Yobe 9 - MUKANDA WA MYIDI MUKULU

Yobe kukudimuna Bildade ne: Mvidi Mukulu mmumpite bukole

¹ Pashishe Yobe kuandamuna ne:

² Bushuwa, ndi mumanye bionsu biudi wamba. Muntu udi mua kupisha Mvidi Mukulu anyi? Kabiena mua kuenzeka to.

³ Nuenu basue kuelangana nende mpata, wewe mumuele nkonku nansha tshinunu, kena mua kuandamuna nansha lumue.

⁴ Mvidi Mukulu udi mutupite ku bukole ne ku lungenyi. Udi mua kumutonuena mesu kabayi bamunyoka, nnganyi?

⁵ Udi mua kutula mikuna, kuyiteka muaba mukuabu kayi umanyisha muntu. Yeye ne tshiji, udi uyibondakaja.

⁶ Udi uzakaja buloba, unyungisha makunji adi mabuambula.

⁷ Udi ukandika diba bua kadipatuki, udi ukangila mitotu mu nzubu kayiyi ikenka kabidi.

⁸ Yeye nkayende ke udi ubalula diulu, udi wendakana pa mavuala a mayi manene.

⁹ Udi mufuke mbua ne nyama ne muntu. Tshiminanzaji, mutotu wa nkesha, ne mutshi mutshiamakane udi umueneka kuinshi kua ditunga.

¹⁰ Malu adiye muenze mmanene, muntu kena mua kuajingulula. Kena nansha mua kubala bishima biende bungi buabi.

¹¹ Yeye upitshila pabuipi nanyi, tshiena mua kumumona to. Nansha yeye mundenge kakese, tshiena mua kumvua to.

¹² Udi mua kunyenga Mvidi Mukulu tshidiye wangata nganyi? Muntu kena mua kumukimina, kumuebeja ne: “Tshiudi wenza ntshinyi?”

¹³ Padi Mvidi Mukulu mufike munda, kabena bamukandika to. Rakabe ne bena diende, nyama ya bidika ya mu mayi manene, mbiname ku makasa ende.

¹⁴ Padibi bienza nanku, meme ndi mua kumuandamuna bishi? Tshindi meme mua kumuambila ntshinyi?

¹⁵ Nansha meme mubinge, tshiena mua kumuandamuna to. Ndi ndomba amu bua mukoshi wanyi wa nsambu amfuile luse!

¹⁶ Nansha meme mumubikile, yeye mungitabe, tshiena mua kushindika ne: uvua munteleje to.

¹⁷ Udi unzaza amu bua bualu bukese. Udi untapa amu kuntapa mputa, kayiyi bualu,

¹⁸ Kena musue bua meme kueyela, kuikisha katupa. Udi untatshisha, unyingalaja bikole.

¹⁹ Udi mumpite ku bukole, ndi mua kumuluisha anyi? Kadi yeye, ndi mua kumufunda ku kabadi anyi? Kadi udi mua kumbikidisha ku kabadi nganyi?

²⁰ Nansha meme mubinge, neampishe, nansha meme mulumbulule bishi ne bishi, neamfundile tshibawu, tshiyi ne bualu.

²¹ Bushuwa, tshiena muenze bualu bubi to. Kadi nansha meme mufue, bidi amu bimpe. Ya panu ikadi mintonde, bionsu bidi amu mushindu umue.

²² Ke pandi ngamba ne: kabiena ne tshilumbu to. Mvidi Mukulu udi ubutula nansha muntu udi kayi ne bualu, nansha muntu mubi.

²³ Padi tshipupu tshifika, tshishipa diakamue bantu badi kabayi ne tshilumbu, Mvidi Mukulu udi useka padiye umona mudibu bakenga.

²⁴ Padi ditunga mu bianza bia muena tshikisu, Mvidi Mukulu udi ufofamija mesu a bakoshi ba nsambu. Padiye kayi muenze nanku, mukuabu udi mua kuenza nanku nnganyi?

²⁵ Matuku anyi adi apita lukasa, mapite muntu udi unyema lubilu, adi ajimina tshiyi muanji kusanka dituku nansha dimue.

²⁶ Adi apita lubilu bu buatu budi kabuyi ne bujitu, bu mudi nyunyi wa tshiminyi upueka panshi bua kukuata tshintu.

²⁷ Meme kuamba ne: mbimpe kupua ntatu yanyi muoyi, meme kusanka, kutua mimuemue.

²⁸ Kadi makenga anyi adi amu ankuatshisha bowa. Bualu ndi mumanye ne: tshiena mua kubinga, ku mesu a Mvidi Mukulu to.

²⁹ Nansha biobi bishi, ndi amu muena tshibawu kumpala kuende. Kukeba kudibingisha kudiye, nkujimija diba!

³⁰ Nansha meme mowa mayi ne nsabanga wa munganga. mutokesha bianza bianyi ne wa binshidimba,

³¹ Mvidi Mukulu neangele musangu umue mu bitotshi. Bilamba bianyi nebikale ne bundu.

³² Mvidi Mukulu kena muena mulongu nanyi, undi mua kuandamuna, bua tuetu kuya nende ku kabadi!

³³ Kakuena muntu udi mua kuimana pankatshi petu, bua kutulumbuluisha bonsu babidi, kukosa nsambu yetu.

³⁴ Bu Mvidi Mukulu mua kungumbushila dikombu didiye unkuma, bu yeye kayi unkuatshisha kabidi bowa,

³⁵ mvua mua kuakula tshiyi mmutshina to. Kadi kabiena nanku to, ndi nkayanyi!