Yoshua 9 - MUKANDA WA MYIDI MUKULU

Bena Izrayele badi batua ndondu ne bena Ngibone

¹ Bakalenga bonsu bavua base luseke ludi diba dibuelela lua musulu wa Yardene, bavua bumvue muvua bena Izrayele banyangakaje tshimenga tshia Ayi: ke bakalenga bonsu bavua ku mikuna, mu mpata, ne ku muelelu wa Mayi manene a pankatshi pa matunga, too ne ku Lebanone. Nanku bakalenga ba bena Iti, bena Amore, bena Kenaane, bena Perizi, bena Ivi ne bena Yebusa,

² kudisangisha bua kuluisha Yoshuwa ne bena Izrayele.

³ Kadi bena Ngibone bavua bena Ivi, kumvuabu muvua Yoshuwa munyangakaje tshimenga tshia Yeriko ne tshia Ayi.

⁴ Nanku kumvuanganabu bua kushima bena Izrayele. Kuangatabu bintu bia kudia mu njila. Kuambuishabu nyama yabu ya mpunde, bibombi bia kale bimane kusunsuka, ne milondu ya kale ya biseba, ivua ne mvinyo, mipandike kabidi mitelakaje.

⁵ Kuvualabu mikusu, kuela bisabata bisunsuke bitelulula, kuangata mampa mamane kunyanguka, kabidi masunsuke.

⁶ Pashishe kuyabu mu mitanda ya Ngilgale, muaba uvua Yoshuwa ne bena Izrayele basombe. Kubambilabu ne: — Tuetu aba tudi bafume mu ditunga dia kule, tudi tunulomba bua kutua nenu ndondu.

⁷ Bena Izrayele kubandamuna ne: — Misangu mikuabu nudi bena mutumba. Nanku katuena mua kutua nenu ndondu to.

⁸ Bena Ngibone kujadikila Yoshuwa ne: — Tudi bamane kudilongolola bua kuikala nansha bapika bebe. Kadi Yoshuwa kubebeja ne: — Nuenu nudi banganyi? Nudi mifuma penyi?

⁹ Kuandamunabu ne: — Tuetu tudi bapika bebe. Tudi bafume mutantshi mule. Bualu tudi bamane kumvua lumu lua Maweja-Nangila Mvidi Mukulu webe. Tudi bamanye malu a dikema avuaye muenze mu ditunga dia Ejipitu.

¹⁰ Kabidi tudi bamanye muvuaye mukengeshe bakalenga babidi ba bena Amore bavua dishiya dia musulu wa Yardene. Bakalenga aba ke: Sihone, mukalenga wa Eshebone, ne Oge, mukalenga wa Bashane, uvua musombe mu Ashetarote.

¹¹ Bakulu betu ba meku, ne bana betu bakuabu bonsu, bavua batuambila bua kuangata bintu bia kudia mu njila ne kufika muaba ewu bua tumonangane nenu. Mbatutume bua tuikale bapika benu. Nanku tudi Umulomba bua tutue nenu ndondu.

¹² Monayi mukadi mampa aa. Musangu utuvua baangate ku nzubu yetu bua kulua nawu kunu, atshivua amu ne luya. Kadi tangila mpindiewu, adi mume, kabidi masunsuke.

¹³ Musangu utuvua bangate milondu eyi ya biseba bia nyama, bayuwuje ne maluvu itshivua amu mipiamipia. Kadi monayi lelu yonsu mmimane kupandika. Bilamba bietu ne bisabata bietu bidi bisunsuke bikole, amu bua luendu lua mutantshi mule lutuvua bende.

¹⁴ Bena Izrayele kulengulula bua kukonka Maweja-Nangila tshilumbu tshia bantu aba. Kudiabu ne bintu bivuabu nabi.

¹⁵ Yoshuwa kutua nabu ndondu mu ditalala, ubajadikila ne: katuena tunushipa to. Ke balombodi ba bena Izrayele kuditshipa, bajadike ndondu awu.

¹⁶ Bobu bamane kutua nabu ndondu, matuku asatu apita, bena Izrayele kumvua muvua bantu abu bena mutumba nabu menemene.

¹⁷ Nanku bena Izrayele kuenza luendu lua matuku asatu, too ne mu bimenga bia bantu abu: ke tshimenga tshia Ngibone, tshia Kefira, tshia Beyerote ne tshia Kiriyate-Yeyarime.

¹⁸ Kadi bena Izrayele kabawa babashipa, bualu balombodi ba bena Izrayele bavua bamane kutua nabu ndondu mu dina dia Maweja-Nangila Mvidi Mukulu wa bena Izrayele. Bena Izrayele bonsu kutuadija kujana balombodi babu.

¹⁹ Kadi balombodi kubandamuna ne: — Katuena mua kushipa bantu aba to, bualu tudi bamane kuditshipa mu dina dia Maweja-Nangila Mvidi Mukulu wa bena Izrayele.

²⁰ Tudi tubalekela ne muoyi, bualu tudi bamane kuditshipa. Tuetu katuyi benze nanku, Mvidi Mukulu neatufikile munda. Kadi umvuayi tshitudi basue kuenza:

²¹ tudi tubashiya ne muoyi. Kadi tudi tubapesha mudimu wa kutukosela nkunyi, ne wa kutusunyina mayi. Ke muvua balombodi bakosa tshilumbu atshi nanku.

²² Ke Yoshuwa kubikila bena Ngibone, kubakonka ne: — Nuenu nudi bena mutumba netu. Kadi nudi batushime ne: tudi bafume mutantshi mule bua tshinyi?

²³ Mpindiewu nudi bena diakabi: nenushale bonsu bapika kashidi. Nenukose nkunyi, nusuna ne mayi bua nzubu wa Mvidi Mukulu wanyi.

²⁴ Bena Ngibone kuandamuna ne: — Teleja tshitudi benzela bionsu ebi. Tuetu tuvua bamane kumvua muvua Maweja-Nangila Mvidi Mukulu webe muambile Moshe, muntu wende, bua kunupa ditunga edi dijima. Uvua mumane kunuambila bua nuenu kubutula bena ditunga edi ku kakese ku kakese, panudi nuenda nusemena. Nanku tuvua banutshine bikole. Tuvua bakeba kudipandisha ku lufu.

²⁵ Mpindiewu tudi bantu benu. Nuenze netu munudi basue.

²⁶ Ke Yoshuwa kubenzela malu aa: kukandika bena Izrayele bua kabashipi bena Ngibone;

²⁷ kupesha bena Ngibone mudimu wa kukosa nkunyi, kusunyina bena Izrayele mayi, ne kusuna mayi bua tshilambuilu tshia Maweja-Nangila, muaba wikale Maweja-Nangila usungula. Nanku ndelanganyi ya bena Ngibone itshidi ikuata midimu eyi too ne ku lelu.