Yona 3 - MUKANDA WA MYIDI MUKULU

Yona udi witaba diyi dia Maweja-Nangila

¹ Maweja-Nangila kuambila Yona tshiakabidi ne:

² — Juka, uye mu tshimenga tshinene tshia Ninive, umanyishe benatshi malu onsu andi mukuambile.

³ Musangu ewu, Yona kuitaba bivua Maweja-Nangila mumuambile, kuya ku Ninive. Ninive uvua tshimenga tshipite bunene. Bua kutshikosolola, bivua bikengela luendu lua matuku asatu.

⁴ Yona mumane kuenda dituku dimue mu tshimenga tshia Ninive, uvua ukobola muaku, wamba ne: “Matuku makumi anayi mamane kupita, Ninive neabutuke.”

⁵ Nanku, bantu ba mu tshimenga atshi, kuitababu dilongesha dia Mvidi Mukulu, kujilabu biakudia, kuluatabu bonsu, bapele ne babanji, bilamba bikayapale.

⁶ Lumu alu kufika kudi mukalenga wa tshimenga tshia Ninive. Yeye kujuka mu nkuasa wende wa bumfumu, kuvula bilamba bia bukalenga, kuluata bilamba bikayapale, kusomba panshi mu butu.

⁷ Pashishe mukalenga kuela mukenji mu tshimenga tshijima tshia Ninive ne: “Mu dina dianyi meme, ne dia balombodi banyi ba mu bukalenga, muntu nansha umue, nansha bimuna mene, kanuena mua kudia kantu nansha kamue, nansha kunua mayi to.

⁸ Bantu ne bimuna, nudi ne bua kuvuala bilamba bikayapale. Bonsu nutendelele Mvidi Mukulu ne muoyi mujima. Muntu yonsu umuke mu njila wa malu mabi, alekele buenzayi buvuaye nabu.

⁹ Bumue Mvidi Mukulu udi mua kushintulula meji ende, kutuyisha tshiji tshiende tshinene, tushale ne muoyi.”

¹⁰ Maweja-Nangila kumona muvua bena Ninive balekela buenzayi buabu. Nanku, kutuyishaye tshiji tshivuaye natshi. Kulekelaye mua kubanyoka nuwuaye mubakanyine.