Yona 2 - MUKANDA WA MYIDI MUKULU

Yona udi utendelela Maweja-Nangila

¹ Maweja-Nangila kutuma mushipa munene. Kuminawu Yona. Kushalaye munda mua mushipa matuku asatu munya ne butuku.

² Pavua Yona munda mua mushipa, uvua utendelela Maweja-Nangila Mvidi Mukulu wende, wamba ne:

³ Mu dikenga didi dinkuate edi, ndi nkubikila wewe Maweja-Nangila wanyi; ke wewe kunteleja. Nkavua nkeba kubuela muaba wa bafue. Mvua mulombe bua ungambuluishe; wewe kumvua diyi dianyi.

⁴ Uvua mungele mu mayi, muinshi mua mayi mondoke. Mayi avua mannyungulule, mavuala ampitshila pa mutu misangu ne misangu.

⁵ Meme kuela meji ne: “Maweja-Nangila udi mungipate ku mesu kuende. Mesu anyi neamone kabidi nzubu webe wa tshijila anyi?”

⁶ Mayi avua mankuate mu nshingu. Mavuala a muinshi mua mayi avua mangele munkatshi. Milembuelembue ivua munjingile ku mutu.

⁷ Mvua mudine mu mayi too ne kasuki, kufika ne ku tshitaku tshia mikuna. Bakavua banginjidila biibi bia nzubu wa lufu. Kadi anu wewe Maweja-Nangila Mvidi Mukulu wanyi, ke uvua mumpatule mu dijimba edi ne muoyi.

⁸ Nansha pamvua nkeba kufua, mvua amu nkuvuluka, Maweja-Nangila wanyi. Mitendelelu yanyi mmifike kuudi, ku nzubu webe wa tshijila.

⁹ Badi batendelela nwidie ya dishima, kabena mua kupanda to.

¹⁰ Kadi meme ndi nkuimbila misambu, nkulambula milambu, nkuela tuasakidila. Nenkumbaje bionsu bindi mukulaye. Eyowa, wewe Maweja-Nangila, ke Mumpandishi wanyi!

¹¹ Nanku, Maweja-Nangila kutumina mushipa diyi, kulukilawu Yona ku muelelu wa mayi.