Yoshua 18 - MUKANDA WA MYIDI MUKULU

Bisamba bivua bishale bidi bipeta buloba

¹ Bena Izrayele bamane kukuata ditunga, kudisangishabu bonsu mu Silo. Kuasabu ntenta wa kusambakena muaba awu.

² Kadi kuvua kushala kabidi munkatshi mua bena Izrayele, bisamba muanda mutekete bivua kabiyi bianji kupeta abi maloba.

³ Nanku Yoshuwa kukonka bena Izrayele ne: — Nenuye kukuata ditunga divua Maweja-Nangila Mvidi Mukulu wa bankambua benu munupe diba kaayi? Tshinudi bindile ntshinyi?

⁴ Sungulayi bantu balume basatu ku tshisamba tshionsu. Nembatume bua bendakane ditunga dijima, bamone mushindu udidi. Bantu aba nebajadike bimpe mushindu udi tshitupa tshia buloba tshidi bisamba biabu mua kupeta. Pashishe, nebapingane bua kungambila bionsu bikalabu bamone.

⁵ Bantu abu nebabanye buloba mu bitupa muanda mutekete. Ndelanganyi ya Yuda neyishale mu tshiayi tshitupa tshia buloba tshidi kuinshi mu ditunga. Ndelanganyi ya Yozefe kabidi neyishale mu tshiayi tshitupa tshidi ku mutu mu ditunga.

⁶ Kadi nujadike bimpe mushindu udi bitupa bikuabu muana mutekete bia buloba abu. Nupingane bua kungambila bionsu binuikala bamone. Kadi muaba udi Maweja-Nangila Mvidi Mukulu wetu ke undi meme mua kutshinkila bua kumanya tshitupa tshia buloba tshidibu mua kuangata kudi tshionsu tshia ku bisamba bienu.

⁷ Ndelanganyi ya Levi kayena mua kupeta tshiayi tshitupa tshia buloba to. Bualu tshiabu tshintu tshidi amu mudimu wa batuangaji udibu benzela Maweja-Nangila. Kadi tshisamba tshia Ngade, tshia Rubene, ne tshia bibidi tshia tshisamba tshia Menashe, mbimane kupeta biabu bitupa bia buloba luseke ludi diba dipatukila lua Yardene. Moshe nkayende, muntu wa Maweja-Nangila, ke uvua mubapeshe miaba yabu.

⁸ Bantu bavuabu basungula bua kuya kutentekela ditunga kudilongolola bua kuya. Bangabanga ne kumukabu, Yoshuwa kubambila ne: — Nuye, nuendakane ditunga dijima. Nujadike bimpe menemene mushindu udidi. Nupingane bua kungambila bionsu binuikala bamone. Nanku amu munemu mu Silo, muaba udi Maweja-Nangila, meme nentshinke bua kumanya bitupa bia buloba bishilangane binudi mua kupeta.

⁹ Bantu abu kuendakana ditunga dijima. Kufundabu bionsu bivuabu bamone mu bitupa bia buloba abi muanda mutekete. Kufundabu kabidi mena a bimenga bionsu bivuamu. Pashishe kupinganabu muaba uvua Yoshuwa mu mitanda ya mu Silo.

¹⁰ Muaba uvua Maweja-Nangila, Yoshuwa kutshinka bua kumanya mushindu uvuabu mua kuabanyina bena Izrayele bitupa bia buloba abi. Yoshuwa kupesha tshisamba tshionsu tshiatshi tshitupa tshia buloba mu ditunga adi.

Buloba bua bena Binyamine

¹¹ Buloba bua kumpala buvua Yoshuwa mutshinke, uvua mubupeshe tshisamba tshia bena Binyamine, bilondeshile meku abu. Buloba ebu buvua pankatshi pa buloba bua bena Yuda ne buloba bua ndelanganyi ya Yozefe.

¹² Mukalu wabu ku mutu wa ditunga uvua utuadijila ku musulu wa Yardene, ubandila luseke lua ku mutu kua tshimenga tshia Yeriko, utungunukila ku luseke ludi diba dibuelela, upitshila mu mikuna, ufika too ne ku tshipela tshia Bete-Avene.

¹³ Umuka muaba awu, mukalu uvua mutangile ku Luze, upitshila luseke lua kuinshi kua tshimenga tshia Luze, tshidibu binyika kabidi Betele. Pashishe uvua upitshila ku mukuna uvua kuinshi kua Bete-Orone wa kuinshi, upuekela ku Atrote-Adare.

¹⁴ Luseke ludi diba dibuelela lua ku mukuna awu, mukalu uvua ubendela luseke lua kuinshi, ushikidila ku Kiriyate-Baale, udibu binyika kabidi Kiriyate-Yeyarime, udi wa tshisamba tshia bena Yuda. Ke mukalu wa luseke ludi diba dibuelela.

¹⁵ Mukalu wa kuinshi uvua utuadijila ku Kiriyate-Yeyarime, uya luseke lua ku Ngasine, ushikidila ku mpokolu ya mayi ku Neftowa.

¹⁶ Umuka muaba awu, udi upueka kuinshi kua mukuna udi utangila tshibandabanda tshia Inome, tshidi ku mutu kua tshibandabanda tshia bena Refayime. Pashishe mukalu awu uvua ulonda tshibandabanda tshia Inome, upueka kuinshi kua kakuna ka bena Yebusa, utungunuka upueka amu kupueka too ne ku Ene-Rogele.

¹⁷ Pashishe uvua ubenda, ulonda luseke lua ku mutu, utangila ku Ene-Shemeshe, uya ku Ngelilote, mutangilangane ne mukuna wa Adumime. Umuka muaba awu, udi upuekela luseke ludi dibue didibu binyika Bokane, dina dia muana wa balume wa Rubene.

¹⁸ Pashishe mukalu awu udi ulonda tshibandabanda tshia musulu wa Yardene, upitshila ku mutu kua mukuna udi utangila tshibandabanda atshi.

¹⁹ Udi utungunuka luseke lua ku mutu kua Bete-Ogla, ushikidila ku mutu menemene kua Mayi manene a luepu, muaba udi musulu wa Yardene udielamu. Ke mukalu wa kuinshi mu ditunga.

²⁰ Musulu wa Yardene uvua wenza mukalu wa ku luseke ludi diba dipatukila. Ke mushindu uvua mikalu ya buloba buvua Yoshuwa muabanyine tshisamba tshia bena Binyamine, bilondeshile mudi meku abu.

²¹ Bimenga bia meku a bena Binyamine bivua: Yeriko, Bete-Ogla, Emeke-Keshise,

²² Bete-Araba, Semarayime, Betele,

²³ Avime, Para, Ofra,

²⁴ Kefare-Amona, Ofni ne Ngeba. Bimenga bionsu ebi bivua dikumi ne bibidi, tusangishe ne misoku ivua mutumba.

²⁵ Kuvua kabidi bimenga ebi: Ngibone, Rama, Beyerote,

²⁶ Mispa, Kefira, Mosha,

²⁷ Rekeme, Irpeyele, Tarala,

²⁸ Sela, Elefe, tshimenga tshia bena Yebusa, mmumue ne: Yerushalayime, Ngibeya ne Kiriyate. Bimenga bionsu bivua dikumi ne binayi, tusangishe ne misoku ivua mutumba. Ke buloba bua bena Binyamine bilondeshile muvua meku abu.