ke mundi mumanye mikoku yanyi, mikoku yanyi kabidi idi mimmanye. Ndi mfila kabidi muoyi wanyi bua mikoku yanyi.

¹⁶ Ndi kabidi ne mikoku mikuabu idi kayiyi mu lupangu elu. Ndi ne bua kuyilombola kabidi. Neyiteleje diyi dianyi. Neyenze tshisumbu amu tshimue, tshikale ne mulami amu umue.

¹⁷ Tatu mmunnange, bualu ndi mfila muoyi wanyi bua meme kuwangata tshiakabidi.

¹⁸ Kakuena muntu udi unnyenga muoyi wanyi, kadi ndi ngufila mundi musue. Ndi ne bumfumu bua kuufila, kabidi ne bumfumu bua kuwangata tshiakabidi. Ke mukenji udi Tatu mungelele bua meme kuenza.

¹⁹ Bena Yuda kutapulukangana tshiakabidi ku meyi aa.

²⁰ Ba bungi ba munkatshi muabu bavua bamba ne: — Udi ne mukishi mubi munda! Mmupale! Nudi numuteleja bua tshinyi?

²¹ Kadi bakuabu bavua bamba ne: — Muntu ne mukishi mubi munda kena mua kuakula nenku to. Mukishi mubi udi mua kutabaja bampofu mesu anyi?

Bena Yuda badi babenga Yezu

²² Diba adi, bena mu Yerushalayime bavua benza tshibilu tshia mufikilu wa Dijidila dia nzubu wa Mvidi Mukulu. Tshikondu atshi tshiena tshia mashika.

²³ Yezu uvua utambakana mu lutanda lua nzubu wa Mvidi Mukulu, luvuabu binyika ne: ndua Shelomu.

²⁴ Ke bena Yuda kumunguila, bamukonka ne: — Neutupampakaje too ne ku diba kaayi? Paudi Meshiya, utuambile patoke.

²⁵ Yezu kubandamuna ne: — Nkadi mumane kunuambila bualu ebu, kadi kanuena nungitaba to. Midimu indi nkuata ne bumfumu bua Tatu wanyi, idi injadikila bulelela.

²⁶ Kadi kanuena nuitaba, bualu kanuena ba mu mikoku yanyi.

²⁷ Mikoku yanyi idi iteleja diyi dianyi. Ndi muyimanye. Idi indonda.

²⁸ Ndi nyipesha muoyi wa tshiendelele. Katshia kayakufua nansha. Muntu nansha umue kena mua kuyinyenga ku tshianza tshianyi.

²⁹ Tshidi Tatu mumpeshe ntshipite bionsu. Muntu nansha umue kena mua kunyenga Tatu tshintu mu tshianza tshiende.

³⁰ Tatu ne meme tudi tshintu tshimue.

³¹ Bena Yuda kuambula tshiakabidi mabue bua kumuasa.

³² Ke Yezu kubambila ne: — Ndi mukuate midimu mivule mimpe ku mesu enu ne bumfumu buvua Tatu mumpeshe. Ku midimu eyi, mbua mudimu kaayi bunudi basue kunshipela ne mabue?

³³ Bena Yuda kuandamuna ne: — Katuena basue kukushipa ne mabue bua mudimu muimpe uudi ukuata, kadi bualu udi usendeka Mvidi Mukulu. Wewe udi amu muntu, kadi udi musue kudienza Mvidi Mukulu.

³⁴ Yezu kubandamuna ne: — Mu mukanda wenu wa Mikenji mbafunde ne: Mvidi Mukulu uvua muambe ne: “Nudi nwidie.”

³⁵ Tudi bamanye ne: kabena mua kushipa tshidi Mukanda wa tshijila ujadika. Bavuaye umanyisha miaku yende, Mvidi Mukulu uvua mubinyike ne: mmvidie.

³⁶ Nanku meme, Mvidi Mukulu mmunsungule, muntume pa buloba. Mmunyi munudi nungamba ne: udi usendeka Mvidi Mukulu, pandi njadika ne: ndi Muana wa Mvidi Mukulu?

³⁷ Pandi tshiyi nkuata midimu ya Tatu wanyi, kanuena ne bua kungitaba to.

³⁸ Kadi pandi nyikuata, nansha kanuyi nungitaba meme, itabilayi nansha bua midimu, bua mimanye amu ne: Tatu udi munda muanyi, meme kabidi ndi munda muende.

³⁹ Bavua bakeba kabidi kumukuata, kadi yeye kongoloka.

⁴⁰ Yezu kuya tshiakabidi dishiya dia musulu wa Yardene, muaba uvua Yowanane mudianjidile kutua bantu mu mayi. Kusombayemu.

⁴¹ Bantu ba bungi bavua baya kudiye, bamba ne: — Yowanane kavua muenze tshishima nansha tshimue. Kadi bionsu bivuaye muambe bua muntu ewu mbilelela.

⁴² Muaba awu bantu ba bungi kuitaba Yezu.