Yoshua 14 - MUKANDA WA MYIDI MUKULU

Badi babanya ditunga dia Kenaane

¹ Ke maloba a mu ditunga dia Kenaane avuabu babanyina bena Izrayele kudi mutuangaji Elazare, kudi Yoshuwa, muana wa Nune, ne kudi bamfumu ba bisamba bishilangane bia bena Izrayele.

² Bu muvua Maweja-Nangila muambile Moshe, bavua batshinka bua kumanya maloba avuabu mua kupesha bisamba bia bena Izrayele tshitema, ne tshia bibidi tshia tshisamba tshia Menashe, bivua kabiyi bianji kupeta maloba.

³ Moshe uvua mumane kuabanyina bisamba bibidi, ne tshia bibidi tshikuabu tshia bena Menashe maloba onsu awa luseke ludi diba dipatukila lua musulu wa Yardene. Kadi kuvua mupeshe ndelanganyi ya Levi buloba to.

⁴ Bualu ndelanganyi ya Levi kayivua ne bua kupeta buloba nansha bukese to. Ku ndelanganyi ya Yozefe kuvua bisamba bibidi ebi: tshia Menashe ne tshia Efrayime. Kadi bena Levi bavua bapeta anu bimenga bia kuasamu, ne maloba a kumpenga kua bimenga ebi bua kudishamu bimuna, ne kutekamu bintu biabu bikuabu.

⁵ Nanku bena Izrayele bavua babanyangana ditunga dia Kenaane anu mushindu uvua Maweja-Nangila muambile Moshe.

⁶ Dituku dikuabu, bena tshisamba tshia Yuda kumonangana ne Yoshuwa ku Ngilgale. Kalebe, muana wa Yefune, wa mu diku dia Kenaze, kuambila Yoshuwa ne: — Uvuluke muvua Maweja-Nangila muambile Moshe, muntu wende, bualu buebe ne buanyi ku Kadeshe-Barneya.

⁷ Mvua ne bidimu makumi anayi tshikondu tshivua Moshe, muntu wa Maweja-Nangila, muntume bua ngumuke ku Kadeshe-Barneya, nya kutentekela ditunga edi. Pamvua mupingane kudiye, mvua mumuambile malu anu muvuawu.

⁸ Kadi bantu batuvua baye nabu, bavua batekesha bena Izrayele mu maboku. Amu meme mvua muleje patoke mundi muitabe Maweja-Nangila Mvidi Mukulu wanyi muanyi muonsu.

⁹ Dituku adi, Moshe uvua mundaye ne mutshipu bua kumpesha ditunga dimvua muye kutentekela, bua dishale dianyi kashidi, kabidi ne dia ndelanganyi yanyi, bualu mvua muitabe Mvidi Mukulu Maweja-Nangila.

¹⁰ Mpindiewu kukadi bidimu makumi anayi ne bitanu, bidi Maweja-Nangila mumane kuambila Moshe mukenji ewu, tshikondu tshivua bena Izrayele bapitshila mu tshipela. Biangatshile mu tshikondu atshi, Maweja-Nangila utshidi mundame ne muoyi, amu muvuaye mulaye. Mona, nkadi ne bidimu makumi muanda mukulu ne bitanu.

¹¹ Kabidi ntshidi anu ne bukole bu mumvua nabu musangu uvua Moshe muntume bua kutentekela ditunga. Ntshidi amu ne bukole buonsu bumvua nabu tshikondu atshi, nansha bua kuluangana mvita, nansha bua kuenza midimu mikuabu.

¹² Mpindiewu umpeshe panyi buloba bua mikuna buvua Maweja-Nangila mundaye ku kale. Mvua mukuambile diba adi ne: ndelanganyi ya Anake idi luseke alu. Mmiase bimenga binene, bivuabu bakolesha ne bimana. Kadi bu Maweja-Nangila mungambuluishe, nembipate muvua Maweja-Nangila nkayende mumane kuamba.

¹³ Yoshuwa kuela Kalebe, muana wa Yefune, lupemba, kumupesha tshimenga tshia Ebrone.

¹⁴ Too ne lelu, tshimenga etshi tshidi anu tshia ndelanganyi ya Kalebe, muana wa Yefune, wa mu diku dia Kenaze. Bualu uvua muleje muende muonsu mudiye muitabe Maweja-Nangila Mvidi Mukulu wa bena Izrayele.

¹⁵ Tshimenga tshia Ebrone bavua batshinyika kale ne: Arba. Arba uvua muntu wa kale wa bena Anake, uvuabu batue makumbu bikole. Pashishe bena Izrayele kuanji kuikisha, bualu bavua bapungile bikole bua mvita ivuabu baluangana.