Yoshua 2 - MUKANDA WA MYIDI MUKULU

Yoshuwa udi utuma batentekedi babidi ku Yeriko

¹ Diba divua Yoshuwa, muana wa Nune, mu mitanda ya mu Shitime, kutumaye bantu babidi mu musokoku bua baye kutentekela mudi ditunga ne tshimenga bia Yeriko. Batentekedi babidi abu, bamane kufika mu Yeriko, kulalabu kua mukaji muena tshiendenda, dina diende Rakabe.

² Mukalenga wa bena Yeriko, kumvua muvua bena Izrayele babidi bafike mu tshimenga butuku, bua kutentekela mudi ditunga.

³ Nanku kutuminaye Rakabe diyi, umuambila ne: — Rakabe, patula bantu balume badi bafike kuebe bua kutentekela ditunga, utupeshebu.

⁴ Rakabe kumuka ne bantu babidi abu, kubasokoka. Pashishe kuandamunaye ne: — Bantu balume bavua bafike kuanyi bulelela. Kadi tshivua mumanye kuvuabu bafume to.

⁵ Mbamane kumuka kuanyi, ku mesu ku-kavua kufika, diba divuabu bakeba kukanga biibi bia tshimenga. Tshiena mumanye muaba udibu baye to. Nuenu bambuluja, nudi mua kubapeta mu njila.

⁶ Kadi Rakabe uvua mumane kubandisha bantu abu mu nzubu wende wa kulu ku musaka. Uvua mubasokoke mu mitshi iwaye muteke kulu aku.

⁷ Bantu bavua mukalenga mutume kulondakaja batentekedi mu njila. Amu bobu bapatuke mu tshimenga, kukangabu tshiakabidi tshiibi tshia tshimenga. Nanku, kuipatshilabu batentekedi, balonda njila udi muye ku tshisabu tshia musulu wa Yardene.

⁸ Ke Rakabe kubanda ku musaka wa nzubu wende, bantu babidi abu kabayi banji kulala to.

⁹ Kubambilaye ne: — Ndi mumanye ne: Maweja-Nangila mmumane kunupa ditunga dietu edi. Nudi nutukuatshisha bowa bukole. Bantu bonsu badi anu banutshina.

¹⁰ Tuvua bapete lumu ne: diba dinuvua numuka mu ditunga dia Ejipitu, Maweja-Nangila uvuamumishe Mayi manene makunze bua nuenu kusabuka. Kabidi tuvua bumvue ne: nuvua bashipe Sihone ne Oge, bakalenga ba matunga abidi a bena Amore, banyangakaje kabidi bintu biabu. Bakalenga abu, bavuabase luseke ludi diba dipatukila lua Yardene.

¹¹ Tuetu bamane kumvua lumu lua bionsu abi, tuvua tupampakana bikole, kakuyi udi mumvue bukole bua kunubunda kabidi to. Bualu Maweja-Nangila Mvidi Mukulu wenu udi Mvidi Mukulu muena kulu ne muena buloba.

¹² Kadi mpindiewu, nuditshipe bualu buanyi kudi Maweja-Nangila ne: nenufuile bena diku dianyi luse, bu mundi munuenzele bimpe. Numpeshe tshintu tshidi mua kunjadikila patoke binudi nuamba.

¹³ Nundaye bua kupandisha baledi banyi, bana betu ba balume ne ba bakaji, too ne bena meku etu bonsu. Kanuanyishi bua batushipe to.

¹⁴ Batentekedi abu kumuandamuna ne: — Tudi baditshipa kuudi. Tuetu katuyi bakumbaje bitudi tukulaya, Maweja-Nangila atushipe, kadi amu wewe kuyi muambile muntu tshitudi bavuile munemu. Nanku, padi Maweja-Nangila utupa ditunga edi, netukumbaje tshitudi bakulaye. Netukufuile luse.

¹⁵ Nzubu wa Rakabe uvua mutuangane ne tshimana tshia tshimenga. Nanku kupatulaye bantu babidi abu ku madidishi, ubapuekeshila ku muonji.

¹⁶ Kubambilaye ne: — Ndayi kusokoma mu mikuna, bua bantu badi banukeba abu kabanukuatshi to. Nushale ku mikuna aku matuku asatu, too ne papingana badi banukeba abu. Pashishe nenutungunuke ne luendu luenu.

¹⁷ Bantu balume abu kumuambila ne: — Tuetu netukumbaje mitshipu iuvua mututshipishe.

¹⁸ Kadi wewe enza nunku: patudi tukuata ditunga edi, usuike muonji mukunze ewu ku dididishi, muaba uudi mututuluile ewu. Nanku nudisange bonsu mu nzubu muebe, ne baledi bebe, bana benu ba balume ne ba bakaji, ne bena diku dienu bonsu.

¹⁹ Padi muntu upatuka mu nzubu muebe, udi udikebela lufu. Tuetu netuikale babinge. Kadi padibu babunda muntu udi mubuele mu nzubu muebe, tshilumbu tshia muntu awu tshidi pambidi petu.

²⁰ Kadi wewe mumanyishe bantu mutudi bafike munemu, bionsu biudi mutuambe tuetu baditshipe ebi mbifue.

²¹ Rakabe kuandamuna ne: — Ndi muanyishe munudi nuamba amu. Pashishe kulayanganabu. Bantu babidi abu bamane kuya, Rakabe kusuika muonji mukunze ku dididishi dia ku nzubu kuende.

²² Batentekedi abu, kuya kusokoma ku mikuna matuku asatu, too ne padibu bapingana mu Yeriko kudi bantu bavua babalondakaja mu njila, kabayi babamona.

²³ Pashishe batentekedi babidi abu, kumuka mu mikuna, muaba uvuabu basokome. Kusabukabu Yardene, kufika muaba uvua Yoshuwa. Kumulondelabu bionsu bivua bibenzekela.

²⁴ Kujadikilabu Yoshuwa ne: — Eyowa, Maweja-Nangila mmumane kutupa ditunga edi dijima. Bena ditunga mbamane kuteketa mu maboku. Kabena mua kutufuila nkanana to.