Yobe 7 - MUKANDA WA MYIDI MUKULU

Yobe udi wandamuna kabidi balunda bende

¹ Bantu badi ne lutatu lukole pa buloba, badi benza mudimu bu bapika.

² Muntu udi bu mupika mu munya mukole udi ukeba dileji, bu mudi muena mudimu mupele utekemena bua bamufute.

³ Ngondu ya bungi idi ipita, meme ndi amu nkenga bikole. Butuku buonsu ndi amu mu lutatu.

⁴ Pandi mulale, ndi amu muoyi kulukulu. Ndi ndiebeja ne: “Ndi mua kubika diba kaayi?” Butuku budi amu bunenga, ndi ndituta eku ne kuaka too ne mudi panshi patoke.

⁵ Bikusu ne biuwuja bidi pambidi panyi ponsu. Mubidi wanyi udi mutapika mputa, ipatuka tufina.

⁶ Matuku anyi a panu adi aya lubilu bu lua buatu bua mashinyi a mutedi wa bilamba. Adi enda ajika, tshiyi mua kutekemena tshintu.

⁷ Eyi Mvidi Mukulu, umanye ne matuku anyi a panu adi amu lupepela. Diakalenga dianyi ndimane kujika kashidi.

⁸ Wewe udi undama, kuena ummona kabidi to. Mesu ebe neankebe, kadi tshiakuikalapu kabidi nansha.

⁹ Amu bu mudi divuba divingutuka, dijimina, ke mudi bantu bafua, baya kabayi mua kupingana panu kabidi.

¹⁰ Muntu mumane kufua nanku, kena upingana kuende kabidi to. Nansha muaba uvuaye musombe, badi bamupua muoyi.

¹¹ Ke pandi tshiyi mua kupuwa kashidi to. Bu mundi ne kanyinganyinga kakole mu muoyi wanyi, ndi amu ne bua kuakula. Dibungama dianyi ndipite, ndi amu ne bua kuamba bidi bintonda.

¹² Wewe udi untekela bantentekedi bua tshinyi? Ndi mayi manene malabale nansha mushipa wa tshidika anyi?

¹³ Pandi mbanda pa bulalu, ntekemena kukola mu maboku, pandi nkeba kulala bua kupua ntatu yanyi muoyi,

¹⁴ udi ufika undubakaja ne bilota bibi. Malu audi undeja ku tulu, adi antshinyisha bikole.

¹⁵ Eyowa, bu wewe mua kungela kankosa ku nshingu, mbimpe bitambe! Ndi musue kufua, pa mutu pa meme kunyana, kushala anu mifuba nkayayi nunku.

¹⁶ Bionsu bia panu mbimane kuntonda. Tshiena musue kupashala. Undekele matuku anyi kaena ne bua nsongu panu.

¹⁷ Udi wangata muntu ne mushinga bua tshinyi? Udi uteka muoyi webe kudiye bua tshinyi?

¹⁸ Udi umukenketa dinda dionsu, udi umuteta amu kumuteta kuyi wikisha.

¹⁹ Kuena mua kutangila luseke lukuabu, nansha katupa kakese, bua mmone mua kumina mate anyi?

²⁰ Nansha meme muena tshibawu, bidi bikutonda bua tshinyi, paudi musue amu kutentekela bantu? Ndi mukuenze bujitu anyi? Udi uludika mikete yebe, bua inkuate amu meme bua tshinyi?

²¹ Kuena mua kulengulula tshilema tshianyi, kungumvuila luse bua tshinyi? Nkadi mikolu ku tshiina, mulale mu lupuishi, neunkebe, tshiakuikalapu to.