Yoshua 13 - MUKANDA WA MYIDI MUKULU

Matunga adibu kabayi banji kukuata

¹ Yoshuwa mumane kukola mukulakaje, Maweja-Nangila kumuambila ne: — Monaku muukadi mumane kukulakaja, kadi kutshidi kushala kabidi matunga manene a kukuata,

² bu mudi matunga a bena Peleshete, ne a bena Ngeshure,

³ mmumue ne: ditunga didibu batangila bu dia bena Kenaane, biangatshile ku musulu wa Shikore, ku mikalu ne Ejipitu, too ne ku ditunga dia Ekrone ku mutu wa ditunga. Ke mudi bakalenga batanu ba bena Peleshete. Bimenga biabu binene bia bukalenga: ke Ngaza, Asdode, Askalone, Ngate ne Ekrone. Mudi kabidi ditunga dia bena Avi,

⁴ didi kuinshi. Nenukuate kabidi ditunga dia bena Kenaane, biangatshile ku Ara, buloba bua bena Sidone, too ne ku Afeke ku mikalu ya bena Amore.

⁵ Nenukuate kabidi ditunga dia Ngebale, dia Lebanone didi luseke ludi diba dipatukila dia Baale-Ngade, kuinshi kua mukuna wa Ermone, too ne ku Lebo-Amate.

⁶ Nenukuate kabidi ditunga dia mikuna didi pankatshi pa Lebanone ne Misrefote-Mayime. Bena ditunga adi bonsu badi amu bena Sidone. Padi bena Izrayele basemena ku kakese ku kakese, Meme Maweja-Nangila nembumushile ku bukole bena matunga aa bonsu. Pashishe wewe Yoshuwa, newabanyine bena Izrayele ditunga mu bitupa bishilangane. Neubitshinke anu bu mumvua mukuambile.

⁷ Nanku matunga awu udi ne bua kuabanyina bisamba tshitema bia bena Izrayele, ne tshia bibidi tshimue tshia tshisamba tshia bena Menashe, bidi kabiyi bianji kupeta muaba wa kuasa.

Yoshuwa udi wabanya maloba

⁸ Bisamba bia bena Rubene ne bena Ngade, ne tshia bibidi tshia tshisamba tshia bena Menashe, bivua bimane kupeta maloba awa ku musulu wa Yardene, luseke luawu ludi diba dipatukila. Moshe, muntu wa Maweja-Nangila, uvua mumane kubabanyina maloba awu.

⁹ Mikalu ya maloba awu ivua nunku: kuinshi kua ditunga kuvua tshimenga tshia Aroyere tshivua ku musulu wa Amone, ne tshimenga tshidibu base munkatshi mua tshibandabanda tshia musulu awu. Muvua kabidi mikuna ya ku Medeba too ne ku Dibone,

¹⁰ bimenga bia mukalenga Sihone, muena Amore, wa mu Eshebone, uvua ne bumfumu bua ditunga dijima adi too ne ku mikalu ne bena Amone.

¹¹ Muvua kabidi ditunga dia Ngilaade, dia Ngeshure ne dia Maaka, mukuna wa Ermone, ne ditunga dijima dia Bashane too ne ku Salka.

¹² Muvua kabidi ditunga dia Oge, umue wa ku bakalenga ba ndekelu ba bena Refayime, uvua mukalenga mu Ashetarote ne mu Edreyi mu buloba bua Bashane. Moshe kutshimuna bisamba bia mu matunga aa, kubinyenga maloba abi.

¹³ Kadi bena Izrayele kabavua bipata bena Ngeshure ne bena Maaka to. Nenku bantu abu batshidi basomba munkatshi mua bena Izrayele too ne mpindiewu.

¹⁴ Bena tshisamba tshia Levi nkayabu kabawa bapeta maloba to. Bualu ndelanganyi ya bena Levi idi mua kupeta anu bintu ku milambu idi bantu boshila Maweja-Nangila Mvidi Mukulu wa bena Izrayele, bu muvua Maweja-Nangila nkayende mumane kubalaya.

¹⁵ Buloba buvua Moshe muabanyine tshisamba tshia bena Rubene, bilondeshile meku abu, buvua ne mikalu eyi:

¹⁶ kuinshi mu ditunga kuvua tshimenga tshia Aroyere tshidi ku muelelu wa musulu wa Amone, ne tshimenga tshivua mu tshibandabanda tshia musulu awu. Mu buloba abu muvua mikuna ya pabuipi ne Medeba.

¹⁷ Muvua kabidi tshimenga tshia Eshebone, ne bimenga bionsu bidi bilonda ebi: Dibone, Bamote-Baale, Bete-Baale-Meyone,

¹⁸ Yakase, Kedemote, Mefate,

¹⁹ Kiriyatayime, Sibma, Serete-Shakare pa kakuna kadi katangilangana ne tshibandabanda,

²⁰ Bete-Peyore, mukuna wa Pisga ne Bete-Yeshimote.

²¹ Muvua kabidi bimenga bia pa mikuna, ne bukalenga bujima bua Sihone, muena Amore, uvua mukalenga mu Eshebone. Moshe uvua mumane kutshimuna Sihone ne bamfumu bende bonsu ba bena Madiyane bavua mu ditunga amu: ke Evi, Rekeme, Sure, Ure ne Reba.

²² Tshikondu atshi, bena Izrayele bavua bashipa kabidi Balaame, muana wa Beyore, muena lubuku.

²³ Mukalu wa ditunga dia bena Rubene, ku luseke ludi diba dibuelela, uvua musulu wa Yardene. Bimenga bionsu ebi ne miaba itudi bamane kutela eyi, ke buloba buvuabu babanyina bena tshisamba tshia Rubene, bilondeshile meku abu.

²⁴ Buloba buvua Moshe muabanyine bena tshisamba tshia Ngade bilondeshile meku abu,

²⁵ buvua ne bimenga ebi: Yazere, bimenga bionsu bia mu ditunga dia Ngilaade, tshitupa tshia ditunga dia bena Amone too ne ku Aroyere, pabuipi ne Raba.

²⁶ Buloba ebu buvua bualabale, biangatshile ku Eshebone too ne ku Ramate-Mispa ne ku Betonime, ku Makanayime too ne ku ditunga dia Lo-Dabare.

²⁷ Mu tshibandabanda tshia musulu wa Yardene muvua kabidi Bete-Arame, Bete-Nimra, Sukote ne Safone, misoku ya mu bukalenga bua Sihone, uvua mukalenga mu Eshebone. Buloba ebu buvua luseke ludi diba dipatukila lua musulu wa Yardene. Musulu wa Yardene awu uvua wenza mukalu too ne ku dijiba dia Ngenesarete didi ku mutu wa ditunga.

²⁸ Bimenga bionsu ebi ne miaba itudi batela eyi, bivua buloba buvuabu babanyine bena tshisamba tshia Ngade, bilondeshile meku abu.

²⁹ Buloba buvua Moshe muabanyine bena tshia bibidi tshimue tshia tshisamba tshia Menashe, bilondeshile meku abu, buvua ne mikalu nenku:

³⁰ kuinshi mu ditunga kuvua Makanayime. Mu buloba ebu muvua ditunga dijima dia Bashane, ditunga dijima dia Oge, mukalenga wa Bashane, ne misoku makumi asambombu ya Yayire ivua mu ditunga dia Bashane.

³¹ Muvua kabidi tshitupa tshia ditunga dia Ngilaade, ne bimenga bia Ashetarote ne Edreyi, bimenga binene bia kale bia Oge, mukalenga wa Bashane. Buloba buonsu ebu bavua babuabanyine tshia bibidi tshia meku a ndelanganyi ya Makire, muana wa Menashe.

³² Tshikondu tshivua Moshe mu mpata ya Mowabe, uvua muabanye miaba yonsu ivua luseke ludi diba dipatukila lua Yeriko, ne lua musulu wa Yardene.

³³ Kadi Moshe kuvua mupeshe bena tshisamba tshia Levi buloba to. Uvua ubambila muvua tshiabu tshidibu mua kupeta amu mudimu udibu benzela Maweja-Nangila Mvidi Mukulu wa bena Izrayele.