Yoshua 8 - MUKANDA WA MYIDI MUKULU

Bena Izrayele badi bakuata Ayi

¹ Maweja-Nangila kuambila Yoshuwa ne: — Kutshinyi, kuzakadi. Angata bena mvita bebe bonsu. Nuye kuluisha bena tshimenga tshia Ayi. Meme ndi nkupesha mukalenga wa bena Ayi, bantu bende, tshimenga tshiende, ne ditunga diende dijima.

² Nenuenzele tshimenga atshi ne mukalenga watshi, anu bu munuvua benzele tshimenga tshia Yeriko ne mukalenga watshi. Kadi wewe ne bena mvita bebe bonsu, nenuangate bintu bionsu binuasangana mu tshimenga atshi too ne bimuna, bishale bintu bienu. Utume bantu panyima pa tshimenga baye kujikidila baluishi padibu kabayi banji kudilongolola.

³ Yoshuwa kudilongolola bua kuya kuluishi bena Ayi pamue ne bena mvita bende bonsu. Kusungulaye bantu binunu makumi asatu, batshivua ne bukole bua kuluangana mvita. Kubatumaye butuku,

⁴ ubambila ne: — Ndayi kusokoma pa nyima pa tshimenga tshia Ayi, mutantshi muipi. Nuikale badikumbaje bua kuluangana.

⁵ Meme ndi ngenda nsemena mu tshimenga tshia Ayi ne bena mvita bandi nabu. Padi bena mvita bapatuka bua kutuluisha, nelubanyeme bu mutuvua benze musangu wa kumpala.

⁶ Bobu nebatulondakaje. Netubafikishe mutantshi mule ne tshimenga. Nebele meji ne: tudi tubanyeme bu mutuvua banyeme musangu mukuabu.

⁷ Diba adi, nuenu nenujuke miaba inudi basokome. Nenukuate tshimenga, bualu Maweja-Nangila Mvidi Mukulu wenu udi munupatshi.

⁸ Amu nuenu bamane kukuata tshimenga, nutshioshe bilondeshile diyi dia Maweja-Nangila. Nukumbaje menemene bindi nnuambila ebi.

⁹ Yoshuwa kutuma bena mvita ku Ayi, ku muaba uvuabu basungule bua kubundila bena mu tshimenga. Bobu kuimana pankatshi pa tshimenga tshia Betele ne tshia Ayi, luseke ludi diba dibuelela lua tshimenga tshia Ayi. Yoshuwa uvua mulale mu mitanda muaba uvua bena mvita bakuabu bashale.

¹⁰ Butshia dinda, pa kabundubundu, Yoshuwa kuya kukenketa bena mvita bende. Pashishe kuyaye nabu pamue ne bakulu ba meku a bena Izrayele bua kuluisha bena Ayi.

¹¹ Yoshuwa ne bena mvita bonsu kutungunuka balulamangane ne tshimenga. Kuimanyinabu ku luseke lua ku mutu kua tshimenga. Pankatshi pabu ne tshimenga atshi pavua tshibandabanda.

¹² Yoshuwa kusungula bantu balume bavua ne bukole bua kuluangana mvita bu binunu bitanu. Uvua mubambile bua basokome pankatshi pa tshimenga tshia Betele ne tshia Ayi, luseke ludi diba dibuelela lua tshimenga.

¹³ Bena mvita bakuabu kuasa mitanda ku mutu kua tshimenga. Kadi bamue bena mvita bavua anu basokome luseke ludi diba dibuelela lua tshimenga. Butuku abu, Yoshuwa uvua mulale mu tshibandabanda.

¹⁴ Butshia dinda, mukalenga wa mu tshimenga tshia Ayi, umona bena Izrayele, kupatukaye mu tshimenga ne bena mvita bende bonsu, bua kuluisha bena Izrayele, anu muaba uvuabu baluishilangana musangu mukuabu, luseke lua ku tshibandabanda tshia ku musulu wa Yardene. Mukalenga kuvua mumanye ne: bena mvita ba bena Izrayele mbamane kutualamina panyima pa tshimenga to.

¹⁵ Yoshuwa ne bena Izrayele kushima bu badi kabayi ne bukole, kunyema mu mpata batangile mu tshipela.

¹⁶ Balombodi ba tshimenga tshia Ayi kuela mukenji bua bena mvita bonsu balondakaje bena Izrayele. Bobu kubalondakaja, kumuka kushiya tshimenga mutantshi mule.

¹⁷ Mu Ayi kushala kamuyi muntu mulume nansha umue. Bantu bonsu bavua balondakaja anu bena Izrayele, bashiye mu tshimenga kamuyi baluanganyi ba mvita.

¹⁸ Nanku Maweja-Nangila kuambila Yoshuwa ne: — Sempela ne difuma diebe mutangile luseke lua tshimenga tshia Ayi, bualu ndi nkupesha tshimenga etshi, bua utshikuate. Yoshuwa kuenza muvua Maweja-Nangila mumuambile.

¹⁹ Anu Yoshuwa olola tshianza mutangije mu tshimenga tshia Ayi, bena mvita ba bena Izrayele bavua basokome, kupatuka lukasa, kunyema kubuela mu tshimenga, kutshikuata, kutshiosha diakamue.

²⁰ Bena mvita ba mu tshimenga tshia Ayi, batangile panyima, bavua bamona muinshi ujukila mu tshimenga tshiabu. Kumonabu ne: katuena mua kupingana kabidi muetu mu tshimenga. Bualu bena Izrayele bavua banyemena batangile ku tshipela, bavua bapingana kudi bena Ayi bua kubaluisha.

²¹ Bualu Yoshuwa ne bena mvita bavuaye nabu, bamone ne: bena mvita babu bavua basokome panyima pa tshimenga tshia Ayi, mbamane kutshikuata, batshiosha, kukudimukilabu bena Ayi bua kubaluisha.

²² Bena Izrayele bavua bamane kukuata tshimenga, kupatukabu pabu mu tshimenga bua kuluisha bena Ayi. Nenku bena Izrayele bavua babajikidila nseke yonsu, babalamina. Muntu nansha umue kuvua mua kunyema to. Kabidi kakuvua muntu uvua mua kushala ne muoyi.

²³ Kadi bavua bakuate ne muoyi anu mukalenga wa tshimenga tshia Ayi, bamufite kudi Yoshuwa.

²⁴ Bena Izrayele bavua bashipa baluishi babu munkatshi mua mpata, muaba uvua baluishi abu babalondakaja. Bobu bamane kubutula bena Ayi bonsu, kakuyi kushala muntu nansha umue, kupinganabu kabidi mu tshimenga tshia Ayi. Kubutulabu bantu bonsu bavua bashale ne muoyi.

²⁵ Dituku adi, bantu ba mu tshimenga tshia Ayi bonsu, balume ne bakaji, bavua bena Izrayele bashipe bavua binunu dikumi ne bibidi.

²⁶ Yoshuwa uvua usempela ne difuma ditangije mu tshimenga tshia Ayi too ne pabutudibu bantu bonsu.

²⁷ Bilondeshile muvua Maweja-Nangila mumane kuambila Yoshuwa, bena Izrayele kuangata anu bintu ne bimuna bivuabu basangana mu tshimenga.

²⁸ Yoshuwa kuosha tshimenga atshi. Kushalatshi kashidi amu mushiki wa mabue, tshipela, too ne lelu.

²⁹ Pashishe kuelabu mukalenga wa Ayi kulu kua mutshi, kumowabu. Tshitalu tshiende kushala ku mutshi aku too ne ku dilolu. Pambi diba kubuela, Yoshuwa kutuma diyi bua batutete tshitalu atshi. Bavua batshimansha pabuipi ne tshiibi tshia tshimenga tshia Ayi. Pashishe kungujilabu mushiki wa mabue pa tshitalu atshi. Mabue awu atshidipu too ne ku lelu.

Yoshuwa udi ubadila bena Izrayele mikenji

³⁰ Yoshuwa kuashila Maweja-Nangila Mvidi Mukulu wa bena Izrayele tshilambuilu pa mukuna wa Ebale.

³¹ Uvua muase tshilambuilu atshi, anu mushindu uvua Moshe, muntu wa Maweja-Nangila, muambile bena Izrayele. Mushindu uvuabu base tshilambuilu bavua bamane kuufunda mu mukanda wa mikenji ya Moshe. Bavua bafunda ne: Tshilambuilu tshikale tshiasa ne mabue kaayi masonga ne tshiamu to. Nenku bavua balambuila Maweja-Nangila milambu ya kuosha ne ya bobumue pa tshilambuilu atshi.

³² Yoshuwa kutentula pa mabue awa muaba awu, mikenji ivua Moshe mufunde, bena Izrayele batangile.

³³ Bena Izrayele ne bakulu babu, balombodi babu, bakoshi babu ba nsambu, ne benyi bavua munkatshi muabu, bavua bimane ku luseke ne ku luseke lua mushete wa ndondu wa Maweja-Nangila, balulamangane ne batuangaji ba bena Levi bavua bambula mushete wa ndondu awu. Bamue bavua bimane bela nyima ku mukuna wa Ngarizime, bakuabu bela nyima ku mukuna wa Ebale. Moshe ku kale uvua mumane kuamba bua bikale bimane mushindu ewu padibu basue kuela bena Izrayele lupemba.

³⁴ Yoshuwa kubala miaku yonsu ivuabu bafunde mu mukanda wa mikenji. Uvua ubala kabidi miaku ya dibela nayi lupemba ne ya dibatshipa nayi.

³⁵ Yoshuwa kubadila bena Izrayele mikenji yonsu ya Moshe anu mushindu uvuaye muyifunde mu mukanda. Diba divuaye ubabadila, bena Izrayele bonsu bavuaku, kabidi ne bakaji, bana, ne benyi bavua munkatshi muabu, bavua amu bateleje.