Yoshua 24 - MUKANDA WA MYIDI MUKULU

Bena Izrayele badi bitaba bua kuenzela Maweja-Nangila mudimu

¹ Yoshuwa kukunguja bisamba bionsu bia bena Izrayele ku Shekeme. Kubikidishaye bakulu, bamfumu, balumbuluishi, ne balombodi ba bena mvita ba bena Izrayele. Kufikabu bonsu muaba uvua Mvidi Mukulu.

² Yoshuwa kubambila bonsu ne: — Telejayi tshidi Maweja-Nangila, Mvidi Mukulu wa bena Izrayele, wamba: “Ku kale, bankambua benu bavua base dishiya dia musulu munene wa Perate, batendelelamu mvidie ya bantu benyi. Bankambua benu abu bavua bena diku dia Tera, tatuende wa Abrahame, ne wa Nakore.

³ Nanku meme kumusha nkambua wenu Abrahame mu ditunga adi divua dishiya dia Perate. Meme kumuendesha mu ditunga dia Kenaane dijima. Meme kuvudija ndelanganyi yende, kumupa Izake.

⁴ Izake pende, meme kumupa Yakobe ne Esawu. Meme kupesha Esawu mikuna ya Seyire, bua asombeku. Kadi Yakobe ne bana bende, kuyabu mu Ejipitu.

⁵ Bidimu bia bungi bimane kupita, meme kutuma Moshe ne Arone. Meme kukengesha bena Ejipitu ne bipupu bia mishindu yonsu, bangabanga ne meme kupatula tshisamba tshienu tshia bena Izrayele tshivua mu ditunga adi.

⁶ Bankambua bamane kupatuka mu Ejipitu, kufikabu ku Mayi manene makunze. Kadi bena Ejipitu kulondakaja bankambua benu ne matempu a mvita, ne nyama ya tubalu, too ne ku Mayi manene makunze.

⁷ Bankambua benu kumbikila bua meme kubambuluisha. Meme kuteka divuba dia muinshi pankatshi pa tshisamba tshia bena Izrayele, ne tshia bena Ejipitu. Pashishe meme kubutula bena Ejipitu bonsu, mayi manene kubabuikilawu. Nuenu nudi bamanye mumvua mukengeshe bena Ejipitu! Malu onsu awu mamane kujika, tshisamba tshienu tshia bena Izrayele kushala mu tshipela matuku mapite bungi.

⁸ Pashishe meme kunuendesha mu ditunga dia bena Amore, divua luseke ludi diba dipatukila lua Yardene. Bena Amore kunuluisha, kadi meme kubafila mu bianza bienu. Nuenu kukuata ditunga diabu, bualu meme mvua mubabutule panuvua nusemena pabuipi.

⁹ Balake, muana wa Sipore, uvua mukalenga wa bena Mowabe, kunuluisha kabidi. Uvua mubikidishe Balaame, muana wa Beyore, bua kunutshipaye.

¹⁰ Kadi meme kubenga kuteleja Balaame. Nanku Balaame kunuela lupemba. Ke meme kunusungidila mu bianza bia Balake.

¹¹ Nuenu kusabuka Yardene, kufika mu tshimenga tshia Yeriko. Bena mu Yeriko kunuluisha. Bavua banuluisha kabidi kudi bena Amore, bena Perizi, bena Kenaane, bena Iti, bena Ngirgashi, bena Ivi, ne bena Yebusa. Meme kubafila bonsu mu bianza bienu.

¹² Meme kutuma mangulunge kumpala kuenu. Kunyemeshawu bakalenga babidi ba bena Amore. Nanku miele yenu ya mvita, nansha mata enu a mikete, kabiena ne tshidibi bienza to.

¹³ Ndi munupe ditunga dinudi kanuyi batatshile bua kudima, ne bimenga binudi kanuyi base. Nudi basanganemu mionji ya mvinyo, ne mitshi ya olive, binudi kanuyi bakune. Nukadi nudia amu bimuma abi.”

¹⁴ Yoshuwa kuamba kabidi ne: — Mpindiewu nuenu bena Izrayele, numanye bumfumu bua Maweja-Nangila. Numuenzele mudimu ne muoyi mujima, numutumikile. Numushe mvidie ivua bankambua benu batendelela, patshivuabu dishiya dia musulu wa Perate, nansha patshi wabu mu Ejipitu. Nanku, enzelayi Maweja-Nangila mudimu.

¹⁵ Panuikala nubenga bua kuenzela Maweja-Nangila mudimu, lelu nusungule mvidie inudi basue kutendelela. Tshilejilu: mvidie ivua bankambua benu batendelela, patshivuabu dishiya dia musulu wa Perate, nansha mvidie ya bena Amore, idi mu ditunga dinudi basombe edi. Kadi meme ne bena diku dianyi, netuenzele Maweja-Nangila mudimu.

¹⁶ Bena Izrayele kuandamuna ne: — Katuena mua kubenga Maweja-Nangila bua kuenzela mvidie mikuabu mudimu!

¹⁷ Bualu Maweja-Nangila Mvidi Mukulu wetu, ke uvua mutupatule mu bupika mu Ejipitu, ne batatuetu. Kabidi tuvua bamone bishima bionsu bivuaye muenze diba adi. Amu Yeye ke uvua mutalame mu njila, munkatshi mua bisamba bionsu, miaba yonsu ituvua tupitshila.

¹⁸ Maweja-Nangila ke uvua muipate bisamba bionsu bivua kumpala kuetu, nangananga bena Amore bavua mu ditunga ditudi edi. Nanku tuetu netuenzele amu Maweja-Nangila mudimu. Bualu Yeye ke Mvidi Mukulu wetu.

¹⁹ Ke Yoshuwa kuambila bena Izrayele ne: — Kanuena ne mushindu wa kuenzela Maweja-Nangila mudimu to. Bualu udi Mvidi Mukulu wa tshijila. Mmusue bua ikale nkayende Mvidi Mukulu wenu. Kakunufuila luse bua dimutombokela dienu ne buenzayi buenu.

²⁰ Nuenu babenge Maweja-Nangila, nuenu batendelele mvidie ya bantu benyi, Maweja-Nangila neanuluishe. Neanukengeshe, anubutule, nansha yeye mumane kunuenzela malu mimpe a bungi.

²¹ Bena Izrayele kuandamuna ne: — Kabiena mua kuenzeka to! Tuetu netuenzele amu Maweja-Nangila mudimu.

²² Yoshuwa kubambila ne: — Nuenu nkayenu nudi badijadikile bualu ebu. Nuenu nkayenu nudi basungule bua kuenzela Maweja-Nangila mudimu. Bena Izrayele kuitaba ne: — Eyowa, tudi badijadikile bualu ebu nkayetu.

²³ Ke Yoshuwa kubambila ne: — Nanku umbushayi mvidie ya bantu benyi idi munkatshi muenu. Nuitabe amu Maweja-Nangila, Mvidi Mukulu wa bena Izrayele, ne muoyi mujima.

²⁴ Bena Izrayele kuandamuna ne: — Eyowa, tudi basue kuenzela Maweja-Nangila Mvidi Mukulu wetu mudimu, kutumikila diyi diende.

²⁵ Dituku adi, Yoshuwa kutua ndondu ne bena Izrayele ku Shekeme. Kubajadikilaye meyi ne mikenji bia nsombelu muimpe.

²⁶ Kufundaye meyi ne mikenji abi mu mukanda wa mikenji wa Mvidi Mukulu. Pashishe kuangataye dibue dinene, kudimanyikaye muinshi mua mutshi wa lusanga, muaba wa tshijila wa Maweja-Nangila.

²⁷ Pashishe kuambilaye bena Izrayele ne: — Monayi dibue edi: neditujadikile bualu ebu, bualu nditeleje malu onsu adi Maweja-Nangila mutuambile. Eyowa, dibue edi nedikale tshimanyinu tshidi tshinutuisha, tshinukandika bua kanulekedi Mvidi Mukulu wenu.

²⁸ Ke Yoshuwa kumuangalaja bantu. Muntu yonsu kupingana mu buende buloba.

Lufu lua Yoshuwa

²⁹ Malu onsu mamane kujika, Yoshuwa, muana wa Nune, muntu wa Maweja-Nangila, kufua, muikale ne bidimu lukama ne dikumi.

³⁰ Kumujikabu mu Timnate-Sera, muaba uvuabu bamupeshe, luseke lua mikuna ya Efrayime, ku mutu kua mukuna wa Ngashe.

³¹ Bena Izrayele bavua benzela Maweja-Nangila mudimu, matuku onsu avua Yoshuwa mutshikale ne muoyi. Yoshuwa mumane kufua, bena Izrayele bavua amu benzela Maweja-Nangila mudimu, matuku onsu avua bakulu bavua bamone malu onsu awa Maweja-Nangila muenzele bena Izrayele bashale munkatshi muabu.

³² Nanku mifuba ya Yozefe ivua bena Izrayele bumuke nayi mu Ejipitu, kuyijikabu mu Shekeme, mu buloba buvua Yakobe musumbe ku nkanu ya tshiamu tshitoke tshia mushinga mukole lukama. Uvua mubusumbe kudi ndelanganyi ya Amore uvua muase tshimenga tshia Shekeme. Buloba abu kushala mu dina dia ndelanganyi ya Yozefe.

³³ Elazare, muana wa Arone, kufua kabidi. Kumujikabu pa mukuna uvuabu bapeshe muanende wa balume Pinase luseke lua mikuna ya Efrayime.