Yoshua 21 - MUKANDA WA MYIDI MUKULU

Bimenga bia bena Levi

¹ Bamfumu ba meku a bena Levi, kuya kudi mutuangaji Elazare, kudi Yoshuwa, muana wa Nune, ne kudi bamfumu ba meku makuabu a bisamba bia bena Izrayele,

² mu Silo, mu ditunga dia Kenaane. Kubambilabu ne: — Maweja-Nangila uvua mumane kutumina Moshe diyi, bua nutupe bimenga bitudi mua kusomba, ne mpata idi pabuipi nabi, itudi mua kudishila bimuna bietu.

³ Nanku bena Izrayele kusungula mu maloba abu bimenga, ne mpata ya kudishila bimuna, bua kubipesha bena Levi, bu muvua Maweja-Nangila mumane kuamba.

⁴ Kutshinkabu bilondeshile muvua meku a bena Levi. Kusungulabu kumpala ndelanganyi ya Kekate. Ku ndelanganyi ya Kekate kutshinkabu ndelanganyi ya mutuangaji Arone, kubapeshabu bimenga dikumi ne bisatu, bivua mu buloba bua Yuda, bua Shimeyone ne bua Binyamine.

⁵ Ndelanganyi mikuabu ya Kekate kupeta bimenga dikumi, bivua mu buloba bua bena Efrayime, bua bena Dane ne bua tshitupa tshia bena Menashe tshivua luseke ludi diba dibuelela lua musulu wa Yardene.

⁶ Meku a ndelanganyi ya Ngershone kupeta bimenga dikumi ne bisatu, bivua mu buloba bua bena Isakare, bua bena Ashere, bua bena Naftali, ne bua tshitupa tshia bena Menashe tshivua mu Bashane.

⁷ Meku a ndelanganyi ya Merari kupeta bimenga dikumi ne bibidi, bivua mu buloba bua bena Rubene, bua bena Ngade, ne bua bena Zebulone.

⁸ Bena Izrayele kutshinka mushindu udibu mua kuabanyina ndelanganyi ya Levi bimenga bionsu ebi, ne miaba ya kudishila bimuna. Ke muvua bena Izrayele bakumbaje bionsu bivua Maweja-Nangila mumane kuambila Moshe.

⁹ Mena a bimenga bia bena Yuda ne bia bena Shimeyone bivuabu babanyine

¹⁰ ndelanganyi ya Arone ya mu diku dia Kekate, muana wa Levi, adi nenku: ndelanganyi ya Arone mene ke ivuabu batshinkike bua bapete bimenga kumpala.

¹¹ Bavua babapeshe tshimenga tshia Kiriyate-Arba, tshidibu binyika kabidi Arba, dina dia nkambua wa bena Anake. Badi binyika tshimenga atshi mpindiewu Ebrone. Bavua batshiasa luseke lua mikuna mu buloba bua Yuda. Kupeshabu ndelanganyi ya Arone tshimenga etshi, ne mpata ya kudishila bimuna ivua pabuipi.

¹² Kadi madimi ne misoku bivua bena tshimenga atshi batangila, bavua bamane kubiabanyina Kalebe, muana wa Yefune.

¹³ Pamue ne tshimenga tshia Ebrone, tshivua tshimue tshia ku bimenga bia kunyemena, ndelanganyi ya mutuangaji Arone kupeta kabidi bimenga ebi: Libna,

¹⁴ Yatire, Eshtemowa,

¹⁵ Olone, Debire,

¹⁶ Ashane, Yuta, Bete-Shemeshe. Bimenga bionsu bivua tshitema, kabidi ne mpata ya kudishila bimuna. Bionsu ebi bivua mu buloba bua bena Yuda ne bua bena Shimeyone.

¹⁷ Mu buloba bua bena Binyamine, bavua bapeta bimenga ebi: Ngibone, Ngeba,

¹⁸ Anatote ne Alemete. Bimenga bionsu bivua binayi, kusangisha kabidi ne mpata ya kudishila bimuna.

¹⁹ Nanku bimenga bionsu bisanga bivuabu bapete kudi batuangaji ba ku ndelanganyi ya Arone, bivua dikumi ne bisatu, kusangisha ne mpata ya kudishila bimuna.

²⁰ Meku makuabu a ndelanganyi ya Kekate kupetawu bimenga bivuabu batshinke, bivua mu buloba bua bena Efrayime.

²¹ Ke tshimenga tshia Shekeme, tshia ku bimenga bia kunyemena, tshivua luseke lua mikuna; tshimenga tshia Ngezere,

²² tshia Kibsayime, ne tshia Bete-Orone. Bimenga bionsu bivua binayi, ne mpata ya kudishila bimuna ivua pabuipi nabi.

²³ Mu buloba bua bena Dane, bavua bapeta kabidi bimenga binayi, ne mpata ya kudishila bimuna. Ke tshimenga tshia Elteke, tshia Ngibetone,

²⁴ tshia Ayalone, ne tshia Ngate-Rimone.

²⁵ Mu tshitupa tshia buloba bua bena Menashe tshivua luseke ludi diba dibuelela lua Yardene, bavua bapeta bimenga bibidi: Tanake ne Ibleyame, kusangisha ne mpata ya kudishila bimuna.

²⁶ Bimenga bionsu bisanga bivua ndelanganyi ya Kekate ayi mipete bivua dikumi, kusangisha ne mpata ya kudishila bimuna.

²⁷ Meku a bena Levi a bena Ngershone bavua bapeta bimenga bibidi, kusangisha ne mpata ya kudishila bimuna. Bimenga abi bivua mu buloba bua bena Menashe bavua basomba luseke ludi diba dipatukila lua musulu wa Yardene. Ke tshimenga tshia Ngolane tshidi mu Bashane, tshia ku bimenga bia kunyemena; ne Beshetera.

²⁸ Mu buloba bua bena Isakare, kupetabu bimenga binayi, ne mpata ya kudishila bimuna. Ke tshimenga tshia Kishiyone, tshia Dabrate,

²⁹ tshia Yarmute, ne tshia Ene-Nganime.

³⁰ Mu buloba bua Ashere, kupetabu kabidi bimenga binayi, ne mpata ya kudishila bimuna. Ke tshimenga tshia Mishale, tshia Abdone,

³¹ tshia Elkate, ne tshia Rekobe.

³² Mu buloba bua bena Naftali kupetabu bimenga bisatu, kusangisha ne mpata ya kudishila bimuna. Ke tshimenga tshia Kedeshe tshidi mu Ngalileya, tshia ku bimenga bia kunyemena; tshimenga tshia Amote-Adore, ne tshia Kartane.

³³ Bimenga bionsu bisanga bivua bena meku a Ngershone bapete bivua dikumi ne bisatu, kusangishaku ne mpata ya kudishila bimuna.

³⁴ Meku makuabu a bena levi, a ku ndelangayi ya Merari, kupeta bimenga binayi, kusangisha ne mpata ya kudishila bimuna. Bimenga abi bivua mu buloba bua bena Zebulone. Ke tshimenga tshia Yokneyame, tshia Karta,

³⁵ tshia Dimna, ne tshia Nakalale.

³⁶ Mu buloba bua bena Rubene, buvua luseke ludi diba dipatukila lua musulu wa Yardene, budi butangilangana ne tshimenga tshia Yeriko, kupetabu kabidi bimenga binayi, kusangisha ne mpata ya kudishila bimuna. Ke tshimenga tshia Beshere, tshidi luseke lua mu tshipela, tshia ku bimenga bia kunyemena; tshia Yakase;

³⁷ tshia Kedemote, ne tshia Mefate.

³⁸ Mu buloba bua bena Ngade, kupetabu kabidi bimenga binayi, kusangisha ne mpata ya kudishila bimuna. Ke tshimenga tshia Ramote tshidi mu Ngilaade, tshia ku bimenga bia kunyemena; tshia Makanayime;

³⁹ tshia Eshebone, ne tshia Yazere.

⁴⁰ Bimenga bivuabu batshinke, bapesha bena meku a Levi ba ku ndelanganyi ya Merari, bivua dikumi ne bibidi.

⁴¹ Nanku bimenga bionsu bisanga, bivuabu bumushe ku maloba a bena Izrayele bakuabu, bua kubipesha ndelanganyi ya Levi, bivua makumi anayi ne muanda mukulu.

⁴² Tshimenga tshionsu tshivuabu bababanyine tshivua ne mpata ya kudishila bimuna.

⁴³ Maweja-Nangila kupesha bena Izrayele ditunga adi dionsu dijima divuaye mumane kulaya bankambua babu. Kukuatabu ditunga adi, kuasamu.

⁴⁴ Maweja-Nangila kubapesha ditalala ku mikalu yabu yonsu, bu muvuaye mumane kulaya bankambua babu. Bobu kutshimuna baluishi babu bonsu ku bukole bua Maweja-Nangila. Kakuvua muntu nansha umue uvua mua kupita bena Izrayele ku bukole to.

⁴⁵ Nenku malu onsu awa Maweja-Nangila mulaye bena Izrayele, kukumbana. Kakuvua bualu nansha bumue buvua kabuyi buenzeka.