Yoshua 7 - MUKANDA WA MYIDI MUKULU

Badi banyoka Akane bua bubi buende

¹ Bena Izrayele bavua benza bualu bubi butambe, bualu bavua bangata bintu bivua Maweja-Nangila mukandike. Nenku muntu wa mu tshisamba tshia Yuda, dina diende Akane, muana wa Karmi, (Karmi uvua muana wa Zabdi, kabidi muikulu wa Zera) uvua mudiangatshile ku bukole bimue bintu. Nenku Maweja-Nangila kufikila bena Izrayele munda.

² Pavua Yoshuwa mu Yeriko, uvua mutume bantu bua kutentekela tshimenga tshia Ayi. Ayi uvua luseke ludi diba dipatukila lua tshimenga tshia Betele, pabuipi ne tshimenga tshia Bete-Avene. Bobu bamane kutentekela tshimenga,

³ kupinganabu kudi Yoshuwa, bamuambila ne: — Kuena mua kutuma bena mvita bonsu bua kuya kuluisha bena Ayi to. Bena mvita binunu bibidi nansha bisatu mbakumbane. Kutatshishi bena mvita betu bonsu to. Bena tshimenga tshia Ayi kabena bavule to.

⁴ Bena mvita bu binunu bisatu, kuyabu bua kuluisha bena Ayi. Kadi bena Izrayele kupanga bukole, kunyema bena Ayi.

⁵ Bena Ayi kushipa bena Izrayele bu makumi asatu ne basambombu. Kulondakajabu bakuabu biangatshile ku tshiibi tshia ku tshimenga tshia Ayi too ne ku musoku wa Shebarime. Kupuekabu benda bipata bena Izrayele. Ke bena Izrayele kupampakana bikole, kuteketa mu maboku.

⁶ Yoshuwa ne bakulu ba bena Izrayele, kudipanda bilamba. Kudielabu malaba mu mitu, badiela mpala panshi kumpala kua mushete wa tshijila wa Maweja-Nangila too ne ku dilolu.

⁷ Pashishe Yoshuwa kukema bikole, wamba ne: — Akia! Mvidi Mukulu Maweja-Nangila, uvua mutusabuishe musulu wa Yardene bua tshinyi? Uvua mutusabuishe bua kutufila kudi bena Amore bua batushipe anyi? Uvua mua kutulekela dishiya dia Yardene.

⁸ Maweja-Nangila wanyi, tshindi mua kuamba ntshinyi? Mpindiewu bena Izrayele mbanyeme baluishi babu!

⁹ Bena Kenaane ne bantu bakuabu ba mu ditunga nebumvue lumu elu. Nebadisange bua kutuluisha. Nebatubutule. Kadi mudibu mua kujadika mpindiewu muudi ne bukole mbishi?

¹⁰ Maweja-Nangila kuandamuna Yoshuwa ne: — Banduluka! Muudi mudiele mpala panshi mmunyi?

¹¹ Bena Izrayele bavua benza bibi. Kabena bakumbaje bimvua mubambile. Mbangate bintu bimvua mubakandike bua kabangatshi. Mbibe bintu abi, babisokoke mu bintu biabu.

¹² Ke padi bena Izrayele kabayi mua kupita kabidi baluishi babu bukole to. Nebanyeme babutuke bonsu. Meme tshiakuikala kabidi munkatshi muenu to, amu nuenu bamane kubutula bintu bionsu, bi-mvua munukandike, binuvua bangata.

¹³ Mpindiewu, ndaku, ambila bena Izrayele badilongolole bua tumonangane nabu. Kadi badikobolole, bumushe mikiya, bafike malaba tumonangane. Bualu meme Maweja-Nangila Mvidi Mukulu, ndi njadikila bena Izrayele ne: “Nudi bangate bintu bimvua munukandike ne: kanuangatshi. Kanuena mua kupita baluishi benu bukole panudi kanuyi bumushe bintu abi to.

¹⁴ Malaba dinda, nuenu bena Izrayele, ku tshisamba ku tshisamba, nufike kundi meme Maweja-Nangila. Kadi tshisamba tshingikala muleje atshi, netshidileje ku diku ku diku. Diku dingikala muleje adi nedifike ku tshiota ku tshiota. Nenku tshiota tshingikala muleje atshi, bantu balume ba mu tshiota atshi nebafike ku muntu ku muntu.

¹⁵ Nenku nendeje munkatshi mua bantu abu muntu udi muangate bintu bimvua mukandike bua kuangata. Neboshe muntu awu mu kapia, ne bionsu bidiye nabi. Bualu kuvua mukumbaje bimvua munuambile. Mmuenze bualu bubi munkatshi mua bena Izrayele budibu kabayi mua kuenza to.”

¹⁶ Butshia dinda dionsu, Yoshuwa kubikila bena Izrayele ku tshisamba ku tshisamba. Kutshinkabu, kupeta tshisamba tshia Yuda.

¹⁷ Kubikilaye kabidi bena tshisamba tshia Yuda ku diku ku diku. Kutshinkabu, kupeta diku dia Zera. Kubikilaye bena diku adi ku tshiota ku tshiota. Kutshinkabu, kupeta tshiota tshia Zabdi.

¹⁸ Kubikilaye bantu balume ba mu tshiota atshi ku muntu ku muntu. Kutshinkabu, kupeta Akane, muana wa Karmi, muikulu wa Zabdi, wa ku ndelanganyi ya Zera wa ku tshisamba tshia Yuda.

¹⁹ Yoshuwa kumuambila ne: — Mulunda wanyi, umanye bukole bua Maweja-Nangila Mvidi Mukulu wa bena Izrayele. Ungambile bushiwa. Unjadikile tshiuvua muenze, kushimi to.

²⁰ Akane kumuambila ne: — Ndi ngitaba ne: uvua muenzele Maweja-Nangila Mvidi Mukulu bibi mmeme. Bubi bumvua muenze budi mushindu ewu:

²¹ mu bintu bituvua bapeta mu mvita, mvua mumone tshinkutu tshimpe tshia bena Mezopotamiya, nkanu nkama ibidi ya biamu bitoke bia mushinga mukole, ne tshiamu tshia mpawungi tshikale ne bujitu bua nkanu makumi atanu. Lukuka lukole kungenza. Mvua mubiangate. Meme kubijikila mu ntenta wanyi, munudi mua kubipeta. Mvua muteke tshiamu tshitoke tshia mushinga mukole muinshi.

²² Ke Yoshuwa kutuma bantu mu ntenta wa Akane. Bobu kuya lukasa, kusangana bintu abi bijikila mu ntenta. Tshiamu tshitoke tshia mushinga mukole tshivua muinshi.

²³ Bobu kujula bintu abi, kuya nabi kuvua Yoshuwa ne bena Izrayele. Kubitekabu kumpala kua Maweja-Nangila.

²⁴ Yoshuwa ne bena Izrayele bonsu kukuata Akane, kuangata tshiamu tshitoke tshia mushinga mukole, tshinkutu ne tshiamu tshia mpawungi. Kuangatabu kabidi bana ba balume ne ba bakaji ba Akane, ngombe yende, mpunde, mikoku, mbuji, ntenta ne bikuabu bionsu biwaye nabi. Kuyabu nabi bionsu mu tshibandabanda tshia Akore.

²⁵ Yoshuwa kuambila Akane ne: “Udi mutukebele diakabi. Nanku mpindiewu Maweja-Nangila neakupeteshe pebe diakabi.” Bena Izrayele kumuasa mabue, kumushipa. Kuasabu kabidi ne bena mu diku dia Akane bonsu mabue, kubashipa. Kuoshabu bintu biabu bionsu.

²⁶ Pashishe kuimanyikabu mushiki wa mabue pambidi pa Akane. Mabue awu atshidipu too ne mpindiewu. Ke padibu babikila muaba awu ne lelu ne: tshibandabanda tshia Akore. Bionsu abi bimane kuenzeka, tshiji tshia Maweja-Nangila kutuya.