Yoshua 10 - MUKANDA WA MYIDI MUKULU

Bena Izrayele badi batshimuna bakalenga ba bena Amore

¹ Mukalenga Adoni-Sedeke wa mu Yerushalayime, kumvuaye muvua Yoshuwa mukuate tshimenga tshia Ayi, mutshinyangakaje tshionsu, mushipe ne mukalenga watshi, anu muvuaye munyangakaje tshimenga tshia Yeriko, mushipe kabidi ne mukalenga watshi. Uvua mumane kumvua kabidi ne: bena Ngibone mbamane kutua ndondu wa ditalala ne bena Izrayele, basombe munkatshi muabu.

² Ke muvua bena Yerushalayime bakuatshike bowa bua bungi. Bualu tshimenga tshia Ngibone tshivua tshipite tshia bena Ayi ku bunene, tshivua ne bunene bua mushindu umue ne bua bimenga bia bakalenga. Tshivua kabidi amu ne bena mvita ba bukitu.

³ Nanku mukalenga Adoni-Sedeke kubikidisha bakalenga aba: Okame, mukalenga wa mu Ebrone; Pirame, mukalenga wa mu Yarmute; Yafiya, mukalenga wa mu Lakishe; ne Debire, mukalenga wa mu Eglone. Kubambilaye ne:

⁴ — Ndi munubikidishe bua nungambuluishe. Tuluishe bena tshimenga tshia Ngibone, bualu bena tshimenga atshi mbatue ndondu ne Yoshuwa, kabidi ne bena Izrayele bonsu.

⁵ Nanku bakalenga batanu ba bena Amore, ba mu Yerushalayime, Ebrone, Yarmute, Lakishe ne Eglone, kudisangisha ne bena mvita babu bonsu bua kuya kuluisha tshimenga tshia Ngibone, kutshikuata.

⁶ Kadi bena Ngibone kutuma bantu bua bambile Yoshuwa uvua mu mitanda ya mu Ngilgale ne: — Kubengi bua kutuambuluisha tuetu bapika bebe to. Luaku lukasa. Utuambuluishe, utusungidile. Bualu bakalenga bonsu ba bena Amore badi ku mikuna, mbumvuangane bua kutuluisha!

⁷ Diakamue Yoshuwa kumuka mu Ngilgale ne bena mvita bonsu, nangananga ne baluanganyi ba kalanda musenga.

⁸ Maweja-Nangila kuambila Yoshuwa ne: — Kubatshinyi to. Ndi mbafila kuudi. Muntu nansha umue kakukupita bukole to.

⁹ Yoshuwa ne bena mvita bavuaye nabu bamane kuenda butuku bujima biangatshile ku Ngilgale, kubundulabu bena Amore tshimpitshimpi, bena Amore kabayi banji kudilongolola.

¹⁰ Maweja-Nangila kunyemesha bena Amore kumpala kua bena Izrayele. Bena Izrayele kushipela bena Amore bikole, pabuipi ne tshimenga tshia Ngibone. Bavua benda balondakaja bena Amore mu njila wa kubanda ku Bete-Orone, babipata too ne ku Azeka ne Makeda.

¹¹ Pavua bena Amore banyema bena Izrayele, bapuekela luseke lukuabu lua mukuna wa Bete-Orone, Maweja-Nangila kubatokeshila mvula mukole wa mabue. Mvula awu kukuatshila bena Amore too ne mudibu bafika ku Azeka. Bantu balume bavua bafue ku mabue a mvula awu bavua ba bungi, bapite bavua bena Izrayele bashipe ku miele mu mvita.

¹² Dituku divua Maweja-Nangila muambuluishe bena mvita ba bena Izrayele bua kutshimuna bena Amore, Yoshuwa uvua utendelela Maweja-Nangila, bena Izrayele bonsu bateleje. Uvua ulomba, wamba ne: — Diba dimanakane mulu, mu tshimenga tshia Ngibone! Ngondu imanakane mulu mu tshibandabanda tshia Ayalone!

¹³ Diba kuimana, ngondu kushala kaba kamue, too ne padi bena Izrayele batshimuna bena lukuna babu. Bionsu ebi bivua bienzeka anu bu mudibu bafunda mu Mukanda wa Muntu wa nsongu ne: dituku dijima adi, diba divua dimana kadiyi mua kupueka bua kubuela.

¹⁴ Katshia ne katshia, bualu bua mushindu ewu kabuvua buanji kuenzeka to; kabidi kabuakuenzeka matuku adi kumpala. Maweja-Nangila kukumbaja tshivua muntu mumulombe. Nanku yeye nkayende uvua uluila bena Izrayele mvita.

¹⁵ Pashishe Yoshuwa ne bena Izrayele bonsu kupingana mu mitanda yabu ya mu Ngilgale.

Yoshuwa udi ushipa bakalenga batanu abu

¹⁶ Bakalenga abu batanu ba bena Amore kunyema, kuya kusokoma mu lubinga lua Makeda.

¹⁷ Kubasanganabu basokome mu lubinga amu. Kumanyishabu Yoshuwa.

¹⁸ Yeye kuambila bena mvita bende ne: — Nujibikile mabue manene ku mushiku wa lubinga alu, bantu bakulame.

¹⁹ Kadi kanunengakanyi muaba awu to. Londakajayi baluishi benu. Bajikilayi njila, bua kabafiki mu bimenga biabu to. Bualu Maweja-Nangila Mvidi Mukulu wenu mmumane kubafila mu bianza bienu.

²⁰ Yoshuwa ne bena Izrayele kutshimuna bena Amore menemene, kubabutula bonsu. Amu bantu bakese bavua banyema mvita ke bavua bapande, bapingana mu bimenga biabu, bivuabu bakolesha ne bimana.

²¹ Ke bena Izrayele bonsu kupingana amu katakata muaba uvua Yoshuwa, mu mitanda ivuabu base pabuipi ne Makeda. Mu ditunga adi, muntu nansha umue kuvua ne dikima dia kujana bena Izrayele kabidi to.

²² Pashishe Yoshuwa kutuma diyi bua bumushe mabue a wabu bajibika ku mushiku wa lubinga, bapatule bakalenga batanu ba bena Amore, baye nabu kudiye.

²³ Bena Izrayele kukumbaja bionsu abi. Kumutuadilabu mukalenga wa mu Yerushalayime, wa mu Ebrone, wa mu Yarmute, wa mu Lakishe, ne wa mu Eglone.

²⁴ Bafike amu ne bakalenga abu kudiye, Yoshuwa kubikidisha bena Izrayele, kuambila balombodi ba bena mvita bavua nende mu mvita bua basemene pabuipi, ne: — Semenayi apa. Diatayi bakalenga aba mu nshingu. Balombodi ba bena mvita kuenza nanku.

²⁵ Yoshuwa kubambila ne: — Kanutshinyi, kanuzakadi! Nuikale ne bukitu, kabidi ne muoyi mukole. Maweja-Nangila neenzele baluishi benu bonsu banudi nuluangana nabu amu nanku.

²⁶ Pashishe Yoshuwa kushipa bakalenga abu. Kubowelaye ku mitshi itanu. Bitalu biabu kushala bilembelela kulu too ne ku dilolu.

²⁷ Ku dilolu Yoshuwa kutuma diyi bua batulule bitalu abi. Kubitululabu, kubimansha mu lubinga muaba uvua bakalenga abu basokome. Kujibikilabu mabue manene ku lubinga alu. Mabue awu atshidiku too ne ku lelu.

Yoshuwa udi ukuata bimenga bidi kuinshi mu ditunga

²⁸ Amu dituku adi, Yoshuwa kukuata tshimenga tshia Makeda, kushipa mukalenga watshi, ne bantu bonsu bavuamu. Kawa mushiye muntu ne muoyi to. Uvua muenzele mukalenga wa mu tshimenga tshia mu Makeda biwaye muenzele mukalenga wa mu tshimenga tshia Yeriko.

²⁹ Yoshuwa ne bena Izrayele kumuka mu tshimenga tshia Makeda, kuya kuluisha bena mu tshimenga tshia Libna.

³⁰ Maweja-Nangila kufila kabidi tshimenga atshi ne mukalenga watshi mu bianza biabu. Kushipabu bantu bonsu, kakuyi wa kushala ne muoyi. Bavua benzela mukalenga wa mu tshimenga atshi, muvuabu benzela mukalenga wa mu tshimenga tshia Yeriko.

³¹ Yoshuwa ne bena Izrayele kumuka mu tshimenga tshia Libna, kuya ku tshimenga tshia Lakishe. Kudilongololabu ku mvita, kuluishabu bena tshimenga atshi.

³² Dituku dibidi divuabu baluangana mvita, Maweja-Nangila kupesha bena Izrayele tshimenga tshia Lakishe. Bobu kushipa bena tshimenga bonsu, kakuyi muntu wa kushala ne muoyi, anu bu muvuabu babutule bena tshimenga tshia Libna.

³³ Orame, mukalenga wa mu Ngezere, kufika bua kuambuluisha bena Lakishe. Kadi Yoshuwa kumutshimuna yeye ne bena mvita bende bonsu. Kubashipabu, kakuyi muntu wa kushala ne muoyi.

³⁴ Yoshuwa kumuka kabidi ne bena Izrayele mu Lakishe, kuya ku tshimenga tshia Eglone. Kudilongololabu ku mvita, kuluisha bena tshimenga atshi.

³⁵ Kukuatabu tshimenga atshi anu dituku adi. Kubutulabu bantu bonsu bavuamu, bu muvuabu benze ku Lakishe.

³⁶ Yoshuwa kutungunuka ne bena Izrayele, kumuka mu tshimenga tshia Eglone, kubanda too ne ku tshimenga tshia Ebrone. Kuluishabu bena tshimenga atshi.

³⁷ Kukuatabu tshimenga. Kushipabu mukalenga watshi ne bantu bende bonsu. Kunyengabu kabidi ne bimenga bionsu bivua pabuipi, kushipa bantu bonsu ba mu bimenga abi. Yoshuwa kubutula tshimenga tshia Ebrone tshijima, muvuaye mubutule tshimenga tshia Eglone. Uvua mushipeshe bantu bonsu, kakuyi wa kushala ne muoyi.

³⁸ Pashishe Yoshuwa ne bena Izrayele kubenda bua kuya mu tshimenga tshia Debire. Kuluishabu bena tshimenga atshi.

³⁹ Kukuatabu tshimenga atshi ne mukalenga uvuamu. Kukuatabu kabidi ne bimenga bionsu bivua natshi pabuipi. Kushipabu bantu bonsu bavuamu, kabayi bashiye muntu nansha umue ne muoyi to. Yoshuwa kuenzela tshimenga tshia Debire ne mukalenga uvuamu, muvuaye muenzele tshimenga tshia Ebrone ne tshia Libna, ne bakalenga bavuamu.

⁴⁰ Yoshuwa kukuata ditunga dijima. Kutshimunaye bakalenga bavua ku mikuna, bavua mu tshitupa tshia kuinshi mu ditunga, bavua mu mpata nansha ku muelelu wa Mayi manene a pankatshi pa matunga. Kawa mushiye muntu nansha umue ne muoyi to. Yoshuwa kubutula bantu bonsu, muvua Maweja-Nangila Mvidi Mukulu muambe.

⁴¹ Yoshuwa kukuata ditunga biangatshile ku Kadeshe-Barneya ne ku Ngaza kuinshi mu ditunga, too ne ku ditunga dia Ngoshene ne tshimenga tshia Ngibone ku mutu.

⁴² Kukuataye matunga aa. Kutshimunaye bakalenga abu anu musangu umue. Bualu Maweja-Nangila Mvidi Mukulu wa bena Izrayele nkayende ke uvua uluila bena Izrayele mvita.

⁴³ Pashishe Yoshuwa ne bena mvita bonsu bavuaye nabu, kupingana mu mitanda yabu ivua mu Ngilgale.